ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCMG: ໃນຕອນແລງວັນທີ 1 ທັນວານີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ສົນທະນາທາງໂທລະສັບກັບທ່ານອູຊູລາ ຟອນ ເດີ ໄລເຢີ, ປະທານ ຄະນະກຳມະການສະຫະພາບເອີຣົບຄົນໃໝ່.
ທ່ານຫຼີເຄີ້ສຽງໄດ້ສະແດງຄວາມຊົມເຊີຍຕໍ່ທ່ານອູຊູລາ ຟອນເດີ ໄລເຢີທີ່ໄດ້ຮັບຕຳແໜ່ງໃໝ່, ແລະກ່າວ, ຈີນແລະສະຫະພາບເອີຣົບແມ່ນຄູ່ຮ່ວມມືທີ່ສຳຄັນຂອງກັນແລະກັນ, ສອງຝ່າຍລ້ວນແຕ່ເດັດດ່ຽວປົກປ້ອງລັດທິຫຼາຍຝ່າຍແລະການຄ້າເສລີ. ຈີນເດັດດ່ຽວສະໜັບສະໜູນຂະບວນການຫັນເປັນອັນໜຶ່ງອັນດຽວກັນຂອງສະຫະພາບເອີຣົບຢ່າງສະເໝີຕົ້ນສະເໝີປາຍ. ຈີນແລະສະຫະພາບເອີຣົບໃຫ້ຄວາມສົນໃຈຕໍ່ຜົນປະໂຫຍດຮ່ວມກັນຢ່າງກວ້າງຂວາງ, ເພີ່ມທະວີການແລກປ່ຽນດ້ານຍຸດທະສາດ, ລົງເລິກການຮ່ວມມືຢ່າງຮອບດ້ານ, ຈະມີຜົນດີຕໍ່ຈີນແລະສະຫະພາບເອີຣົບ, ທັງມີຜົນດີຕໍ່ທົ່ວໂລກ.
ທ່ານຫຼີເຄີ້ສຽງກ່າວວ່າ, ຈີນໃນຖານະເປັນປະເທດທີ່ກຳລັງພັດທະນາທີ່ໃຫຍ່ທີ່ສຸດໃນໂລກ, ຖ້າຢາກບັນລຸການຫັນເປັນທັນສະໄໝຍັງຕ້ອງໄດ້ກ້າວເດີນໄປໜ້າຢ່າງຍາວໄກ. ພວກເຮົາຈະຕັ້ງໜ້າປະຕິບັດຕາມຄຳໝັ້ນສັນຍາຂອງ “ສົນທິສັນຍາປາຣີ”, ສຸມຄວາມພະຍາຍາມເຂົ້າໃນການສູ້ຊົນຮັບມືກັບການປ່ຽນແປງຂອງດິນຟ້າອາກາດ, ໃນຂະບວນວິວັດແຫ່ງການເລັ່ງລັດການຫັນເປັນອຸດສາຫະກຳ, ການຫັນເປັນຕົວເມືອງແລະການຫັນເປັນທັນສະໄໝໃນຂະແໜງການກະສິກຳຕ້ອງສືບຕໍ່ປັບປຸງສິ່ງແວດລ້ອມໃຫ້ດີຂຶ້ນກວ່າເກົ່າ, ພະຍາຍາມຮ່ວມກັນກັບປະຊາຄົມໂລກເຊິ່ງລວມທັງສະຫະພາບເອີຣົບເພື່ອຮັບມືກັບການປ່ຽນແປງດ້ານດິນຟ້າອາກາດ.
ທ່ານຫຼີເຄີ້ສຽງຍິນດີຕ້ອນຮັບຜູ້ນຳຊຸດໃໝ່ຂອງສະຫະພາບເອີຣົບເດີນທາງຢ້ຽມຢາມຈີນໃນປີ 2020 ເພື່ອເຂົ້າຮ່ວມການພົບປະລະຫວ່າງຜູ້ນຳຈີນ-ສະຫະພາບເອີຣົບຄັ້ງທີ 22 ທີ່ຈະຈັດຂຶ້ນຢູ່ຈີນ.
ຄຳເຫັນ
0