ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນໄລຍະມໍ່ໆນີ້, ຫຼາຍເຂດຂອງຈີນເຊັ່ນ ນະຄອນອູຮັ້ນແຂວງຫູເປີຍ ໄດ້ເກີດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຫຼື NCOV.
ພາຍຫຼັງເກີດພະຍາດດັ່ງກ່າວແລ້ວ, ສູນກາງພັກແລະລັດຖະບານຈີນໄດ້ໃຫ້ຄວາມສຳຄັນຢ່າງສູງ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ອອກຄຳສັ່ງຊີ້ນຳອັນສຳຄັນວ່າ, ນະຄອນອູຮັ້ນແຂວງຫູເປີຍ ແລະແຫ່ງອື່ນໆໄດ້ເກີດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຕາມໆກັນໃນໄລຍະມໍ່ໆນີ້, ຕ້ອງມີສະຕິລະວັງຕົວແລະໃຫ້ຄວາມສຳຄັນຢ່າງສູງ, ອອກແຮງຈົນສຸດຄວາມສາມາດປະຕິບັດວຽກງານປ້ອງກັນແລະຄວບຄຸມພະຍາດ. ປັດຈຸບັນກຳລັງຢູ່ໃນໄລຍະບຸນກຸດຈີນ, ປະຊາຊົນຈຳນວນຫຼວງຫຼາຍເດີນທາງພາຍໃນຂອບເຂດກວ້າງຂວາງ ຈິ່ງມີຄວາມສຳຄັນແລະເລັ່ງດ່ວນທີ່ສຸດໃນການເຮັດວຽກປ້ອງກັນແລະຄວບຄຸມພະຍາດໃຫ້ດີ. ຄະນະພັກແລະອົງການປົກຄອງທຸກຂັ້ນກໍຄືພາກສ່ວນທີ່ກ່ຽວຂ້ອງຕ້ອງຖືຄວາມປອດໄພດ້ານຊີວິດແລະສຸຂະພາບຂອງປະຊາຊົນໄວ້ຢູ່ໃນຖານະສຳຄັນອັນດັບໜຶ່ງ, ຕ້ອງວາງແຜນຢ່າງຖີ່ຖ້ວນລະອຽດ,ຈັດຕັ້ງກຳລັງຝ່າຍຕ່າງໆດຳເນີນການປ້ອງກັນແລະຄວບຄຸມພະຍາດດັ່ງກ່າວ, ໃຊ້ມາດຕະການຕົວຈິງທີ່ມີປະສິດທິຜົນເຂົ້າໃນການສະກັດກັ້ນທ່ວງທ່າແຜ່ລະບາດຂອງພະຍາດຢ່າງເດັດຂາດ. ຕ້ອງອອກແຮງປິ່ນປົວຜູ້ຕິດພະຍາດຢ່າງສຸດຄວາມສາມາດ,ສືບຫາສາເຫດຕົວຈິງທີ່ພາໃຫ້ຕິດພະຍາດແລະ ພະຍາດແຜ່ລະບາດນັ້ນໂດຍໄວ, ເພີ່ມທະວີການເຝົ້າຕິດຕາມຜູ້ຕິດພະຍາດ, ປະຕິບັດຕາມຂັ້ນຕອນປິ່ນປົວໃຫ້ເປັນລະບຽບແບບແຜນ. ຕ້ອງແຈ້ງໃຫ້ປະຊາຊົນຮູ້ສະພາບການແຜ່ລະບາດຂອງພະຍາດຢ່າງທັນການ, ລົງເລິກການຮ່ວມມືກັບສາກົນໃນວຽກງານປ້ອງກັນແລະຄວບຄຸມພະຍາດ. ຕ້ອງເພີ່ມທະວີການນຳພາຫາງສຽງດ້ວຍການເພີ່ມທະວີການໂຄສະນາແລະອະທິບາຍມາດຕະການແລະນະໂຍບາຍທີ່ກ່ຽວຂ້ອງ, ປົກປ້ອງສະຖຽນລະພາບທາງສັງຄົມຢ່າງເດັດດ່ຽວ, ຮັບປະກັນໃຫ້ປະຊາຊົນສະຫຼອງບຸນກຸດຈີນດ້ວຍຄວາມສະຫງົບສຸກແລະເປັນງານສີລິມຸງຄຸນ.
ຄຳເຫັນ
0