ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 26 ມິຖຸນານີ້, ທ່ານໂບຣິສ ຊະເມເລຟ ຫົວໜ້າສູນນະໂຍບາຍການຕ່າງປະເທດຣັດເຊຍ ຂອງສະຖາບັນເສດຖະກິດທີ່ຂຶ້ນກັບສະຖາບັນວິທະຍາສາດຣັດເຊຍ ໄດ້ກ່າວໃນຂະນະທີ່ເຂົ້າຮ່ວມກອງປະຊຸມສຳມະນາສາກົນຄັງປັນຍາປະເທດບຣິກສ໌ທີ່ດຳເນີນຢູ່ນະຄອນຫຼວງປັກກິ່ງວ່າ: ບົດຮຽນຂອງຈີນເປັນໜ້າຖອດຖອນຮ່ຳຮຽນນຳ ແຕ່ນະໂຍບາຍ “ອາເມຣິກາຕ້ອງມາກ່ອນ” ຈະປະສົບຄວາມຫຼົ້ມເຫຼວຢ່າງແນ່ນອນ.
ທ່ານໂບຣິສ ຊະເມເລຟ ຊີ້ໃຫ້ເຫັນວ່າ: ການບໍລິຫານໂລກແມ່ນໝາຍເຖິງປະເທດສະມາຊິກທັງໝົດນຳໃຊ້ມາດຕະການແກ້ໄຂທີ່ສົມຄູ່ກັນຕໍ່ກັບບັນຫາສາກົນທີ່ຕ່າງກັນ ບົນພື້ນຖານປຶກສາຫາລືກັນ; ຂະນະທີ່ລັດທິຫຼາຍຝ່າຍກໍຄືຝ່າຍຕ່າງໆປຶກສາຫາລືກັນບົນພື້ນຖານສະເໝີພາບກັນ ເພື່ອແກ້ໄຂບັນຫາສາກົນແລະພາກພື້ນ ແລະ ແບກຫາບຄວາມຮັບຜິດຊອບທີ່ສົມຄູ່ກັນ. ແຕ່ອາເມຣິກາພັດສະກັດກັ້ນທ່າອ່ຽງໂລກາພິວັດ, ປະຕິບັດນະໂຍບາຍ “ອາເມຣິກາຕ້ອງມາກ່ອນ” ເຊິ່ງນະໂຍບາຍທີ່ເຫັນແກ່ຕົວດັ່ງກ່າວບໍ່ອາດຈະສ້າງຜົນດີໃຫ້ແກ່ປະຊາຊົນອາເມຣິກາແຕ່ຢ່າງໃດ ທັງຈະປະສົບຄວາມຫຼົ້ມເຫຼວຢ່າງແນ່ນອນໃນທີ່ສຸດ. ກົງກັນຂ້າມກັບການກະທຳຂອງອາເມຣິກາ, ຈີນໄດ້ຍຶດໝັ້ນການເປີດປະຕູສູ່ພາຍນອກ, ການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ ເຊິ່ງບໍ່ພຽງແຕ່ຈະມີຜົນດີຕໍ່ຈີນໃນການພັດທະນາປະເທດຕົນເທົ່ານັ້ນ ຂະນະດຽວກັນ, ກໍໄດ້ຊຸກຍູ້ການພັດທະນາຂອງປະເທດອື່ນໆອີກດ້ວຍ.
ທ່ານໂບຣິສ ຊະເມເລຟ ຮຽກຮ້ອງໃຫ້ປະເທດພວມພັດທະນາຈົ່ງຕັ້ງໜ້າຖອດຖອນບົດຮຽນການພັດທະນາຂອງຈີນ ໂດຍກ່າວວ່າ: ຈີນໄດ້ເສີມຂະຫຍາຍບົດບາດທີ່ສຳຄັນໃນການສ້າງລະບົບສາຍພົວພັນສາກົນແບບໃໝ່, ຂໍ້ລິເລີ່ມການສ້າງປະຊາຄົມຮ່ວມຊາຕາກຳມວນມະນຸດ ແລະ ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຂອງຜູ້ນຳຈີນໄດ້ສະໜອງແຜນການແກ້ໄຂສິ່ງທ້າທາຍຮ່ວມແລະບັນຫາຕ່າງໆທີ່ມວນມະນຸດພວມຜະເຊີນຢູ່.
ຄຳເຫັນ
0