ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສູນການແລກປ່ຽນເສດຖະກິດສາກົນຈີນ ແລະສະຫະພັນສະພາການຄ້າອາເມຣິກາໄດ້ເປັນເຈົ້າພາບຮ່ວມກັນຈັດການພົບປະເຈລະຈາລະຫວ່າງນັກທຸລະກິດຈີນ-ອາເມຣິກາທີ່ໄດ້ສິ້ນສຸດລົງຢູ່ນະຄອນຫຼວງປັກກິ່ງຈີນໃນວັນທີ 11 ກັນຍາຜ່ານມາ. ໃນກອງປະຊຸມຖະແຫຼງຂ່າວ, ທ່ານເວີ້ຍຈ້ຽນໂກ ຮອງຫົວໜ້າສູນການແລກປ່ຽນເສດຖະກິດສາກົນຈີນກ່າວວ່າ: ໃນໄລຍະຈັດການພົບປະເຈລະຈາດັ່ງກ່າວ, ນັກທຸລະກິດຈີນ ແລະອາເມຣິກາໄດ້ບັນລຸຄວາມເຫັນເປັນເອກະພາບກັນ, ຍິນດີສ້າງຄວາມສາມັກຄີກັນ ແລະຮ່ວມມືກັນ ເພື່ອຮັບມືກັບຄວາມຂັດແຍ້ງດ້ານການຄ້າ, ສອງຝ່າຍມີຄວາມຄິດເຫັນໃນແງ່ດີຕໍ່ການພັດທະນາສາຍພົວພັນເສດຖະກິດ-ການຄ້າລະຫວ່າງຈີນ ແລະອາເມຣິກາ.
ທ່ານກ່າວຕື່ມວ່າ: ເສດຖະກິດ-ການຄ້າລະຫວ່າງຈີນ ແລະອາເມຣິກາມີຂໍ້ເຫັນຂັດແຍ້ງກັນ, ຕ້ອງແກ້ໄຂດ້ວຍການເຈລະຈາບົນພື້ນຖານຄວາມສະເໝີພາບ ແລະເຄົາລົບເຊິ່ງກັນ ແລະກັນ. ສອງຝ່າຍຄວນບຸກເບີກຊ່ອງທາງການຮ່ວມມືໃໝ່.
ທ່ານໄມເຣິນ ບຣີນລີສ ຮອງປະທານຜູ້ປະຈຳການ ທັງເປັນປະທານວຽກງານສາກົນຂອງສະຫະພັນສະພາການຄ້າອາເມຣິກາກ່າວເນັ້ນວ່າ: ທ່ານຈະເດັດດ່ຽວຄັດຄ້ານລັດທິປົກປ້ອງຕ່າງໆ ແລະມາດຕະການຂຶ້ນພາສີແຕ່ຝ່າຍດຽວ. ຫວັງວ່າການເຈລະຈາຄັ້ງນີ້ຈະສາມາດປະກອບສ່ວນເຂົ້າໃນການປັບປຸງສາຍພົວພັນສອງຝ່າຍ. ສະຫະພັນສະພາການຄ້າອາເມຣິກາຍິນດີສືບຕໍ່ເສີມຂະຫຍາຍບົດບາດອັນຕັ້ງໜ້າເຂົ້າໃນການເພີ່ມທະວີຄວາມເຂົ້າໃຈເຊິ່ງກັນ ແລະກັນລະຫວ່າງສອງຝ່າຍ.
ຄຳເຫັນ
0