ໜອງຊີ່ຫູນະຄອນຫາງໂຈວທີ່ສວຍງາມແລະຊາລົງຈິງ
-----------------------------------------------------------------------------------------------------------------
ຊາລົງຈິງມີຄຸນນະພາບດີເລີດ, ເຊິ່ງໄດ້ເຮັດດ້ວຍກຳມະວິທີລະອຽດ, ວິທີຂົ້ວຊາລົງຈິງສັບສົນຫຼາຍ, ຜູ້ທີ່ເຄີຍເຫັນຂັ້ນຕອນການປຸງແຕ່ງ, ລ້ວນແຕ່ຖືວ່າຊາລົງຈິງແມ່ນເຮັດດ້ວຍຄວາມພາກພຽນອີ່ຫຼີ. ຊາລົງຈິງມີສີຂຽວງາມ, ຫອມຫຼາຍ, ແມ່ນຊາທີ່ມີຊື່ສຽງຂອງຈີນ. ໃນເວລາໄປທ່ຽວໜອງຊີ່ຫູແລ້ວ, ຍາດເວລາໄປຊີມນ້ຳຊາລົງຈິງ, ຈັ່ງແມ່ນມີຄວາມສຸກແທ້ໆ.
ຊາລົງຈິງຂອງໜອງຊີ່ຫູປູກຢູ່ເທິງພູທີ່ອ້ອມແອ້ມໜອງຊີ່ຫູ, ຄຸນນະພາບຂອງມັນມີສ່ວນກ່ຽວຂ້ອງກັບເງື່ອນໄຂທຳມະຊາດຂອງດິນປູກຝັງ. ຢູ່ແຖວບ້ານລົງຈິງມີອາກາດອົບອຸ່ນ, 4ລະດູແຈ້ງດີ, ນ້ຳຝົນພຽງພໍ, ບວກກັບດິນສ່ວນຫຼາຍແມ່ນດິນຊາຍ, ອ່ອນ, ນ້ຳຊືມເຂົ້າງ່າຍ, ມີຜົນດີຕໍ່ການປູກຕົ້ນຊາ. ນອກນັ້ນ, ລະດູການເດັດໃບຊາກໍ່ຕ້ອງເດັດຖືກຍາມ, ລະດູຕ່າງກັນ, ຄຸນນະພາບຂອງໃບຊາທີ່ເດັດລົງມາກໍ່ຕ່າງກັນ. ໃບຊາທີ່ເດັດກ່ອນວັນທີ 5 ເມສານັ້ນແມ່ນລ້ຳຄ່າທີ່ສຸດ, ຈາກນັ້ນຈຶ່ງແມ່ນໃບຊາທີ່ເດັດກ່ອນວັນທີ 20 ເມສາ.
ຊາລົງຈິງຂອງໜອງຊີ່ຫູມີຊື່ສຽງຍ້ອນ"ສີຊຽວ, ກິ່ນຫອມ, ລົດຊາດດີ, ຮູບງາມ". ນາງສີເຈີເມີຍ ຊ່າງເຮັດນ້ຳຊາທີ່ເກີດຢູ່ເຂດຊາ, ໃນຍາມຍັງນ້ອຍກໍ່ຮຽນວິທີເດັດໃບຊາແລະຊົງນ້ຳຊາ, ມີຄວາມຮູ້ສຶກທີ່ເລິກເຊິ່ງຫຼາຍຕໍ່ໃບຊາ, ເບິ່ງນາງຊົງຊາ, ຈັ່ງແມ່ນພາບທີ່ປະທັບໃຈຫຼາຍ, ທ່ານກ່າວວ່າ:
"ການຊົງນ້ຳຊາຂຽວຕົ້ນຕໍຕ້ອງເຮັດ"ສາມກົ້ມຫົວ", ນ້ຳຂຶ້ນລົງ 3 ເທື່ອ, ມັນມີຄວາມໝາຍເລິກເຊິ່ງຫຼາຍຢ່າງ, ພວກທ່ານເຫັນແລ້ວຮູ້ສຶກວ່າງາມຫຼາຍ, ນ້ຳຂຶ້ນລົງເທື່ອໜຶ່ງສາມາດເຮັດໃຫ້ໃບຊາຖືກແຊ່ໃນນ້ຳຢ່າງເຕັມສ່ວນ, ເໝືອນກັບກົ້ມຫົວ 3 ເທື່ອ, ສະແດງຄວາມເຄົາລົບຕໍ່ແຂກ, ກໍ່ແມ່ນມາລະຍາດຊະນິດໜຶ່ງ. ໃນເວລາຊົງນ້ຳຊາ, ຊາກັບນ້ຳແມ່ນ 1ຕໍ່ 50, ນ້ຳຊາບໍ່ໃຫ້ໃສ່ເຕັມຈອກ, ຄືໃສ່ນ້ຳ 70% ຂອງຈອກເທົ່ານັ້ນ, ເພື່ອສະແດງຄວາມເຄົາລົບຕໍ່ແຂກ."
ກ່ອນແລະຫຼັງບຸນເຊັງເມັງແລະວັນທີ 20 ເມສາທຸກປີ, ຜູ້ປູກຕົ້ນຊາຢູ່ອ້ອມຂ້າງໜອງຊີ່ຫູໄດ້ເດັດຊາ ຂົ້ວຊາ, ກິ່ນຫອມຂອງໃບຊາລ່ອງລອຍໄປຕາມອາກາດ, ໄດ້ດຶງດູດນັກທ່ອງທ່ຽວຢ່າງຫຼວງຫຼາຍ. ນາງຄີລາສ໌ ເປລິນເນັກມາຈາກປະເທດຕວກກີ, ຕວກກີກໍ່ແມ່ນປະເທດທີ່ຜະລິດໃບຊາແລະມັກກິນນ້ຳຊາ, ນາງຫຼົງໄຫຼນຳທິວທັດທີ່ສວຍງາມຂອງໜອງຊີ່ຫູ, ຊີມລົດຊາດກິ່ນຫອມຂອງຊາລົງຈິງໜອງຊີ່ຫູ, ເຮັດໃຫ້ນາງເພີດເພີນໃຈຈົນຫຼົງຮ້ອງເພງຊາຂອງບ້ານເກີດອອກມາຢ່າງບໍ່ຮູ້ສຶກຕົວ, ນາງເວົ້າວ່າ:
"ຢູ່ນະຄອນຫາງໂຈວ, ຂ້ອຍໄດ້ຮຽນຮູ້ຄຳເວົ້າຄຳໜຶ່ງຄື, ຄົນຈີນກິນນ້ຳຊາເອີ້ນວ່າຊີມນ້ຳຊາ, ໃນເວລາຂ້ອຍທ່ຽວຊົມຕົວເມືອງແຫ່ງນີ້, ກໍ່ແມ່ນຊີມຕົວເມືອງແຫ່ງນີ້, ບໍ່ພຽງແຕ່ທິວທັດທຳມະຊາດທໍ່ນັ້ນ, ຍັງມີບັນຍາກາດວັດທະນະທຳອີກດ້ວຍ."
ໃບຊາລົງຈິງຂອງໜອງຊີ່ຫູມີປະຫວັດຍາວນານຢູ່ຈີນ, ມັນໄດ້ມີຊື່ສຽງດົ່ງດັງແມ່ນຍ້ອນວ່າມີຄຸນນະພາບດີ,ແລະຕັດແຍກອອກຈາກວັດທະນະທຳປະຫວັດສາດຂອງຊາລົງຈິງບໍ່ໄດ້. ສະນັ້ນ, ຊາລົງຈິງບໍ່ພຽງແຕ່ມີຄຸນຄ່າຂອງຊາເທົ່ານັ້ນ, ແຕ່ຍັງມີຄຸນຄ່າສິລະນະວັດທະນະທຳອີກດ້ວຍ, ໃນນັ້ນ, ມີເນື້ອໃນວັດທະນະທຳແລະກົກເຫງົ້າປະຫວັດສາດອັນເລິກເຊິ່ງ.
