ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 10 ກຸມພານີ້ພໍດີຖືກກັບວັນຂຶ້ນຫົກຄ່ຳເດືອນຈຽງຕາມຈັນທະຄະຕິຈີນ ໃນວັນດັ່ງກ່າວ, ມີມວນຊົນ 7 ແສນຄົນໄດ້ເຕົ້າໂຮມກັນຢູ່ສະໜາມຫຼວງຕຣາຟັນກາ ນະຄອນລອນດອນ ປະເທດອັງກິດ ເພື່ອເຂົ້າຮ່ວມພິທີສະເຫຼີມສະຫຼອງບຸນກຸດຈີນປີກຸນ ລວມທັງການຊົມການແຫ່ຂະບວນ, ເບິ່ງການສະແດງ ຫຼື ເຂົ້າຮ່ວມລາຍການຕ່າງໆ ເພື່ອສຳຜັດກັບບຸນປີໃໝ່ຈີນຢ່າງໃກ້ຊິດທີ່ສຸດ.
ການແຫ່ຂະບວນລວມມີ 50 ກວ່າຂະບວນລວມທັງລົດໂຖດອກໄມ້ ເຊິ່ງໄດ້ສ້າງສະຖິຕິໃໝ່ເມື່ອທຽບກັບທຸກປີຜ່ານມາ. ຫຼັງສິ້ນສຸດການແຫ່ຂະບວນ ກໍໄດ້ເລີ່ມຕົ້ນພິທີສະເຫຼີມສະຫຼອງຢູ່ສະໜາມຫຼວງດັ່ງກ່າວຢ່າງເປັນທາງການ ໂດຍພິທີກອນໄດ້ອ່ານສານອວຍພອນຂອງພະລາຊີນີເອລີຊາເບັດລັດຊະການທີ 2 ແລະ ທ່ານນາງເທເຣຊາ ເມ ນາຍົກລັດຖະມົນຕີອັງກິດທີ່ໄດ້ສົ່ງຄຳອວຍພອນງານດັ່ງກ່າວ, ຂະນະທີ່ທ່ານຫຼິວສຽວໝິງ ເອກອັກຄະລັດຖະທູດຈີນປະຈຳອັງກິດ ກໍໄດ້ກ່າວປາໄສວ່າ: ບຸນກຸດຈີນນັບມື້ກໍກາຍເປັນວັນບຸນຮ່ວມກັນຂອງປະຊາຊົນຈີນແລະປະຊາຊົນອັງກິດ ແລະ ກໍກາຍເປັນກິດຈະກຳອາລະຍະທຳຈີນແລະຕາເວັນຕົກຕ່າງຖອດຖອນບົດຽນເຊິ່ງກັນແລະກັນ ທັງເປັນງານມະໂຫລານທີ່ເສີມຂະຫຍາຍມິດຕະພາບລະຫວ່າງຈີນ-ອັງກິດ. ນອກນີ້, ທ່ານຫຼິວສຽວໝິງກໍໄດ້ສະແດງຄວາມຂອບໃຈເປັນພິເສດຕໍ່ອຳນາດການປົກຄອງທ້ອງຖິ່ນທີ່ໄດ້ໃຫ້ຄວາມສຳຄັນແລະສະໜັບສະໜູນຕໍ່ກິດຈະກຳສະເຫຼີມສະຫຼອງດັ່ງກ່າວ ລວມທັງສະມາຄົມການຄ້າຊາວຈີນຢູ່ນະຄອນຫຼວງລອນດອນທີ່ໄດ້ພະຍາຍາມກຽມຄວາມພ້ອມໃນການຈັດງານດັ່ງກ່າວ.
ຄຳເຫັນ
0