ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ເຈົ້າໜ້າທີ່ກົມການຄ້າກັບຕ່າງປະເທດ ກະຊວງການຄ້າຈີນ ໄດ້ເປີດເຜີຍໃນວັນທີ 17 ກໍລະກົດນີ້ຢູ່ນະຄອນຫຼວງປັກກິ່ງວ່າ: 6 ເດືອນຕົ້ນປີນີ້, ການສົ່ງອອກ-ນຳເຂົ້າຂອງຈີນກັບຕະຫຼາດຈະເລີນໃໝ່ ເຊັ່ນ: ບາງປະເທດຢູ່ລຽບຕາມ “ໜຶ່ງແລວໜຶ່ງເສັ້ນທາງ” ແລະ ປະເທດບຣິກສ໌ ສືບຕໍ່ເພີ່ມຂຶ້ນຢ່າງວ່ອງໄວ. ຂະນະທີ່ການນຳເຂົ້າຂອງຈີນເພີ່ມຂຶ້ນໃນໄຕມາດທຳອິດປີນີ້ ໄດ້ປະກອບສ່ວນໃຫ້ການເຕີບໂຕດ້ານການນຳເຂົ້າຂອງໂລກບັນລຸເຖິງ 13,2%.
ອົງການພາສີແຫ່ງຊາດຈີນ ໄດ້ເປີດເຜີຍຕົວເລກຫວ່າງມໍ່ໆມານີ້ວ່າ: 6 ເດືອນຕົ້ນປີນີ້, ຍອດມູນຄ່າການນຳເຂົ້າ-ສົ່ງອອກຂອງຈີນບັນລຸເຖິງ 14.120 ຕື້ຢວນ ເພີ່ມຂຶ້ນ 7,9% ເມື່ອທຽບໃສ່ໄລຍະດຽວກັນຂອງປີຜ່ານມາ ໃນນີ້, ການສົ່ງອອກເພີ່ມຂຶ້ນ 4,9%, ການນຳເຂົ້າເພີ່ມຂຶ້ນ 11,5%; ການໄດ້ປຽບດຸນການຄ້າຫຼຸດລົງ 26,7%. ທ່ານຊົ້ງຊ່ຽນມ້າວ ຮອງຫົວໜ້າກົມການຄ້າກັບຕ່າງປະເທດ ກະຊວງການຄ້າຈີນ ກ່າວວ່າ: ສຳລັບຕົວເລກຂອງໄຕມາດທີ 2 ນັ້ນ, ອົງການການຄ້າໂລກຍັງບໍ່ໄດ້ເປີດເຜີຍ ແຕ່ເມື່ອເບິ່ງຈາກຕົວເລກໄຕມາດທຳອິດແລ້ວເຫັນວ່າ ການຄ້າກັບຕ່າງປະເທດຂອງຈີນໄດ້ຊຸກຍູ້ໃຫ້ເສດຖະກິດການຄ້າຂອງໂລກຟື້ນຄືນ.
ຂະນະທີ່ເມື່ອເບິ່ງຈາກຕະຫຼາດໂລກແລ້ວເຫັນວ່າ: ການນຳເຂົ້າ-ສົ່ງອອກຂອງຈີນກັບຕະຫຼາດຈະເລີນໃໝ່ ເຊັ່ນ: ປະເທດຢູ່ລຽບຕາມ “ໜຶ່ງແລວໜຶ່ງເສັ້ນທາງ” ແລະ ປະເທດບຣິກສ໌ ໄດ້ສືບຕໍ່ເພີ່ມຂຶ້ນຢ່າງວ່ອງໄວ ໃນນີ້, ການນຳເຂົ້າ-ສົ່ງອອກກັບຫວຽດນາມເພີ່ມຂຶ້ນເກືອບ 20%, ກັບອິນໂດເນເຊຍເພີ່ມຂຶ້ນເກືອບ 19%, ກັບຣັດເຊຍເພີ່ມຂຶ້ນ 16% ແລະ ກັບບຣາຊິນເພີ່ມຂຶ້ນຫຼາຍກວ່າ 15%.
ທ່ານຊົ້ງຊ່ຽນມ້າວ ກ່າວຕື່ມວ່າ: ການເຮັດວຽກໃນໄລຍະຕໍ່ໄປ, ຈີນຈະຍຶດໝັ້ນທິດທາງພື້ນຖານໂດຍລວມທີ່ຊຸກຍູ້ການພັດທະນາທ່າມກາງສະພາບການໝັ້ນທ່ຽງ, ລົງເລິກການປະຕິຮູບໂຄງປະກອບການສະໜອງການຄ້າກັບຕ່າງປະເທດ, ຕິດຕາມສະຖານະການຄວາມຂັດແຍ້ງທາງການຄ້າລະຫວ່າງຈີນ-ອາເມຣິກາຢ່າງໃກ້ຊິດ, ສ້າງສະພາບແວດລ້ອມທາງການຄ້າໃຫ້ມີຄວາມສະດວກຫຼາຍຂຶ້ນກວ່າເກົ່າ, ປັບປຸງສະພາບແວດລ້ອມທາງການຄ້າທີ່ເອື້ອອຳນວຍໃຫ້ແກ່ວິສາຫະກິດດຳເນີນທຸລະກິດກັບຕ່າງປະເທດ, ຮ່ວມກັບປະເທດຕ່າງໆໃນໂລກປົກປັກຮັກສາກະຕິກາການຄ້າເສລີ ແລະ ລະບົບການຄ້າຫຼາຍຝ່າຍ, ຄັດຄ້ານລັດທິເຈົ້າມະຫາອຳນາດທາງການຄ້າ ແລະ ປົກປັກຮັກສາຜົນປະໂຫຍດຕົ້ນຕໍຂອງຊາດ ແລະ ຜົນປະໂຫຍດພື້ນຖານຂອງປະຊາຊົນຢ່າງແທ້ຈິງ.
ຄຳເຫັນ
0