ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 16 ພະຈິກນີ້, ທ່ານສີຈິ້ນຜິງ ປະທານປະເທດຈີນ ໄດ້ພົບປະກັບທ່ານບອບ ດາແດ ຜູ້ສຳເລັດລາຊະການ ແລະ ທ່ານປີເຕີ ໂອເນວ ນາຍົກລັດຖະມົນຕີປາປົວນິວກີເນ ຕາມລຳດັບ ໂດຍຜູ້ນຳສອງປະເທດໄດ້ເປັນເອກະພາບກັນໃນການສ້າງຕັ້ງສາຍພົວພັນຄູ່ຮ່ວມຍຸດທະສາດຮອບດ້ານທີ່ເຄົາລົບເຊິ່ງກັນແລະກັນ ແລະ ພັດທະນາຮ່ວມກັນ.
ທ່ານສີຈິ້ນຜິງ ກ່າວເນັ້ນວ່າ: ຈີນໃຫ້ຄວາມສຳຄັນຢ່າງສູງຕໍ່ສາຍພົວພັນກັບປາປົວນິວກີເນ ຫວັງວ່າການຢ້ຽມຢາມຂອງຂ້າພະເຈົ້າເທື່ອນີ້ຈະມີຜົນດີຕໍ່ການຍົກລະດັບສາຍພົວພັນລະຫວ່າງສອງຝ່າຍ, ຊຸກຍູ້ການຮ່ວມມືທີ່ແທ້ຈິງໃນຂົງເຂດຕ່າງໆລະຫວ່າງສອງປະເທດໃຫ້ໄດ້ຮັບໝາກຜົນຢ່າງຫຼວງຫຼາຍ. ຈີນເດັດດ່ຽວສຸມໃສ່ການເພີ່ມທະວີຄວາມສາມັກຄີແລະການຮ່ວມມືກັບປະເທດໝູ່ເກາະປາຊີຟິກ ລວມທັງປາປົວນິວກີເນ.
ທ່ານ ບອບ ດາແດ ໄດ້ຂອບໃຈຈີນທີ່ໄດ້ໃຫ້ການຊ່ວຍເຫຼືອອັນລ້ຳຄ່າແກ່ປະເທດຕົນໃນການກໍ່ສ້າງພື້ນຖານໂຄງລ່າງ, ການສຶກສາ ແລະຂົງເຂດອື່ນໆທີ່ກ່ຽວຂ້ອງກັບການພັດທະນາແຫ່ງຊາດແລະຊີວິດການເປັນຢູ່ຂອງປະຊາຊົນປະເທດຕົນ ທັງໄດ້ສະໜັບສະໜູນຢ່າງແຂງແຮງຕໍ່ປາປົວນິວກີເນໃນການເປັນເຈົ້າພາບຈັດກອງປະຊຸມບໍ່ເປັນທາງການຂອງອົງການເອເປັກ ປາປົວນິວກີເນຍິນດີສຸມທຸກຄວາມພະຍາຍາມຮ່ວມກັບຈີນເພື່ອຊຸກຍູ້ໃຫ້ສາຍພົວພັນລະຫວ່າງສອງປະເທດກ້າວຂຶ້ນສູ່ລະດັບໃໝ່.
ຂະນະທີ່ທ່ານປີເຕີ ໂອເນວ ກ່າວວ່າ: ປາປົວນິວກີເນຈະຕັ້ງໜ້າເຂົ້າຮ່ວມການສ້າງ “ໜຶ່ງແລວໜຶ່ງເສັ້ນທາງ” ປາປົວນິວກີເນຕີລາຄາສູງທີ່ຈີນຍຶດໝັ້ນລະບຽບການສາກົນບົນພື້ນຖານກະຕິກາໃນກິດຈະການສາກົນ, ຍິນດີເພີ່ມທະວີການປະສານງານກັບຈີນ ແລະ ສະໜັບສະໜູນການລົງເລິກການສົນທະນາລະຫວ່າງປະເທດໝູ່ເກາະປາຊີຟິກ-ຈີນ, ເຊື່ອໝັ້ນວ່າສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດຈະກ້າວເຂົ້າສູ່ລວງເລິກແລະພັດທະນາໃຫ້ໜັກແໜ້ນຢ່າງບໍ່ຢຸດຢັ້ງ ແລະ ຈະຊຸກຍູ້ໃຫ້ເສດຖະກິດ-ສັງຄົມປາປົວນິວກີເນ ພັດທະນາຕື່ມອີກ.
ຄຳເຫັນ
0