ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມສຸດຍອດຈີນ-ອາຊຽນຄັ້ງທີ 21 ໄດ້ຈັດຂຶ້ນຢູ່ສິງກະໂປໃນວັນທີ 14 ພະຈິກນີ້. ທ່ານຫຼີເຄີ້ສຽງ ນາຍົກລັດຖະມົນຕີຈີນພ້ອມກັບຜູ້ນຳບັນດາປະເທດອາຊຽນໄດ້ປຶກສາຫາລືແລະຮັບຮອງເອົາເອກະສານ “ວິໄສທັດຄູ່ຮ່ວມຍຸດທະສາດຈີນ-ອາຊຽນ 2030”. ຈີນກາຍເປັນປະເທດຄູ່ເຈລະຈາປະເທດທຳອິດທີ່ໄດ້ຮ່ວມກັບອາຊຽນສ້າງແຜນປະຕິບັດງານວິໄສທັດໄລຍະກາງແລະຍາວກ່ຽວກັບການພົວພັນສອງຝ່າຍ.
ເອກະສານວິໄສທັດປະຊາຄົມອາຊຽນແມ່ນທິດນຳຍຸດທະສາດການພັດທະນາອາຊຽນ ຮອດປີ 2025, ສ່ວນ ວິໄສທັດ ຄູ່ຮ່ວມຍຸດທະສາດຈີນ-ອາຊຽນປີ2030 ທີ່ໄດ້ຜ່ານການຮັບຮອງໃໝ່ໆໃນກອງປະຊຸມຄັ້ງນີ້ໄດ້ກຳນົດວິໄສທັດຄູ່ຮ່ວມຍຸດທະສາດສອງຝ່າຍໄປເຖິງປີ 2030 ເຊິ່ງສະແດງໃຫ້ເຫັນວ່າ ຈີນແລະອາຊຽນໄດ້ເກາະແຂນກັນອອກເດີນທາງອີກຄັ້ງໃໝ່ຫຼັງຈາກໄດ້ເດີນຜ່ານໄລຍະການຮ່ວມມື “ທົດສະວັດຄຳ”ຜ່ານມາ ແລະ “ທົດສະວັດເພັດ”ໃນປັດຈຸບັນ. ແຫຼ່ງເກີດພະລັງຊຸກດັນໃນການວາງແຜນວິໄສທັດລ້ຳຍຸກຄັ້ງນີ້ແມ່ນມາຈາກ 3 ດ້ານຄື
ໜຶ່ງ: ສອງຝ່າຍມີຄວາມມຸ້ງຫວັງຮ່ວມແລະເຊື້ອໝັ້ນຕໍ່ການພັດທະນາຂອງແຕ່ລະຝ່າຍໃນຕໍ່ໜ້າ. ການຮ່ວມມືດ້ານເສດຖະກິດການຄ້າເປັນພື້ນຖານແຫ່ງການພົວພັນຈີນ-ອາຊຽນທີ່ໝັ້ນຄົງຢ່າງສະເໝີຕົ້ນສະເໝີປາຍ ທັງເປັນຍ້ອນສອງຝ່າຍມີຄວາມມຸ້ງຫວັງຮ່ວມແລະເຊື່ອໝັ້ນ ເຊິ່ງກັນແລະກັນ.
ສອງ: ສອງຝ່າຍມີການກະທຳຢ່າງເດັດດ່ຽວໜຽວແໜ້ນໃນການປົກປັກຮັກສາການຄ້າເສລີແລະລັດທິຫຼາຍຝ່າຍຢ່າງສະເໝີຕົ້ນສະເໝີປາຍ. ໃນເວລາແລກປ່ຽນດ້ານເສດຖະກິດການຄ້າກັບປະເທດອາຊຽນ, ຈີນໄດ້ເນັ້ນຫຼັກການຕ່າງຝ່າຍຕ່າງມີຜົນປະໂຫຍດຢ່າງສະເໝີຕົ້ນສະເໝີປາຍ ທັງຜ່ານຈາກຫຼາຍຊ່ອງທາງເປີດຕະຫຼາດຈີນຕໍ່ປະເທດອາຊຽນ ແລະຍົກສູງຊື່ສຽງຂອງສິນຄ້າຈາກປະເທດອາຊຽນ.
ສາມ: ສອງຝ່າຍມີຄວາມໝັ້ນໃຈອັນເກີດມາຈາກການຮ່ວມມືໃນຂົງເຂດຕ່າງໆທີ່ກ້າວເຂົ້າສູ່ລວງເລິກ. ນັບແຕ່ຈີນ-ອາຊຽນສ້າງຕັ້ງສາຍພົວພັນຄູ່ຮ່ວມຍຸດທະສາດ 15 ປີມານີ້, ເຖິງວ່າໃນໄລຍະດັ່ງກ່າວ,ສະຖານະການໃນສາກົນແລະພາກພື້ນມີການປ່ຽນແປງຢ່າງສັບສົນກໍຕາມ, ແຕ່ວ່າການຮ່ວມມືລະຫວ່າງສອງຝ່າຍໃນການສົນທະນາທາງການເມືອງ,ການຮ່ວມມືດ້ານເສດຖະກິດການຄ້າ, ການແລກປ່ຽນວັດທະນະທຳ,ການຮ່ວມມືດ້ານຄວາມໝັ້ນຄົງແລະອື່ນໆໄດ້ມີຄວາມຄືບໜ້າຢ່າງຕໍ່ເນື່ອງ.
ຈີນແລະອາຊຽນເກາະແຂນກັນເລັ່ງລັດມຸ້ງໜ້າສູ່ປີ 2030 ນັ້ນກໍສະແດງໃຫ້ເຫັນວ່າ ອາຊຽນມີຄວາມເຊື່ອໝັ້ນ ຕໍ່ຈີນທີ່ມີການພັດທະນາຢ່າງຍາວນານແລະການເປີດປະຕູຢ່າງຕໍ່ເນື່ອງ ທັງຍອມຮັບ ຈີນໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ. ຄາດວ່າ,ຮອດປີ 2030, ອາຊຽນຈະກາຍເປັນກຸ່ມເສດຖະກິດໃຫຍ່ອັນດັບ 4 ຂອງໂລກ. ການທີ່ສືບຕໍ່ຮັກສາແລະຍົກລະດັບສາຍພັວພັນມິດຕະພາບຈີນ-ອາຊຽນ ບໍ່ພຽງແຕ່ຈະສາມາດເພີ່ມພະລັງແຮງຊຸກດັນການພັດທະນາເສດຖະກິດສັງຄົມຂອງຈີນແລະອາຊຽນຢ່າງຕໍ່ເນື່ອງເທົ່ານັ້ນ, ຍັງຈະສາມາດເຮັດໃຫ້ຈີນແລະອາຊຽນເສີມຂະຫຍາຍບົດບາດໃນວຽກງານສາກົນແລະພາກພື້ນໃຫ້ຫຼາຍຂຶ້ນກວ່າເກົ່າອີກດ້ວຍ.
ຄຳເຫັນ
0