ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສະພາການຄ້າແລະການພັດທະນາຂອງສະຫະປະຊາຊາດທີ່ມີສຳນັກງານໃຫຍ່ຢູ່ເຊີແນວປະເທດສະວິສຈະສົ່ງຄະນະຜູ້ແທນເຂົ້າຮ່ວມງານວາງສະແດງການນຳເຂົ້າສາກົນຈີນຄັ້ງທີ 2. ກ່ອນອອກເດີນທາງ, ທ່ານມຸກີຊາ ກິຕູຍີ, ເລຂາທິການໃຫຍ່ສະພາການຄ້າແລະການພັດທະນາສະຫະປະຊາຊາດໄດ້ໃຫ້ສຳພາດຕໍ່ນັກຂ່າວສະຖານີວິທະຍຸໂທລະພາບສູນກາງຈີນ. ໂດຍກ່າວວ່າ, ຈີນຈະຈັດງານວາງສະແດງການນຳເຂົ້າສາກົນຈີນໃຫ້ເປັນເວທີໃໝ່ໃນການສົ່ງອອກຂອງບັນດາປະເທດ, ທົ່ວໂລກໄດ້ໃຫ້ຄວາມສົນໃຈຕໍ່ງານດັ່ງກ່າວ.
ທ່ານມຸກີຊາ ກິຕູຍີກ່າວວ່າ, ປີນີ້ມີປະເທດຫຼາຍກວ່າເກົ່າຈະເຂົ້າຮ່ວມງານວາງສະແດງການນຳເຂົ້າສາກົນຈີນ ເຊິ່ງໄດ້ຢັ້ງຢືນໃຫ້ເຫັນວ່າ ງານວາງສະແດງການນຳເຂົ້າສາກົນໃນປີກາຍນີ້ໄດ້ຮັບໝາກຜົນຫຼາຍ. ຫຼາຍປະເທດທີ່ພວມພັດທະນາມີຊ່ອງທາງຈຳກັດໃນການເຂົ້າສູ່ຕະຫຼາດຕົ້ນຕໍຂອງໂລກ, ສະນັ້ນ ການທີ່ຈີນນຳເຂົ້າສິນຄ້າຈາກປະເທດທີ່ພວມພັດທະນາໂດຍຜ່ານງານວາງສະແດງການນຳເຂົ້າສາກົນ ກໍ່ສ່ອງແສງໃຫ້ເຫັນເຖິງຄວາມປາຖະໜາດີໃນການສະແຫວງຫາຄວາມສາມັກຄີແລະມິດຕະພາບ.
ທ່ານມຸກີຊາ ກິຕູຍີກ່າວຕື່ມວ່າ, ປັດຈຸບັນ ລັດທິປົກປ້ອງການຄ້າໄດ້ເກີດຂຶ້ນ, ແລະໄດ້ກະທົບເຖິງຕ່ອງໂສ້ການສະໜອງຂອງທົ່ວໂລກ. ແຕ່ງານວາງສະແດງການນຳເຂົ້າສາກົນພັດໄດ້ສ້າງເວທີໃຫ້ແກ່ຝ່າຍຕ່າງໆເພື່ອໄດ້ຮັບຜົນປະໂຫຍດຮ່ວມກັນ, ແລະຊຸກຍູ້ການຄ້າຫຼາຍຝ່າຍ, ນີ້ເປັນແບບຢ່າງໃຫ້ທົ່ວໂລກ. ຈີນເປີດປະຕູສູ່ພາຍນອກເປັນການຢັ້ງຢືນວ່າ, ອະນາຄົດແຫ່ງການພົວພັນລະຫວ່າງຊາດແມ່ນຂຶ້ນຢູ່ກັບການໄປມາຫາສູ່ກັນທີ່ຕ່າງເຄົາລົບກັນ, ຫາກບໍ່ແມ່ນການສ້າງກຳແພງເພື່ອປິດກັ້ນຕົນເອງ. ລະບົບການຄ້າຫຼາຍຝ່າຍທີ່ເປີດປະຕູສູ່ພາຍນອກເປັນທີ່ຈີນຍຶດຖືມາເປັນເວລາຍາວນານ, ກໍ່ແມ່ນທິດທາງທີ່ໂລກຄວນກ້າວເດີນໄປຕາມ.
ຄຳເຫັນ
0