ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວ CRI: ວັນທີ 16 ພະຈິກນີ້ ທ່ານສີຈິ້ນຜິງ ປະທານປະເທດ ສປ ຈີນໄດ້ພົບປະແບບລວມໝູ່ກັບຜູ້ນຳບັນດາປະເທດໝູ່ເກາະ ມະຫາສະໝຸດປາຊີຟິກທີ່ສ້າງສາຍພົວພັນທາງການທູດກັບຈີນຢູ່ນະຄອນຫຼວງປອດໂມເຣສບີ ປະເທດປາປົວນິວກີເນ. ການພົວພັນລະຫວ່າງຈີນກັບບັນດາປະເທດໝູ່ເກາະປາຊີຟິກທີ່ສ້າງສາຍພົວພັນທາງການທູດກັນນັ້ນໄດ້ຍົກລະດັບຂຶ້ນເປັນການພົວພັນຄູ່ຮ່ວມຍຸດທະສາດຮອບດ້ານທີ່ຕ່າງເຄົາລົບເຊິ່ງກັນແລະກັນແລະພັດທະນາຮ່ວມກັນ.
ໃນເວລາກ່າວປາໄສໃນການພົບປະ, ທ່ານສີຈິ້ນຜິງຊີ້ອອກວ່າ, ບໍ່ວ່າສະຖານະການໂລກຈະປ່ຽນແປງແນວໃດກໍ່ຕາມ, ຈີນແລະປະເທດປະເທດໝູ່ເກາະປາຊີຟິກກໍເປັນເພື່ອນທີ່ດີທີ່ມີຄວາມຈິງໃຈຕໍ່ກັນແລະຕ່າງເຄົາລົບເຊິ່ງກັນແລະກັນ, ແມ່ນຄູ່ຮ່ວມທີ່ດີທີ່ຮ່ວມກັນພັດທະນາແລະຕ່າງຝ່າຍຕ່າງມີຜົນປະໂຫຍດ, ແມ່ນອ້າຍນ້ອງທີ່ດີແລະສະໜິດສະໜົມກັນ ແລະຕ່າງຮ່ຳຮຽນຖອດຖອນບົດຮຽນເຊິ່ງກັນແລະກັນ. ຈີນຍິນດີຕ້ອນຮັບບັນດາ ປະເທດໝູ່ເກາະປາຊີຟິກພັດທະນາໄປພ້ອມກັບການພັດທະນາຂອງຈີນ.
ທ່ານສີຈິ້ນຜິງໄດ້ສະເໜີມາດຕະການລະອຽດກ່ຽວກັບການລົງເລິກການພົວພັນລະຫວ່າງສອງຝ່າຍຄື: ຈີນຍິນດີຮ່ວມກັບບັນດາປະເທດໝູ່ເກາະຈັດກອງປະຊຸມເວທີປຶກສາຫາລືກ່ຽວກັບການພັດທະນາແລະການຮ່ວມມືດ້ານເສດຖະກິດລະຫວ່າງຈີນ-ປະເທດໝູ່ເກາະມະຫາສະໝຸດປາຊີຟິກຄັ້ງທີ 3 ໃນທ້າຍປີ 2019. ສອງຝ່າຍຄວນຖືການເຊັນສັນຍາຮ່ວມມືກ່ຽວກັບການສ້າງໜຶ່ງແລວໜຶ່ງເສັ້ນທາງເປັນໂອກາດທີ່ດີ, ລົງເລິກການຮ່ວມມືທີ່ແທ້ຈິງ, ສ້າງຄວາມສະດວກທາງການຄ້າຫຼາຍຂຶ້ນ, ຈັດກິດຈະກຳຕ່າງໆກ່ຽວກັບປີທ່ອງທ່ຽວຈີນ-ປະເທດໝູ່ເກາະປາຊີຟິກ 2019 ໃຫ້ດີ, ສະໜັບສະໜູນການຝຶກອົບຮົມຜູ້ມີຄວາມຮູ້ຄວາມສາມາດແລະການສ້າງຄວາມສາມາດຂອງປະເທດໝູ່ເກາະເຫຼົ່ານີ້. ຈີນຍິນດີຮ່ວມກັບບັນດາປະເທດເກາະດອນປົກປັກຮັກສາລັດທິຫຼາຍຝ່າຍແລະລະບຽບການຄ້າເສລີ, ເພີ່ມທະວີການແລກປ່ຽນກັນແລະປະສານງານໃນວຽກງານສາກົນ, ຊຸກຍູ້ການຈັດຕັ້ງປະຕິບັດວາລະການພັດທະນາແບບຍືນຍົງ 2030, ສະໜັບສະໜູນປະເທດໝູ່ເກາະຕ່າງໆໃນການຊຸກຍູ້ຂໍ້ລິເລີ່ມມະຫາສະໝຸດປາຊີຟິກສີຄາມ, ຮ່ວມກັນຊຸກຍູ້ການຈັດຕັ້ງປະຕິບັດສັນຍາປາລີຢ່າງບັງເກີດຜົນ, ຊຸກຍູ້ໃຫ້ທົ່ວໂລກພັດທະນາແບບຍືນຍົງ ສີຂຽວແລະກາກບອນຕ່ຳ.
ຜູ້ນຳບັນດາປະເທດໝູ່ເກາະມະຫາສະໝຸນດປາຊີຟິກກ່າວວ່າ, ບັນດາປະເທດໝູ່ເກາະມະຫາສະໝຸດປາຊີຟິກທະນຸຖະໜອມການພົວພັນຢ່າງໃກ້ຊິດກັບຈີນ, ຍຶດໝັ້ນນະໂຍບາຍຈີນດຽວ, ຂອບໃຈຈີນທີ່ໄດ້ໃຫ້ການຊ່ວຍເຫຼືອທີ່ບໍ່ຕິດຫ້ອຍເງື່ອນໄຂການເມືອງແຕ່ຢ່າງໃດໃນເວລາດົນນານມານີ້, ແລະຮູ້ສຶກປິດຕິຊົມຊື່ນທີ່ໄດ້ເຫັນການພົວພັນສອງຝ່າຍໄດ້ຍົກລະດັບຂຶ້ນເປັນການພົວພັນຄູ່ຮ່ວມຍຸດທະສາດຮອບດ້ານທີ່ເຄົາລົບກັນແລະພັດທະນາຮ່ວມກັນ, ຍິນດີຕັ້ງໜ້າເຂົ້າຮ່ວມການສ້າງໜຶ່ງແລວໜຶ່ງເສັ້ນທາງຮ່ວມກັນ, ເພີ່ມທະວີການຮ່ວມມືກັບຈີນໃນຂົງເຂດການຄ້າ, ການລົງທຶນ, ການປະມົງ, ການທ່ອງທ່ຽວ ແລະການກໍ່ສ້າງພື້ນຖານໂຄງລ່າງ, ເພື່ອພັດທະນາເສດຖະກິດສັງຄົມຂອງປະເທດຕົນ.
ຄຳເຫັນ
0