ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 23 ກັນຍານີ້, ແມ່ນວັນຊິ່ວເຟິ່ນໃນ 24 ຈຸດແບ່ງລະດູການທາງຈັນທະຄະຕິຈີນ, ນັບແຕ່ມື້ນີ້ເປັນຕົ້ນໄປ, ກໍເລີ່ມເຂົ້າສູ່ລະດູໃບໄມ້ຫຼົ່ນຢ່າງເປັນທາງການ, ໃນວັນຊິ່ວເຟິ່ນປີນີ້, ຈີນຍັງໄດ້ຕ້ອນຮັບວັນເກັບກ່ຽວຢ່າງອຸດົມສົມບູນຂອງຊາວກະສິກອນຄັ້ງທຳອິດ, ນີ້ແມ່ນຈີນຕັ້ງວັນບຸນທົ່ວປະເທດໃຫ້ຊາວກະສິກອນໂດຍສະເພາະເປັນຄັ້ງທຳອິດ. ຢູ່ແຫ່ງຕ່າງໆຂອງຈີນໄດ້ຈັດກິດຈະກຳຕ່າງໆທີ່ມີສີສັນພິເສດກ່ຽວກັບວັດທະນະທຳການປູກຝັງແລະການເກັບກ່ຽວຢ່າງອຸດົມສົມບູນ, ເພື່ອໃຫ້ຊາວກະສິກອນມ່ວນຊື່ນນຳກັນ. ວັນເກັບກ່ຽວຢ່າງອຸດົມສົມບູນຂອງຊາວກະສິກອນຄັ້ງທຳອິດນີ້ຍັງຖືກຄົນທັງຫຼາຍເອີ້ນວ່າ ການິໂວ(carnival)ກະສິກຳ, ງານມ່ວນຊື່ນຂອງຊາວກະສິກອນ ແລະງານວາງສະແດງໝາກຜົນການເກັບກ່ຽວ. ກິດຈະກຳສະຫຼອງນອກຈາກຈັດຂຶ້ນຢູ່ນະຄອນຫຼວງປັກກິ່ງແລ້ວ, ຍັງມີສະຖານທີ່ຈັດງານອີກ 6 ແຫ່ງທີ່ສາມາດເປັນຕົວແທນຂອງອະລິຍະທຳກະສິກຳຈີນ.
ວົງການຕ່າງໆໃນສັງຄົມຈີນບໍ່ພຽງແຕ່ໃຫ້ຄວາມສົນໃຈແກ່ຜະລິດຕະພັນກະສິກຳທີ່ມີສີສັນພິເສດຂອງແຫ່ງຕ່າງໆ ແລະສັນລະເສີນໂສມໜ້າໃໝ່ຂອງຊາວກະສິກອນໃໝ່ໃນຍຸກໃໝ່ເທົ່ານັ້ນ, ສຳຄັນກວ່ານັ້ນແມ່ນ ຍັງໄດ້ປະກອບສ່ວນເຂົ້າໃນການເລັ່ງລັດການພັດທະນາດ້ານກະສິກຳແລະຊົນນະບົດ. ການເກັບກ່ຽວຢ່າງອຸດົມສົມບູນຈະສ້າງຄວາມຮັ່ງມີໃຫ້ແກ່ຊາວກະສິກອນຫຼາຍຮ້ອຍລ້ານຄົນ. ການຮັບປະກັນໃຫ້ປະຊາຊົນຜູ້ທຸກຍາກຢູ່ຊົນນະບົດຈີນຫຼຸດພົ້ນອອກຈາກຄວາມທຸກຍາກ ແລະໃຫ້ເມືອງທຸກຍາກແຫ່ງຕ່າງໆຫຼຸດພົ້ນອອກຈາກຄວາມທຸກຍາກທັງໝົດ, ກໍແມ່ນເປົ້າໝາຍພື້ນຖານຂອງຈີນໃນການສ້າງສັງຄົມທີ່ອີ່ມໜຳສຳລານຢ່າງຮອບດ້ານ.
ຄຳເຫັນ
0