ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນຄ່ຳວັນທີ 9 ກໍລະກົດນີ້ຕາມເວລາທ້ອງຖິ່ນ, ຢູ່ທີ່ກະຊວງເສດຖະກິດ ແລະ ພະລັງງານເຢຍລະມັນທີ່ນະຄອນຫຼວງແມັກແລັງປະເທດເຢຍລະມັນ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານນາງ ແອງເຈີລາ ເມີເຄວ ນາຍົກລັດຖະມົນຕີເຢຍລະມັນໄດ້ເຂົ້າຮ່ວມພິທີປິດກອງປະຊຸມເວທີປຶກສາຫາລືການຮ່ວມມືເສດຖະກິດເຕັກນິກຈີນ-ເຢຍລະມັນຄັ້ງທີ 9 ແລະ ກ່າວປາໄສສຳຄັນ.
ທ່ານຫຼີເຄີ້ສຽງກ່າວວ່າ, ການຮ່ວມມືຈີນ-ເຢຍລະມັນໄດ້ຮັກສາທ່ວງທ່າຂະຫຍາຍຕົວທີ່ປອດໃສ ແລະ ໜັກແໜ້ນຢ່າງຮອບດ້ານ ແລະ ໄດ້ນຳໜ້າການຮ່ວມມືຈີນ-ເອີຣົບຕະຫຼອດມາ ເຊິ່ງນັບວ່າເປັນແບບຢ່າງແຫ່ງການຮ່ວມມືລະຫວ່າງປະເທດໃຫຍ່ ແລະ ໄດ້ເພີ່ມພະລັງຊຸກດັນໃຫ້ແກ່ການພັດທະນາເສດຖະກິດສອງປະເທດ ກໍຄືຂອງໂລກ. ພວກເຮົາເປັນເອກະພາບກັນເຫັນດີສືບຕໍ່ປັບປຸງ ແລະ ເພີ່ມຄວາມໄວ້ເນື້ອເຊື່ອໃຈທາງການເມືອງ ແລະ ຊຸກຍູ້ໃຫ້ການຮ່ວມມືລະຫວ່າງສອງປະເທດກ້າວຂຶ້ນສູ່ລະດັບສູງກວ່າເກົ່າ. ການຮ່ວມມືທາງເສດຖະກິດເຕັກນິກຈີນ-ເຢຍລະມັນຈະຕັດແຍກອອກຈາກສະພາບແວດລ້ອມການຄ້າແລະການລົງທຶນທີ່ເສລີ ແລະ ເປີດປະຕູນັ້ນແມ່ນບໍ່ໄດ້. ສອງຝ່າຍກ່າວຢ້ຳວ່າ ຈະຮ່ວມມືປົກປັກຮັກສາການຄ້າເສລີ, ເດັດດ່ຽວຄັດຄ້ານລັດທິຝ່າຍດຽວ ແລະ ລັດທິປົກປ້ອງການຄ້າ, ປົກປັກຮັກສາຂອບການຄ້າຫຼາຍຝ່າຍ ບົນພື້ນຖານກະຕິກາສາກົນ.
ທ່ານນາງແອງເຈີລາ ເມີເຄວກ່າວວ່າ, ໃນຊຸມປີມໍ່ໆມານີ້, ການຮ່ວມມືຈີນ-ເຢຍລະມັນໄດ້ຮັບຜົນສຳເລັດໃໝ່ຢ່າງບໍ່ຢຸດຢັ້ງ, ການລົງທຶນຂອງຈີນຕໍ່ເຢຍລະມັນໄດ້ກ້າວເຂົ້າສູ່ໄລຍະໃໝ່, ເຢຍລະມັນມີທ່າທີເປີດກວ້າງຕໍ່ເລື່ອງນີ້ ແລະ ຍິນດີໃຫ້ວິສາຫະກິດຈີນເພີ່ມການລົງທຶນຕໍ່ເຢຍລະມັນ. ເຢຍລະມັນສະແດງຄວາມຊົມເຊີຍຈີນທີ່ໄດ້ໃຊ້ມາດຕະການຕັ້ງໜ້າ ໃນການປັບປຸງສະພາບແວດລ້ອມການຕະຫຼາດ ແລະ ເປີດປະຕູໃນຂະແໜງການທະນາຄານ. ເຢຍລະມັນຄອງຄອຍໃຫ້ກອງປະຊຸມສຸດຍອດຈີນ-ເອີຣົບທີ່ຈະຈັດຂຶ້ນໃນໄວໆນີ້ໄດ້ຮັບຜົນສຳເລັດທີ່ດີ ເພື່ອບໍ່ໃຫ້ໂລກຕົກເຂົ້າໃນຮອບໝູນວຽນລັດທິປົກປ້ອງການຄ້າ.
ຜູ້ແທນ 400 ກວ່າທ່ານຈາກວົງການເສດຖະກິດຈີນ-ເຢຍລະມັນໄດ້ເຂົ້າຮ່ວມກອງປະຊຸມຄັ້ງນີ້.
ຄຳເຫັນ
0