ໜອງຊີ່ຫູນະຄອນຫາງໂຈວທີ່ສວຍງາມແລະຊາລົງຈິງ
-----------------------------------------------------------------------------------------------------------------
ນັບແຕ່ເດືອນມີນາປີກາຍນີ້ເປັນຕົ້ນມາ, ນັກທ່ອງທ່ຽວເມື່ອໄດ້ທ່ຽວຊົມໜອງຊີ່ຫູໃນຕອນກາງເວັນແລ້ວ, ຕອນຄ່ຳຍັງໄດ້ຊົມການສະແດງພິເສດຢູ່ໜອງຊີ່ຫູອີກດ້ວຍ. ລາຍການ"ພາບປະທັບໜອງຊີ່ຫູ"ໄດ້ເອົາວັດທະນະທຳປະຫວັດສາດອັນອຸດົມສົມບູນ ແລະທິວທັດທຳມະຊາດຂອງໜອງຊີ່ຫູປະສົມປະສານເຂົ້າກັນເຊື່ອມໂຍງນິທານພື້ນເມືອງບູຮານ ແລະເທບນິຍາຍຂອງນະຄອນຫາງໂຈວ, ແມ່ນການສະແດງສະພາບຕົວຈິງຂະໜາດໃຫຍ່ທີ່ເອົາພູແທ້ນ້ຳແທ້ເປັນສາກຫຼັງ, ພ້ອມທັງອາໄສວິທີວິທະຍາສາດໄຮເຕັກມາສ້າງ"ຝົນຕົກໜອງຊີ່ຫູ", ໄດ້ສະແດງໃຫ້ເຫັນໜອງຊີ່ຫູໃນຍາມຝົນຕົກແລະທິວທັດໜອງຊີ່ຫູທີ່ສວຍງາມໃນຍາມຝົນຕົກ. ການສະແດງດັ່ງກ່າວ, ໄດ້ໃຊ້ໄຮເຕັກສະແດງສະພາບຕົວຈິງ, ເຮັດໃຫ້ເນື້ອໃນຂອງຕົວເມືອງແລະທິວທັດທຳມະຊາດຂອງນະຄອນຫາງໂຈວໂຮມເຂົ້າເປັນງານມະຫາກຳສິລະປະທີ່ມີລະດັບສູງເດັ່ນ.
ນະຄອນຫາງໂຈວມີພູຂຽວນ້ຳໃສ, ມີວັດຖຸບູຮານອຸດົມສົມບູນ. ຊາລົງຈິງ ທີ່ເປັນຊາພື້ນເມືອງອັນໜຶ່ງຂອງໜອງຊີ່ຫູກໍ່ມີຊື່ສຽງໃນໂລກ. ຊາລົງຈິງຂອງໜອງຊີ່ຫູມີປະຫວັດຍາວນານ, ມາແຕ່ສະໄໝລາຊະວົງຖາງ, ທ່ານລູ້ຢູ ທີ່ມີຊື່ສຽງໃນຍາມນັ້ນໄດ້ຂຽນບົດປະພັນກ່ຽວກັບໃບຊາທີ່ວ່າ"ສາຈິ່ງ" ເຊິ່ງເປັນບົດປະພັນເຫຼັ້ມທຳອິດໃນໂລກ, ໃນນັ້ນກໍ່ໄດ້ບັນທຶກການຜະລິດຊາຢູ່ວັດທ່ຽນຈູແລະວັດລິງອີງຂອງຫາງໂຈວ. ກ່ຽວກັບຊາລົງຈິງຂອງໜອງຊີ່ຫູ, ຢູ່ທ້ອງຖິ່ນຕ່າງໆຂອງຈີນໄດ້ມີການເລົ່າລືກັນຫຼວງຫຼາຍ, ທ່ານກ່າວຫົງ ຂອງຫໍພິພິດທະພັນໃບຊາຈີນກ່າວວ່າ:
"ເຈົ້າຊີວິດສຽນລົງໃນລາຊະວົງຊິງແມ່ນລູກກະຕັນຍູ, ເມື່ອຮູ້ວ່າພະມານດາເຈັບປ່ວຍໜັກ, ເພີ່ນໃຈຮ້ອນຫຼາຍ, ເລີຍເອົາໃບຊາໃບໜຶ່ງທີ່ຫາກໍ່ເດັດລົງມານັ້ນຫຍັດໃສ່ປື້ມ, ແລ້ວຖືໄປ. ເມື່ອໄປຮອດ, ເປີດປື້ມແລ້ວ, ກິ່ນຫອມໃບຊາໄດ້ປີວອອກມາ, ພະມານດາເວົ້າວ່າ ແມ່ນກິ່ນຫອມຂອງໃບຊານັ້ນເອງທີ່ປົວພະຍາດຂອງເພີ່ນດີ. ສະນັ້ນ, ເຈົ້າຊີວິດສຽນລົງກໍ່ກຳນົດວ່າ, ຕົ້ນຊາ 18 ຕົ້ນນັ້ນ, ທຸກໆປີເມື່ອເດັດໃບຊາແລ້ວກໍ່ຕ້ອງສົ່ງເຂົ້າພະລາຊະວັງ."
