ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 7 ກຸມພານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາກັບທ່ານໂດໂນ ທຣຳ ປະທານາທິບໍດີອາເມຣິກາທາງໂທລະສັບ.
ທ່ານສີຈິ້ນຜິງກ່າວເນັ້ນວ່າ, ນັບແຕ່ເກີດການແຜ່ລະບາດຂອງພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ເປັນຕົ້ນມາ, ລັດຖະບານ ແລະ ປະຊາຊົນຈີນໄດ້ສຸມທຸກຄວາມພະຍາຍາມເພື່ອຕ້ານກັບການແຜ່ລະບາດຂອງພະຍາດ. ພວກເຮົາໄດ້ລະດົມຂົນຂວາຍທົ່ວປະເທດ ວາງແຜນຢ່າງຮອບດ້ານ ແລະ ຮັບມືຢ່າງວ່ອງໄວ, ໃຊ້ມາດຕະການປ້ອງກັນ ແລະ ຄວບຄຸມທີ່ຮອບດ້ານ ແລະ ເຂັ້ມງວດທີ່ສຸດ. ວຽກງານທີ່ກ່ຽວຂ້ອງພວມໄດ້ຮັບປະສິດທິຜົນເທື່ອລະກ້າວ, ພວກເຮົາມີຄວາມໝັ້ນໃຈ ແລະ ຄວາມສາມາດຢ່າງເຕັມປ່ຽມທີ່ຈະເອົາຊະນະການແຜ່ລະບາດຂອງພະຍາດຄັ້ງນີ້ໄດ້. ທ່ວງທ່າທີ່ເສດຖະກິດຈີນຈະຂະຫຍາຍຕົວໄປໃນທິດທາງທີ່ດີໃນໄລຍະຍາວນັ້ນຈະບໍ່ມີການປ່ຽນແປງ.
ທ່ານສີຈິ້ນຜິງຊີ້ອອກວ່າ, ຈີນບໍ່ພຽງແຕ່ປົກປ້ອງຄວາມປອດໄພດ້ານຊີິວິດ ແລະ ສຸຂະພາບທີ່ແຂງແຮງຂອງປະຊາຊົນຈີນເທົ່ານັ້ນ, ຍັງໄດ້ປົກປ້ອງຄວາມປອດໄພດ້ານຊີິວິດ ແລະ ສຸຂະພາບທີ່ແຂງແຮງຂອງປະຊາຊົນທົ່ວໂລກອີກດ້ວຍ. ພວກເຮົາໄດ້ຍຶດໝັ້ນໃນທ່າທີທີ່ເປີດເຜີຍ ປອດໂປ່ງ ແລະ ຮັບຜິດຊອບ, ແຈ້ງສະພາບການຕໍ່ອົງການອະນາໄມໂລກ, ປະເທດ ແລະເຂດແຄວ້ນທີ່ກ່ຽວຂ້ອງ ເຊິ່ງລວມທັງອາເມຣິກາຢ່າງທັນການ, ທັງເຊື້ອເຊີນຜູ້ຊ່ຽວຊານຂອງອົງການອະນາໄມໂລກ ແລະ ອົງການອື່ນໆໄປສຳຫຼວດເບິ່ງຢູ່ນະຄອນອູຮັ້ນ. ຈີນເປັນແນວໜ້າໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດຄັ້ງນີ້, ພວກເຮົາໄດ້ໃຊ້ມາດຕະການທີ່ມີປະສິດທິຜົນຢ່າງເຂັ້ມແຂງ ແລະ ທັນການ, ໄດ້ຮັບການຍອມຮັບ ແລະ ການຕີລາຄາສູງຈາກອົງການອະນາໄມໂລກ ແລະ ຫຼາຍປະເທດ.
ທ່ານສີຈິ້ນຜິງຊີ້ອອກວ່າ, ຈີນ ແລະ ອາເມຣິກາໄດ້ຮັກສາການແລກປ່ຽນກ່ຽວກັບການປ້ອງກັນ ແລະ ຄວບຄຸມການແຜ່ລະບາດຂອງພະຍາດ. ຂ້າພະເຈົ້າຊົມເຊີຍທ່ານປະທານາທິບໍດີທີ່ຕີລາຄາຢ່າງຕັ້ງໜ້າມາຫຼາຍເທື່ອຕໍ່ວຽກງານປ້ອງກັນ ແລະ ຄວບຄຸມຂອງຈີນ, ຂອບໃຈຕໍ່ວົງການຕ່າງໆໃນສັງຄົມອາເມຣິກາທີ່ຊ່ວຍເຫຼືອອຸປະກອນຕ່າງໆ. ການແຜ່ລະບາດຂອງພະຍາດຕິດແປດຕ້ອງໃຫ້ປະເທດຕ່າງໆຮ່ວມມືແກ້ໄຂ. ປະຈຸບັນ, ການປ້ອງກັນ ແລະ ຄວບຄຸມການແຜ່ລະບາດຂອງພະຍາດຢູ່ໃນໄລຍະເວລາຫົວລ້ຽວຫົວຕໍ່, ອົງການອະນາໄມໂລກໄດ້ຮຽກຮ້ອງຫຼາຍເທື່ອໃນດ້ານວິຊາການວ່າ, ບັນດາປະເທດບໍ່ຄວນມີປະຕິກິລິຍາເກີນເຫດ. ຫວັງວ່າອາເມຣິກາຈະປະເມີນສະພາບການແຜ່ລະບາດຂອງພະຍາດຢ່າງມີສະຕິສຸຂຸມຮອບຄອບ, ສ້າງ ແລະ ປັບປຸງມາດຕະການຮັບມືຢ່າງສົມເຫດສົມຜົນ. ຈີນ ແລະ ອາເມຣິກາສາມາດຮັກສາການແລກປ່ຽນ, ເພີ່ມທະວີການປະສານງານ, ຮ່ວມກັນປ້ອງກັນ ແລະ ຄວບຄຸມການແຜ່ລະບາດຂອງພະຍາດໄດ້.
ທ່ານໂດໂນ ທຣຳກ່າວວ່າ, ອາເມຣິກາຈະສຸມທຸກຄວາມພະຍາຍາມເພື່ອສະໜັບສະໜູນຈີນໃນການຕ້ານກັບການແຜ່ລະບາດຂອງພະຍາດອັກເສບປອດຈາກໄວຣັສໂຄໂຣນາສາຍພັນໃໝ່. ຈີນໄດ້ສ້າງໂຮງໝໍສະເພາະໃນເວລາສັ້ນທີ່ສຸດ, ເຊິ່ງເຮັດໃຫ້ຄົນສະແດງຄວາມປະທັບໃຈຫຼາຍຕໍ່ເລື່ອງນີ້, ນີ້ສະແດງໃຫ້ເຫັນເຖິງຄວາມສາມາດດ້ານການຈັດຕັ້ງ ແລະ ການຮັບມືທີ່ດີຢ່າງເຕັມສ່ວນ. ເຊື່ອວ່າພາຍໃຕ້ການນຳພາຂອງທ່ານປະທານສີຈິ້ນຜິງ, ປະຊາຊົນຈີນຈະໄດ້ຮັບໄຊຊະນະໃນການຕ້ານກັບພະຍາດຢ່າງບໍ່ຕ້ອງສົງໄສ. ອາເມຣິກາມີຄວາມເຊື່ອໝັ້ນຕໍ່ການພັດທະນາດ້ານເສດຖະກິດຂອງຈີນ. ອາເມຣິກາຈະມີທ່າທີສຸຂຸມໃນການຮັບມືກັບການແຜ່ລະບາດຂອງພະຍາດຄັ້ງນີ້, ຍິນດີຜ່ານຊ່ອງທາງສອງຝ່າຍ ກໍຄື ອົງການອະນາໄມໂລກເພື່ອຮັກສາການແລກປ່ຽນ ແລະ ການຮ່ວມມືກັບຈີນ.
ທ່ານສີຈິ້ນຜິງກ່າວເນັ້ນຕື່ມວ່າ, ຫວ່າງກ່ອນນີ້ບໍ່ດົນ, ຈີນ ແລະ ອາເມຣິກາໄດ້ເຊັນສັນຍາດ້ານເສດຖະກິດການຄ້າໄລຍະທີ 1, ຈີນ ແລະ ອາເມຣິກາບັນລຸການເຊັນສັນຍາແບບນີ້ມີຜົນດີຕໍ່ຈີນ, ທັງມີຜົນດີຕໍ່ອາເມຣິກາເຊັ່ນກັນ, ແລະມີຜົນດີຕໍ່ສັນຕິພາບ ແລະ ຄວາມຈະເລີນຮຸ່ງເຮືອງຂອງໂລກອີກດ້ວຍ. ນີ້ສະແດງໃຫ້ເຫັນຢ່າງເຕັມສ່ວນວ່າ, ເຖິງວ່າ ຈີນ ແລະ ອາເມຣິກາມີຄວາມເຫັນຂັດແຍ້ງກັນຈຳນວນໜຶ່ງກໍຕາມ, ຂໍພຽງແຕ່ສອງຝ່າຍປະຕິບັດຕາມຫຼັກການທີ່ສະເໝີພາບກັນ ແລະ ເຄົາລົບເຊິ່ງກັນແລະກັນ, ກໍສາມາດຊອກເຫັນວິທີແກ້ໄຂທີ່ສອງຝ່າຍຍອມຮັບໂດຍຜ່ານການປຶກສາຫາລືກັນ. ຫວັງວ່າອາເມຣິກາ ຈະສຸມຄວາມພະຍາຍາມເດີນໄປໃນທິດທາງດຽວກັນ, ຈັດຕັ້ງປະຕິບັດຄວາມເຫັນທີ່ເປັນເອກະພາບກັນທີ່ປະມຸກລັດສອງປະເທດຕົກລົງກັນກັບຈີນ, ຍຶດໝັ້ນທິດທາງລວມທີ່ປະສານງານກັນ, ຮ່ວມມືກັນ, ແລະ ມີຄວາມໝັ້ນທ່ຽງ, ຊຸກຍູ້ໃຫ້ການພົວພັນຈີນ-ອາເມຣິກາຂະຫຍາຍໄປໃນທິດທາງທີ່ຖືກຕ້ອງໃນປີໃໝ່ນີ້.
ຄຳເຫັນ
0