ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານຊັນວາດໍ ປາເນໂລ ຫົວໜ້າທີ່ປຶກສາດ້ານກົດໝາຍ ທັງເປັນໂຄສົກປະທານາທິບໍດີຟິລິບປິນ ໄດ້ກ່າວໃນກອງປະຊຸມຖະແຫຼງຂ່າວຂອງທຳນຽບປະທານາ ທິບໍດີໃນວັນທີ 16 ກໍລະກົດນີ້ວ່າ: ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນພວມພິຈາລະນາຢ່າງຈິງຈັງໃນການຕັດສາຍພົວພັນທາງການທູດກັບອິດສະລັງ.
ກອງປະຊຸມສະພາສິດທິມະນຸດຂອງອົງການສະຫະປະຊາຊາດສະໄໝສາມັນຄັ້ງທີ 41 ໄດ້ຈັດຂຶ້ນຢູ່ນະຄອນເຊີແນວ ປະເທດສະວິສ ແຕ່ວັນທີ 24 ມິຖຸນາຫາວັນທີ 12 ກໍລະກົດນີ້ ແລະກອງປະຊຸມໃນວັນທີ 11 ກໍລະກົດນີ້ໄດ້ຮັບຮອງເອົາຮ່າງມະຕິທີ່ຍື່ນໂດຍອິດສະລັງແລະປະເທດອື່ນໆ ໂດຍຮຽກຮ້ອງໃຫ້ຫ້ອງການສິດທິມະນຸດຂອງອົງການສະຫະປະຊາຊາດຍື່ນບົດລາຍງານກ່ຽວກັບບັນຫາສິດທິມະນຸດຂອງຟິລິບປິນຮອບດ້ານສະບັບໜຶ່ງໃນເດືອນມິຖຸນາປີໜ້າ ເພື່ອສືບສວນການກະທຳຂອງຟິລິບປິນທີ່ລ່ວງລະເມີດສິດທິມະນຸດໃນການປາບປາມຢາເສບຕິດ.
ທ່ານປາເນໂລ ກ່າວຕື່ມວ່າ: ທ່ານປະທານາທິບໍດີດູເຕີເຕເຫັນວ່າ ມະຕິດັ່ງກ່າວໄດ້ສ້າງຂຶ້ນບົນພື້ນຖານຂໍ້ມູນຂ່າວສານທີ່ຜິດພາດ ແລະ ຕົວເລກທີ່ບໍ່ໄດ້ຜ່ານການກວດສອບແລະຢືນຢັນຈາກທາງການ, ມີຄວາມລຳອຽງ, ມີຄວາມຄັບແຄບທັງມີເຈຕະນາຮ້າຍ.
ທ່ານປາເນໂລ ຍັງກ່າວຕື່ມອີກວ່າ: ເຖິງວ່າມະຕິດັ່ງກ່າວບໍ່ມີຄວາມຜູກມັດກໍຕາມ ແຕ່ກໍມີຄວາມຈຳເປັນຕ້ອງມີການຕອບໂຕ້ຕໍ່ເລື່ອງນີ້ ເພາະວ່າມັນເປັນການແຊກແຊງວຽກງານພາຍໃນຢ່າງໜຶ່ງຈາກອິດສະລັງຢ່າງຈະແຈ້ງ.
ຄຳເຫັນ
0