ໜອງຊີ່ຫູນະຄອນຫາງໂຈວທີ່ສວຍງາມແລະຊາລົງຈິງ
-----------------------------------------------------------------------------------------------------------------
ໜອງຊີ່ຫູຂອງນະຄອນຫາງໂຈວຈີນມີຊື່ສຽງດົ່ງດັງໃນໂລກ, ຄົນທັງຫຼາຍມັກຖືໜອງນີ້ກັບໜອງເຊີແນວຢູ່ສະວິສເປັນໄຂ່ມຸກສອງໜ່ວຍທີ່ສ່ອງແສງໃສ່ກັນຢູ່ຕາເວັນອອກກັບຕາເວັນຕົກຂອງໂລກ. ມື້ນີ້, ພວກເຮົາຈະພາທ່ານໄປທ່ຽວໜອງຊີ່ຫູ, ແລະຊິມນ້ຳຊາລົງຈິງ ເຊິ່ງເປັນນ້ຳຊາທີ່ມີຊື່ສຽງຂອງໜອງຊີ່ຫູນຳກັນ.
ນະຄອນຫາງໂຈວແມ່ນຕົວເມືອງທີ່ມີປະຫວັດ 2200 ກວ່າປີ, ແມ່ນແຫຼ່ງກຳເນີດອະລິຍະທຳຂອງຈີນແຫ່ງໜຶ່ງ. ນະຄອນຫາງໂຈວເຄີຍເປັນນະຄອນຫຼວງຂອງສອງລາດຊະວົງໃນປະຫວັດສາດຈີນ. ໃນສະຕະວັດທີ 13, ທ່ານມາໂຄ ໂປໂລ ນັກເດີນທາງອີຕາລີໄປຮອດນະຄອນຫາງໂຈວ, ທ່ານຖືຕົວເມືອງນີ້ເປັນ"ເມືອງສະຫວັນ", ຍ້ອງຍໍວ່າ ນະຄອນຫາງໂຈວແມ່ນ"ຕົວເມືອງທີ່ສວຍງາມແລະຫຼູຫຼາກວ່າໝູ່ໃນໂລກ".
ຄົນທັງຫຼາຍມັກນະຄອນຫາງໂຈວ, ສ່ວນຫຼາຍແມ່ນຍ້ອນມັກທິວທັດທີ່ສວຍງາມຂອງໜອງຊີ່ຫູ. ໜອງຊີ່ຫູແມ່ນວິນຍານຂອງນະຄອນຫາງໂຈວ, ບໍ່ວ່າຟ້າແຈ້ງຫຼືຝົນຕົກ, ບໍ່ວ່າໃນລະດູໃດ, ລ້ວນແຕ່ມີທິວທັດທຳມະຊາດທີ່ສວຍງາມ. ແຕ່ກີ້ແຕ່ກ່ອນ, ໜອງຊີ່ຫູກໍ່ເລີ່ມມີທິວທັດ 10 ແຫ່ງທີ່ມີຊື່ສຽງເຊັ່ນ: ລະດູບານໃໝ່ເບິ່ງຄັນຄູຍາວ, ລະດູໃບໄມ້ຫຼົ່ນເບິ່ງໜອງມິດງຽບ, ຫິມະຕົກໃນຂົວຂາດ, ດວງຈັນສ່ອງແສງລົງໃສ່ສາມທາດ ແລະອື່ນໆ. ທິວທັດເຫຼົ່ານີ້ບາງແຫ່ງຢູ່ເທິງໜອງ, ບາງແຫ່ງຢູ່ອ້ອມແອ້ມໜອງ, ເງົາຂອງພູຜາປະກົດເດັ່ນຢູ່ໜ້ານ້ຳ, ບໍ່ວ່າລະດູໃບໄມ້ປົ່ງ ລະດູຮ້ອນ ລະດູໃບໄມ້ຫຼົ່ນ, ລະດູໜາວ, ລະດູໃດກໍ່ສວຍງາມຫຼາຍ.
