 |
|
|
|||
| |
 |
|
||||||
 |
||
|
||
|
||
|
||
|
||
|
ເມືອງທາວຈູບໍ່ພຽງແຕ່ມີກຳແພງເມືອງແລະສະຖານທີ່ກອງບັນຊາການທີ່ສ້າງຂຶ້ນສະເພາະເພື່ອຕ້ານຂ້າເສິກຍີ່ປຸ່ນໃນສະໄໝລາຊະວົງມິງເມື່ອ600ປີກ່ອນທີ່ໄດ້ຮັບການປົກປັກຮັກສາໄວ້ເປັນຢ່າງດີທີ່ສຸດ,ແລະຍັງເປັນແຫຼ່ງທ່ອງທ່ຽວທີ່ສວຍງາມອີກດ້ວຍ.ທິວທັດພູຜາແມ່ນ້ຳຢູ່ອ້ອມເມືອງງາມຫຼາຍ,ສືຊ່ານຈູນ້ຳທາວຈ່ຽງເປັນແຫຼ່ງທ່ອງທ່ຽວທີ່ມີຊື່ສຽງທີ່ນັກທ່ອງທ່ຽວໄປທ່ຽວເມືອງນີ້ຕ້ອງໄປ.ຄຳວ່າ"ຈູ"ໃນພາສາຈີນໝາຍຄວາມວ່າດອນກາງນ້ຳ,ຢູ່ນ້ຳທາວຈ່ຽງມີດອນນ້ອຍໃຫຍ່ລວມ13 ແຫ່ງແລະຕ່າງກໍ່ມີຮູບຮ່າງທີ່ແຕກຕ່າງກັນ,ໃນນັ້ນ,ດອນໃຫຍ່ທີ່ສຸດມີເນື້ອທີ່5ເຮັກຕາ,ນ້ອຍທີ່ສຸດມີພຽງ300ກວ່າຕາແມັດເທົ່ານັ້ນ.ຢູ່ເທິງດອນມີຕົ້ນໝາກຄາຍ,ສະນັນຈິ່ງມີຊື່ວ່າທາວຈູ ແປວ່າດອນໝາກຄາຍ.ເມື່ອຢືນຢູ່ບ່ອນສູງຫຼຽວເບິ່ງ" ສືຊ່ານຈູນ້ຳທາວຈ່ຽງ " ຫຼືແປວ່າ13ດອນນ້ຳທາວຈ່ຽງເໝືອນດັ່ງໃບບົວ,ປ່າໝາກກ້ຽງຂຽວງາມຄືຢົກ,ແພ່ໄປລະຫວ່າງດອນຕ່າງໆ,ພາບນີ້ງາມຄືແດນສະຫວັນໃນເມືອງມະນຸດ.
ນັກຂ່າວພວກເຮົາຍັງໄດ້ໄປສວນສາທາລະນະທໍລະນີສາດແຫ່ງຊາດຂອງນະຄອນລິນໄຮ.ພູທຸກໜ່ວຍແລະຫີນທຸກກ້ອນໃນສວນລ້ວນແຕ່ຄືລະຫັດແຜ່ນດິນພວມລໍຄອຍນັກທ່ອງທ່ຽວໄປຊອກຄົ້ນ.ຈາກປາກພູເຂົາໄຟທາວຈູຍ່າງເຂົ້າໄປ300ແມັດຈະເຫັນເສົາຫີນທີ່ມີຮູບຫຼາຍຫຼ່ຽມກະແຈກກະຈາຍຢ່າງຫຼວງຫຼາຍ,ນີ້ເປັນລາວາຂອງພູເຂົາໄຟເມື່ອ80ລ້ານປີກ່ອນ.
ເສົາຫີນເຫຼົ່ານີ້ສ່ວນຫຼາຍເປັນຮູບ5ຫຼ່ຽມຫຼື6ຫຼ່ຽມ,ເສັ້ນຜ່າກາງຢູ່ລະຫວ່າງ40ຫາ60ຊັງຕີແມັດ,ຍາວເຖິງ400ກວ່າແມັດ,ນ້ຳຈາກຫີນທີ່ພົ່ນອອກຍ້ອນພູເຂົາໄຟລະເບີດເມື່ອ80ລ້ານປີກ່ອນໄດ້ໄຫຼໄປທາງທິດຕາເວັນອອກ7ກິໂລແມັດເຖິງແຄມທະເລຫຼົງວານ.ຢູ່ແຫ່ງນີ້ຈະໄດ້ເຫັນຫີນພູເຂົາໄຟຮູບຮ່າງແປກໆທີ່ຢູ່ແຄມທະເລ,ເປັນບ່ອນຮຽນທີ່ດີສຳລັບນັກຮຽນມັດທະຍົມເພື່ອເຂົ້າໃກ້ທຳມະຊາດ.ຢູ່ຕາມທາງຍ່າງຊົມທະເລມີພາບງາມຕ່າງໆເຊັ່ນພູທ່ຽນເມິນທີ່ສູງຊັນ,ຖ້ຳເທບສະມຸດແລະອື່ນໆ.ແຫ່ງນີ້ຍັງເປັນບ່ອນພັກຜ່ອນທີ່ດີສຳລັບຄົນທ້ອງຖິ່ນໄປທ່ຽວພັກຜ່ອນຢ່ອນອາລົມໃນທ້າຍສັບປະດາ. ທ່ານເຢ້ຢາວຊຸນຜູ່ອຳນວຍການພະແນກການພັດທະນາຂອງບ້ານພັກຮ້ອນແຄມທະເລຫຼົງວານແນະນຳວ່າ:
"ທົ່ວເຂດທ່ອງທ່ຽວພວກເຮົາຍາວເຖິງ300ກິໂລແມັດ,ດິນຊາຍອ່ອນນຸ້ມ.ມີເຂດທະເລຕື້ນ10ກວ່າກິໂລແມັດ,ນັກທ່ອງທ່ຽວສາມາດຍ່າງຈາກຫາດຊາຍລົງໄປທະເລເພື່ອຫາຈັບປານ້ອຍແລະກຸ້ງນ້ອຍ.ບໍລິສັດພວກເຮົາຍັງໄດ້ຈັດລາຍການທ່ອງທ່ຽວຫຼາຍຢ່າງເຊັ່ນການແຂ່ງຂັນມວຍປ້ຳໃນຂີ້ຕົມ,ສະເກັດຂີ້ຕົມ,ນອນອາບແດດແລະອື່ນໆ.ໃນໄລຍະຫຼິ້ນບຸນໄຫວ້ພະຈັນ,ພວກເຮົາຍັງຈະຈັດງານກອງໄຟ,ຟັງສຽງແລະຊົມ ຄື້ນທະເລ,ໃນເວລາເກີດມີຄື້ນທະເລທັງໃຫຍ່ແລະນ້ອຍພັດເຂົ້າກະທົບຝັ່ງ,ຊ່າງເປັນພາບທີ່ງົດງາມຫຼາຍ."
ຂີ້ຕົມຮ້ອນພູເຂົາໄຟຢູ່ຫາດຊາຍແຄມທະເລຫຼົງວານມີທາດແຮ່ອຸດົມສົມບູນ,ເຊິ່ງມີຜົນດີຕໍ່ສຸຂະພາບຂອງຄົນ,ຖ້າທ່ານມີໂອກາດໄປທ່ຽວກໍ່ລອງເບິ່ງໄດ້.
ໄປທ່ຽວແຄມທະເລຕ້ອງຊີມອາຫານທະເລຂອງທ້ອງຖິ່ນນັ້ນ,ອາຫານທະເລທີ່ຂາຍຢູ່ຫັ້ນທັງແຊບທັງລາຄາຖືກ,ນັກທ່ອງທ່ຽວຢູ່ບ້ານພັກຮ້ອນແຄມຝັ່ງທະເລຫຼົງວານຈະໄດ້ຊິມອາຫານພື້ນເມືອງຂອງຄອບຄົວຊາວກະສິກອນທີ່ສ່ວນຫຼາຍແມ່ນອາຫານທະເລແຊບໆ,ແລະຍັງຈະໄດ້ສຳຜັດກັບບັນຍາກາດໂລແມນຕິກທີ່ນອນຢູ່ແຄມທະເລຟັງສຽງຄື້ນທະເລອີກດ້ວຍ.
 |
 |
| © China Radio International.CRI. All Rights Reserved. 16A Shijingshan Road, Beijing, China. 100040 |