ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 11ທັນວານີ້,ເຈົ້າໜ້າທີ່ກອງທັບອາເມຣິກາໄດ້ສົ່ງ ລະຄັງໃຫຍ່ 3 ໜ່ວຍຄືນໃຫ້ຟີລິບປິນຢ່າງເປັນທາງການ ເຊິ່ງລະຄັງໃຫຍ່ເຫຼົ່ານີ້ແມ່ນທະຫານອາເມຣິກາຍຶດເອົາຈາກເມືອງບາລາງອີກາໃນສະໄໝທະຫານອາເມຣິກາຍຶດຄອງຟີລິບປິນເມື່ອປີ 1901
ໃນພິທີມອບຮັບທີ່ຈັດຂຶ້ນຢູ່ຖານທັບວີລາໂມ ນະຄອນຫຼວງມານີລາທີ່ຈັດຂຶ້ນໃນວັນທີ 11 ທັນວານີ້, ທ່ານເດວຟິນ ໂລເຣນຊານາ ລັດຖະມົນຕີກະຊວງປ້ອງກັນປະເທດຟີລິບປິນແລະເຈົ້າໜ້າທີ່ທ່ານອື່ນໆໄດ້ກວດເບິ່ງລະຄັງໃຫຍ່ຢ່າງລະອຽດຄັກແນ່ແລ້ວລົງນາມໃນໃບຢັ້ງຢືນມອບຮັບ.
ເປັນເວລາກວ່າ 100 ປີຜ່ານມາ, ທາງການຕະຫຼອດຮອດພາກສ່ວນເອກະຊົນຟີລິບປິນຕ່າງກໍຮຽກຮ້ອງ ໃຫ້ອາເມຣິກາສົ່ງຄືນລະຄັງໃຫຍ່. ພາຍຫຼັງທ່ານໂຣດຣີໂກ ດູເຕີເຕຂຶ້ນດຳລົງຕຳແໜ່ງປະທານາທິບໍດີຟີລິບປິນແລ້ວ, ໄດ້ກ່າວໂຈມຕີຢ່າງເປີດເຜີຍ ຫຼາຍເທື່ອກ່ຽວກັບໂທດກຳຂອງອາເມຣິກາທີ່ກໍ່ຂຶ້ນຢູ່ຟີລິບປິນ ທັງເລັ່ງທວງໃຫ້ອາເມຣິກາຕ້ອງສົ່ງຄືນລະຄັງໃຫຍ່ໂດຍໄວ. ເດືອນກໍລະກົດປີ 2017, ໃນເວລາຂຶ້ນຜ່ານບົດລາຍງານວຽກງານລັດຖະບານ, ທ່ານດູເຕີເຕໄດ້ຮຽກຮ້ອງໃຫ້ອາເມຣິກາສົ່ງລະຄັງບາລາງອີກາຄືນໃຫ້ຟີລິບປິນຢ່າງເປັນທາງການ, ທ່ານກ່າວວ່າ ຄຸນຄ່າທາງປະຫວັດສາດຂອງລະຄັງບູຮານສາມາດເຕືອນໃຫ້ປະຊາຊົນຟີລິບປິນຮັບຮູ້ວ່າ ປູ່ຍ່າຕາຍາຍພວກເຮົາເຄີຍໄດ້ຕໍ່ຕ້ານພວກລາເມືອງຂຶ້ນອາເມຣິກາຢ່າງອົງອາດກ້າຫານດ້ວຍຄວາມເສຍສະຫຼະ. ເດືອນພະຈິກປີ 2018, ທ່ານເຈມສ ນໍແມນ ມາຕິສ ລັດຖະມົນຕີກະຊວງປ້ອງກັນປະເທດອາເມຣິກາໄດ້ປະກາດຢ່າງເປັນທາງການວ່າຈະສົ່ງລະຄັງໃຫຍ່ຄືນໃຫ້ຟີລິບປິນ.
ຫຼັງພິທີມອບ-ຮັບ, ລະຄັງໃຫຍ່ 3 ໜ່ວຍດັ່ງກ່າວຈະນຳໄປວາງສະແດງຢູ່ຫໍພິພິດທະພັນຖານທັບຟີລິບປິນຊົ່ວຄາວເພື່ອໃຫ້ປະຊາຊົນເຂົ້າຊົມໂດຍບໍ່ເກັບຄ່າ, ຄາດວ່າຈະສົ່ງຄືນເມືອງບາລາງອີກາໃນວັນທີ 15 ທັນວານີ້.
ຄຳເຫັນ
0