ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ກຸມພາປີ 2020, ກອງປະຊຸມລັດຖະມົນຕີກະຊວງການຕ່າງປະເທດຈີນ-ອາຊຽນສະໄໝພິເສດກ່ຽວກັບພະຍາດ covid-19 ໄດ້ຈັດຂື້ນຢູ່ນະຄອນຫລວງວຽງຈັນ. ກອງປະຊຸມດັ່ງກ່າວໄດ້ອອກ “ຖະແຫຼງການຮ່ວມຂອງກອງປະຊຸມລັດຖະມົນຕີການຕ່າງປະເທດຈີນ-ອາຊຽນສະໄໝພິເສດກ່ຽວກັບພະຍາດ covid-19”, ເຊິ່ງໄດ້ສະແດງໃຫ້ເຫັນເຖິງຄວາມໝັ້ນໃຈຢ່າງເດັດດ່ຽວທີ່ຈີນແລະອາຊຽນພະຍາຍາມຮ່ວມກັນເພື່ອປ້ອງກັນການແຜ່ລະບາດຂອງພະຍາດອັກເສບປອດສາຍພັນໃໝ່ນີ້. ຈາກນັ້ນໜຶ່ງອາທິດ ຄື ວັນທີ 27 ກຸມພາຜ່ານມາ, ກອງປະຊຸມລະດັບເອກອັກຄະລັດຖະທູດອາຊຽນ, ຈີນ, ຍີ່ປຸ່ນ ແລະ ສ.ເກົາຫຼີ ຫຼື 10+3 ຄັ້ງທີ 12 ໄດ້ຈັດຂຶ້ນຢູ່ສຳນັກງານກອງເລຂາອາຊຽນທີ່ນະຄອນຫຼວງຈາກາຕາປະເທດອິນໂດເນເຊຍ, ຝ່າຍຕ່າງໆໄດ້ຮຽກຮ້ອງໃຫ້ກົນໄກ 10+3 ຄວນຍົກສູງລະດັບການຮ່ວມມືດ້ານສາທາລະນະສຸກຂື້ນຕື່ມອີກ, ເພື່ອເສີມຂະຫຍາຍບົດບາດໃຫ້ຫລາຍກວ່າເກົ່າໃນດ້ານການຮ່ວມກັນປ້ອງກັນແລະຄວບຄຸມບໍ່ໃຫ້ພະຍາດແຜ່ລະບາດ. ເຖິງວ່າຈີນແລະປະເທດອາຊຽນມີລະດັບການພັດທະນາດ້ານສາທາລະນະສຸກຕ່າງກັນ, ແຕ່ເປັນຫຍັງຈີນແລະອາຊຽນສາມາດດຳເນີນການຮ່ວມມືແລະຕອບໂຕ້ກັບການແຜ່ລະບາດຂອງພະຍາດໄດ້ຢ່າງວ່ອງໄວຄືແນວນີ້? ປະຫວັດສາດແລະຄວາມເປັນຈິງໃນປັດຈຸບັນໄດ້ພິສູດໃຫ້ເຫັນແລ້ວວ່າ ການຮ່ວມມືດ້ານສາທາລະນະສຸກລະຫວ່າງຈີນກັບອາຊຽນຢ່າງໝັ້ນທ່ຽງທີ່ມີມາເປັນເວລາດົນນານນັ້ນສາມາດທັບມ້າງອຸປະສັກຄວາມຫຍຸ້ງຍາກດ້ານການຮ່ວມມືຍ້ອນລະດັບການພັດທະນາທີ່ແຕກຕ່າງກັນ, ຮູບການຮ່ວມມືດ້ານສາທາລະນະສຸກທີ່ມີລັກສະນະໄລຍະຍາວທັງມີລັກກສະນະຮັບມືສຸກເສີນແບບນີ້ ໄດ້ເປັນແບບຢ່າງການຮ່ວມມືດ້ານສາທາລະນະສຸກໃຫ້ແກ່ພາກພື້ນອື່ນໆກໍຄືການຮ່ວມມືສາກົນ. ການຮ່ວມມື ສອງຝ່າຍສະຫລຸບໄດ້ດັ່ງນີ້.
ໜຶ່ງ. ການປັບປຸງພື້ນຖານການຮ່ວມມືດ້ານສາທາລະນະສຸກໃຫ້ໜັກແໜ້ນ
ເມື່ອເດືອນພະຈິກປີ 2002, ຜູ້ນຳຈີນແລະອາຊຽນໄດ້ອອກຖະແຫຼງການຮ່ວມກ່ຽວກັບການຮ່ວມມືໃນຂົງເຂດຄວາມໝັ້ນຄົງແບບໃໝ່. ປີ 2003, ພະຍາດຊາສ ໄດ້ແຜ່ລະບາດຢູ່ປະເທດອາຊີຕາເວັນອອກເຮັດໃຫ້ຄົນທັງຫຼາຍໃຫ້ຄວາມສົນໃຈ, ຜູ້ນຳຈີນແລະອາຊຽນຈຶ່ງໄດ້ຈັດກອງປະຊຸມສຸດຍອດສະໄໝພິເສດທັນທີ, ແລະໄດ້ກ້າວເຖິງຄວາມເຫັນເປັນເອກະພາບກັນກ່ຽວກັບການແຈ້ງຂໍ້ມູນກ່ຽວກັບການແຜ່ລະບາດຂອງພະຍາດ, ການປິ່ນປົວພະຍາດ ແລະ ການຄົ້ນຄວ້າວິທະຍາສາດ ໂດຍຜ່ານການເຊື່ອມຕໍ່ເວັບໄຊຂໍ້ມູນຂ່າວສານກ່ຽວກັບພະຍາດຊາສຂອງຈີນແລະເວັບໄຊຂໍ້ມູນຂ່າວສານກ່ຽວກັບການປ້ອງກັນແລະຄວບຄຸມພະຍາດຊາສຂອງອາຊຽນເຂົ້າກັນ. ປີ 2004, ເຂດອາຊີຕາເວັນອອກສຽງໃຕ້ໄດ້ເກີດການແຜ່ລະບາດຂອງພະຍາດໄຂ້ຫວັດສັດປີກ, ຈີນແລະອາຊຽນໄດ້ຈັດກອງປະຊຸມພິເສດກ່ຽວກັບການປ້ອງກັນແລະປິ່ນປົວພະຍາດໄຂ້ຫວັດສັດປີກ. ມາດຕະການຕ່າງໆເຫຼົ່ານີ້ລ້ວນແຕ່ໄດ້ສ້າງພື້ນຖານໃຫ້ແກ່ການຮ່ວມມືລະຫວ່າງຈີນແລະອາຊຽນເພື່ອຮັບມືກັບຄວາມສ່ຽງແລະສິ່ງທ້າທາຍຈາກພະຍາດທີ່ເກີດຂຶ້ນຢູ່ພາກພື້ນ.
ສອງ. ການບູລະນະໝາກຜົນການຮ່ວມມືດ້ານສາທາລະນະສຸກ
ໃນຫຼາຍປີມານີ້, ຈີນແລະອາຊຽນໄດ້ປັບປຸງກົນໄກການຮ່ວມມືດ້ານສາທາລະນະສຸກໃຫ້ດີຂຶ້ນຢ່າງບໍ່ຢຸດຢັ້ງ ແລະ ເຮັດໃຫ້ຮູບການຮ່ວມມືສົມບູນຂື້ນກວ່າເກົ່າ. ຈີນໄດ້ສົ່ງອາສາສະໝັກໄປປະເທດອາຊຽນທີ່ມີເງື່ອນໄຂປິ່ນປົວຍັງບໍ່ທັນເຂັ້ມແຂງພຽງພໍເຊັ່ນ: ລາວ, ກຳປູເຈຍ ແລະ ປະເທດອື່ນຕະຫຼອດມາ, ເພື່ອຊ່ວຍເຫຼືອການປິ່ນປົວພະຍາດຢູ່ໂຮງໝໍທີ່ໄດ້ກຳນົດໄວ້. ເລີ່ມແຕ່ປີ 2016 ມານີ້, ຈີນແລະອາຊຽນຍັງໄດ້ຈັດກອງປະຊຸມເວທີປຶກສາຫາລືການຮ່ວມມືດ້ານສາທາລະນະສຸກຫຼາຍຄັ້ງ ແລະ ໄດ້ສະເໜີເປົ້າໝາຍສ້າງ “ເສັ້ນທາງສາຍໄໝດ້ານສຸຂະພາບ” ພາຍໃຕ້ເບື້ອງຫຼັງ “ໜຶ່ງແລວໜຶ່ງເສັ້ນທາງ” ໂດຍ ຖືເອົາການສ້າງ “ປະເທດຈີນທີ່ສຸຂະພາບເຂັ້ມແຂງ” ເຊື່ອມຕໍ່ກັບ “ວາລະການພັດທະນາວຽກງານສາທາລະນະສຸກຂອງອາຊຽນຫຼັງປີ 2015.”
ສາມ. ການເສີມຂະຫຍາຍບົດຮຽນການຮ່ວມມືດ້ານສາທາລະນະສຸກ.
ພາຍຫຼັງເກີດການແຜ່ລະບາດຂອງພະຍາດ covid 19 ແລ້ວ, ພາກສ່ວນສາທາລະນະສຸກຈີນໄດ້ແປ່ງປັນຂໍ້ມູນທີ່ກ່ຽວຂ້ອງໃຫ້ແກ່ອາຊຽນຢ່າງວ່ອງໄວ. ລະຫວ່າງປະເທດອາຊຽນກໍໄດ້ມີການປະສານງານຢ່າງມີປະສິດທິຜົນໂດຍຜ່ານ “ເຄືອຂ່າຍສູນການເຄື່ອນໄຫວດ່ວນກ່ຽວກັບເຫດການສາທາລະນະສຸກສຸກເສີນອາຊຽນ” ຫຼື ASEAN ECO Network. ອາຊຽນໄດ້ແຈ້ງແລະແບ່ງປັນຂໍ້ມູນທີ່ກ່ຽວຂ້ອງໃຫ້ແກ່ຈີນ, ຍີ່ປຸ່ນ ແລະ ສ.ເກົາຫຼີຢ່າງທັນເວລາໂດຍຜ່ານກົນໄກ “ອາຊຽນ+” ທີ່ສ້າງຂຶ້ນດ້ວຍຕົນເອງ.
ການແຜ່ລະບາດກໍຄືຜົນກະທົບທີ່ເກີດຂຶ້ນໃນທົ່ວໂລກຂອງພະຍາດ covid 19 ເທື່ອນີ້ໄດ້ເຮັດໃຫ້ຄວາມສ່ຽງຈາກພະຍາດທີ່ຖືກຖືເປັນຄວາມໝັ້ນຄົງແບບໃໝ່ໃນແຕ່ກ່ອນໄດ້ພົ້ນເດັ່ນຂຶ້ນເປັນຢ່າງຍິ່ງ. ຄົນທັງຫຼາຍກໍໄດ້ຮັບຮູ້ ແລະ ເຂົ້າໃຈເນື້ອໃນຂອງຄຳວ່າ “ປະຊາຄົມຮ່ວມຊາຕາກຳ” ຢ່າງແທ້ຈິງ. ເຖິງວ່າການແຜ່ລະບາດຂອງພະຍາດເທື່ອນີ້ຈະກະທົບເຖິງການຮ່ວມມືດ້ານເສດຖະກິດລະຫວ່າງຈີນກັບອາຊຽນເປັນໄລຍະສັ້ນ, ແຕ່ເບິ່ງຈາກໄລຍະຍາວແລ້ວ, ກໍຈະເຮັດໃຫ້ການຮ່ວມມືລະຫວ່າງສອງຝ່າຍໃກ້ຊິດກັນກວ່າເກົ່າ. ຈີນແລະອາຊຽນເປັນປະເທດບ້ານໃກ້ເຮືອນຄຽງ, ຜ່ານການຮ່ວມມືກັນຕ້ານກັບການແຜ່ລະບາດຂອງພະຍາດເທື່ອນີ້, ເຊື່ອວ່າສອງຝ່າຍຈະສາມາດປ່ຽນວິກິດການໃຫ້ເປັນໂອກາດທີ່ດີ ແລະ ກາຍເປັນປະຊາຄົມຮ່ວມຊາຕາກຳຈີນ-ອາຊຽນທີ່ມີການພົວພັນກັນຢ່າງໃກ້ຊິດກວ່າເກົ່າ.
ຄຳເຫັນ
0