ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວາລາສານທຸລະກິດລາຍອາທິດບຼຸມເບີກ ຫຼື Bloomberg Businessweek ຂອງອາເມຣິກາໄດ້ລາຍງານຫວ່າງມໍ່ໆມານີ້ວ່າ: ຝ່າຍຈີນໄດ້ຝັງຊິບຂະໜາດນ້ອຍໆຊະນິດໜຶ່ງເຂົ້າໃສ່ຜະລິດຕະພັນຂອງບໍລິສັດອາເມຣິກາປະມານ 30 ແຫ່ງເພື່ອຫວັງຈະສືບເອົາຂ່າວລັບ. ແຕ່ບໍລິສັດທີ່ກ່ຽວຂ້ອງຕາມການລາຍງານຂ່າວດັ່ງກ່າວ ເຊັ່ນ: ແອບເປີນ, ອາເມຊອນ ເປັນຕົ້ນຕ່າງກໍອອກຖະແຫຼງການຢ່າງວ່ອງໄວ ໂດຍໄດ້ປະຕິເສດວ່າຜະລິດຕະພັນຂອງບໍລິສັດຕົນບໍ່ໄດ້ຖືກຝັງຊິບເຂົ້າໄປຂ້າງໃນຕາມທີ່ເປັນຂ່າວ ແລະ ຕຳໜິການລາຍງານຂ່າວດັ່ງກ່າວທີ່ບໍ່ມີມູນຄວາມຈິງແຕ່ປະການໃດ.
ຖະແຫຼງການຂອງບໍລິສັດແອບເປີນ ລະບຸວ່າ: ໃນໜຶ່ງປີຜ່ານມາ, ບຼຸມເບິກ ໄດ້ລາຍງານຂ່າວຫຼາຍເທື່ອວ່າເກີດເຫດການຄວາມບໍ່ປອດໄພທີ່ກ່ຽວພັນເຖິງບໍລິສັດແອບເປີນ ແຕ່ທາງບໍລິສັດຕົນບໍ່ເຄີຍຄົ້ນພົບຊິບຕາມເຈຕະນາຮ້າຍ, ຮ່ອງຮອຍຄວບຄຸມຮາດແວ ຫຼື ຊ່ອງຫວ່າງທີ່ຖືກຝັງໄວ້ໃນເຊີເວີຈັກເທື່ອ ແລະ ກໍບໍ່ເຄີຍພົວພັນກັບສຳນັກງານສືບສວນແຫ່ງຊາດສະຫະລັດ(FBI) ຫຼື ອົງການປະຕິບັດກົດໝາຍອື່ນໆຂອງອາເມຣິກາຍ້ອນເຫດການຄ້າຍຄືທີ່ກ່າວມານັ້ນຈັກເທື່ອ. ນອກນີ້, ບໍລິສັດແອບເປີນ ຍັງໄດ້ສົ່ງຈົດໝາຍເຖິງລັດຖະສະພາອາເມຣິກາ ໂດຍຖະແຫຼງອີກເທື່ອໜຶ່ງວ່າ: ຕົນບໍ່ເຄີຍຄົ້ນພົບຫຼັກຖານໃດໆເພື່ອເປັນການຢັ້ງຢືນບັນຫາຄວາມປອດໄພໃນການລາຍງານຂ່າວຂອງບຼຸມເບີກຈັກເທື່ອເລີຍ.
ຂະນະທີ່ບໍລິສັດອາເມຊອນ ກໍໄດ້ອອກຖະແຫຼງການວ່າ: ການລາຍງານຂ່າວຂອງບຼຸມເບິກບໍ່ຖືກຕ້ອງຕາມຄວາມເປັນຈິງ. ອາເມຊອນບໍ່ເຄີຍຄົ້ນພົບຫຼັກຖານໃດໆທີ່ກ່ຽວພັນເຖິງການປ່ຽນແປງຮາດແວ ຫຼື ຝັງຊິບເຂົ້າໃສ່ດ້ວຍເຈຕະນາຮ້າຍ ໃນ mainboard ຂອງຜະລິດຕະພັນບໍລິສັດຕົນຈັກເທື່ອ ແລະ ກໍບໍ່ມີການຮ່ວມມືກັບລັດຖະບານເພື່ອສືບສວນເຫດການດັ່ງກ່າວຈັກເທື່ອເລີຍ. ຖະແຫຼງການຍັງລະບຸຕື່ມວ່າ: ເນື້ອໃນກ່ຽວກັບບໍລິສັດອາເມຊອນໃນການລາຍງານຂ່າວທີ່ກ່ຽວຂ້ອງນັ້ນມີຄວາມຜິດພາດຈົນນັບບໍ່ຖ້ວນ.
ນອກນີ້, ບໍລິສັດທຸລະກິດໂທລະຄົມການສື່ສານອີກ 3 ແຫ່ງຂອງອາເມຣິກາ ຄື ບໍລິສັດ AT&T Inc, ບໍລິສັດສະປຣິນ ຄອບ(Sprint Corp) ແລະ ບໍລິສັດເວີຣີຊອນ(Verizon) ຕ່າງກໍໄດ້ອອກຖະແຫຼງການ ເພື່ອປະຕິເສດຂ່າວກ່ຽວກັບຜະລິດຕະພັນຂອງບໍລິສັດຕົນມີຮາດແວຖືກຫຼິ້ນຕຸກຕິກ.
ຄຳເຫັນ
0