ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວສານຈີນ: ວັນທີ 16 ກໍລະກົດນີ້ ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທໄດ້ນຳພາສະມາຊິກຄະນະລັດຖະບານຊຸດໃໝ່ສາບານຕົວຂຶ້ນຮັບຕຳແໜ່ງຕໍ່ສົມເດັດມະຫາ ວະຊິລະລົງກອນ ເຈົ້າຊີວິດໄທ. ເຊິ່ງໝາຍຄວາມວ່າ ຄະນະຮັກສາຄວາມສະຫງົບແຫ່ງຊາດແລະຄະນະລັດຖະບານຊຸດເກົ່າທີ່ບໍລິຫານປະເທດໄທມາເປັນເວລາ 5 ປີໄດ້ຖືກຍົກເລີກອັດຕະໂນມັດແຕ່ວັນທີ 16 ກໍລະກົດນີ້ເປັນຕົ້ນໄປ.
ຕອນບ່າຍມື້ດຽວກັນ, ສະມາຊິກຄະນະລັດຖະບານຊຸດໃໝ່ໄດ້ນຸ່ງຊຸດສີຂາວມາເຖິງສຳນັກງານນາຍົກລັດຖະມົນຕີຂອງໄທ, ແລະຖ່າຍຮູບລວມກັນຢູ່ຕໍ່ໜ້າຕຶກລັດຖະບານ. ຫລັງຈາກນັ້ນ, ໄດ້ເດີນທາງໄປພະລາຊະວັງ ເພື່ອສາບານຕົວຂຶ້ນຮັບຕຳແໜ່ງຕໍ່ເຈົ້າຊີວິດໂດຍອີງຕາມລັດຖະທຳມະນູນ, ແລະເລີ່ມປະຕິບັດໜ້າທີ່ຕຳແໜ່ງໃນການບໍລິຫານປະເທດ.
ຕອນຄ່ຳວັນທີ 15 ກໍລະກົດນີ້, ທ່ານປຣະຍຸດກ່າວຄຳປາໃສທາງໂທລະພາບວ່າ: ຕົນຈະສີ້ນສຸດການເປັນຫົວໜ້າຄະນະຮັກສາຄວາມສະຫງົບແຫ່ງຊາດຂອງຕົນທີ່ປະຕິບັດມາເປັນເວລາ 5 ປີ. ທ່ານກ່າວວ່າ, ເລີ່ມແຕ່ຄະນະລັດຖະບານຊຸດໃໝ່ສາບານຕົວຂຶ້ນຮັບຕຳແໜ່ງແລ້ວ, ຄະນະຮັກສາຄວາມສະຫງົບແຫ່ງຊາດແລະລັດຖະບານຊຸດເກົ່າທີ່ທ່ານນຳພານັ້ນຈະສິ້ນສຸດພາລະໜ້າທີ່ພ້ອມກັນ, ປະເທດໄທຈະເຂົ້າສູ່ຍຸກປະຊາທິປະໄຕຢ່າງແທ້ຈິງທີ່ມີເຈົ້າຊີວິດເປັນປະມຸກ.
ຄຳເຫັນ
0