ອາຫານເບົາເສິງຕູ່ ກໍແມ່ນອາຫານແຊບປະເພດໜຶ່ງ ຂອງເສສວນ. ຖ້າທ່ານຢາກຊອກຫາຂໍ້ມູນກ່ຽວກັບອາຫານເສສວນ, ກໍຈະເຫັນເວບໄຊໜຶ່ງຊື່ວ່າ "ຊ່ວນວຸ້ຍຟ່າງ" ແປວ່າຮ້ານອາຫານເສສວນ, ນີ້ບໍ່ແມ່ນເວບໄຊທາງການ ເຊິ່ງແມ່ນຊາວໜຸ່ມທີ່ມັກອາຫານເສສວນສ້າງຂຶ້ນເອງ. ດ້ວຍຄວາມມັກອາຫານບ້ານເກີດຕົນເອງ, ເຂົາເຈົ້າຢາກໃຫ້ອາຫານເສສວນນີ້ມີຊື່ລືນາມກວ້າງໄກກວ່າເກົ່າ. ທ່ານຫີປິ່ນ ຜູ້ຮັບຜິດຊອບເວບໄຊເວົ້າວ່າ: "ພວກເຮົາໄດ້ໄປຢາມຜູ້ມັກອາຫານພື້ນເມືອງ ແລະ ຜູ້ແຕ່ງອາຫານເກັ່ງຫຼາຍຄົນ, ພວກເພິ່ນວ່າ, ເມື່ອເວົ້າເຖິງລົດຊາດອາຫານເສສວນ ບໍ່ຄວນເວົ້າແຕ່ອາຫານເສສວນ ຫຼື ຊີ້ນຈຸ່ມເສສວນ, ຄວນເວົ້າມາແຕ່ກົກເຄົ້າເຫງົ້າມູນ, ເວົ້າມາແຕ່ການເລືອກເອົາວັດຖຸດິບ, ເຄື່ອງປຸງ, ແລະ ແຈ່ວ, ຈາກການຊອກຊື້ວັດຖຸດິບຮອດການປຸງແຕ່ງ, ຈົນຮອດຂັ້ນສຸດທ້າຍຄື ແຕ່ງເປັນອາຫານ ແລະ ຈຳໜ່າຍ, ລ້ວນແຕ່ມີເອກະລັກພິເສດຂອງມັນ, ພວກເຮົາມີຄວາມສົນໃຈຫຼາຍ ແລະ ກໍມີຄວາມໝັ້ນໃຈ ທີ່ຈະເຜີຍແຜ່ອາຫານດີໆຂອງບ້ານເກີດເມືອງນອນ, ບວກກັບຄວາມມັກກິນ, ພວກເຮົາຈຶ່ງໄດ້ສ້າງເວບໄຊນີ້ຂຶ້ນມາ".
ຜ່ານເວບໄຊ "ຊ່ວນວຸ້ຍຟ່າງ", ທ່ານບໍ່ພຽງແຕ່ຈະໄດ້ຮູ້ອາຫານແຊບໆຂອງເສສວນ ແລະ ປະຫວັດຄວາມເປັນມາຂອງອາຫານເສສວນ, ຊອກເຫັນຮ້ານອາຫານເສສວນທີ່ມີຊື່ສຽງກວ່າໝູ່ ຫຼື ຮ້ານອາຫານເບົາເສສວນນ້ອຍໆທີ່ມີຊື່ສຽງຢູ່ແຄມທາງ, ແລະຍັງຈະຮຽນຮູ້ເນື້ອໃນວັດທະນະທຳອັນເລິກເຊິ່ງຂອງອາຫານອັນເລີດລົດອີກດ້ວຍ. ທ່ານຫູປິ່ນກ່າວວ່າ, ແຕ່ໃດມາ, ແຂວງເສສວນກໍຖືກເອີ້ນວ່າເປັນ "ເມືອງແຫ່ງສະຫວັນທີ່ອຸດົມສົມບູນ", ໃນນິດໄສຂອງຊາວເສສວນມີອັນໜຶ່ງທີ່ສຳຄັນຫຼາຍ ນັ້ນກໍຄື ວັດທະນະທຳການພັກຜ່ອນຢ່ອນອາລົມ. ຍ້ອນຊາວເສສວນມັກອາຫານທີ່ເລີດລົດ, ຈຶ່ງສາມາດແຕ່ງອາຫານໄດ້ຫຼາຍໆຊະນິດ, ແຕ່ລະຊະນິດມີລົດຊາດຕ່າງກັນ, ເຮັດໃຫ້ວັດຖຸດິບແຕ່ລະຊະນິດ ລ້ວນແຕ່ມີລັກສະນະພິເສດຂອງມັນ. ທ່ານຫູປິ່ນເວົ້າວ່າ: "ໃນຍາມວ່າງ, ຄົນທັງຫຼາຍ ໂດຍສະເພາະແມ່ນຜູ້ເຖົ້າ ມັກຄຶດແຕ່ງອາຫານຕ່າງໆ. ມີແມ່ເຮືອນຫຼາຍໆຄົນ ຖ້າຫວ່າງວຽກ ກໍຄົ້ນຄວ້າແຕ່ງອາຫານແນວນັ້ນແນວນີ້, ແລ້ວເອົາໃຫ້ຍາດຕິພີ່ນ້ອງ ຫຼື ໝູ່ເພື່ອນຊິມເບິ່ງ, ຖ້າເຫັນວ່າແຊບ ລົດຊາດຖືກປາກ, ພວກເຂົາເຈົ້າກໍຈະເຜີຍແຜ່ອາຫານຊະນິດນັ້ນ".
ລົດຊາດອາຫານເສສວນກຳເນີດຈາກພື້ນເມືອງ, ຖ້າທ່ານມີໂອກາດໄປນະ ຄອນເສີງຕູ່, ກໍຈະມີໂອກາດໄປເລາະຫຼິ້ນຕາມຖະໜົນນ້ອຍໃຫຍ່ຂອງ "ເມືອງແຫ່ງອາຫານເລີດລົດ" ແຫ່ງນີ້, ແລະໄດ້ຊິມອາຫານແຊບໆທີ່ເຮັດໃຫ້ທ່ານຕິດໃຈ.
<< 1 2 3 >>
Fri Apr. 4, 2025
