ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ກອງປະຊຸມສຸດຍອດອາຊຽນຄັ້ງທີ 36 ໄດ້ຈັດຂຶ້ນຜ່ານທາງວິດີໂອໃນວັນທີ 26 ມິຖຸນານີ້, ຜູ້ນຳທີ່ເຂົ້າຮ່ວມກອງປະຊຸມໄດ້ດຳເນີນການປຶກສາຫາລືກ່ຽວກັບຫົວຂໍ້ຕ່າງໆເຊັ່ນ: ການຮ່ວມມືກັນເພື່ອຮັບມືກັບການແຜ່ລະບາດຂອງພະຍາດໂຄວິດ-19, ການຟື້ນຟູເສດຖະກິດຄືນໃໝ່ຫຼັງການລະບາດແລະຫົວຂໍ້ອື່ນໆ.
ຫວຽດນາມທີ່ເປັນປະເທດປະທານໝູນວຽນອາຊຽນໄດ້ເປັນເຈົ້າພາບຈັດກອງປະຊຸມຄັ້ງນີ້. ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມໄດ້ຕີລາຄາຢ່າງສູງຕໍ່ຜົນງານດ້ານການຕ້ານກັບການແຜ່ລະບາດຂອງພະຍາດໂຄວິດ-19 ຂອງບັນດາປະເທດອາຊຽນ,ແລະກ່າວວ່າບັນດາປະເທດອາຊຽນຕ້ອງຮ່ວມມືກັນສຸມໃສ່ການພັດທະນາເສດຖະກິດສັງຄົມແລະການຟື້ນຟູເສດຖະກິດຄືນໃໝ່ຫຼັງການລະບາດ, ເພີ່ມທະວີການຮ່ວມມືກັບປະເທດຄູ່ເຈລະຈາ, ຮ່ວມກັນເອົາຊະນະການແຜ່ລະບາດຂອງພະຍາດໂຄວິດ-19.
ນອກນີ້, ໃນມື້ດັ່ງກ່າວ, ບັນດາປະເທດອາຊຽນໄດ້ອອກ “ຖະແຫຼງການຮ່ວມຂອງຜູ້ນຳອາຊຽນກ່ຽວກັບການຮ່ວມແຮງຮ່ວມໃຈກັນແລະຮັບມືກັບການລະບາດຢ່າງຕັ້ງໜ້າ: ຜ່ານຜ່າສິ່ງທ້າທາຍແລະຮັກສາການເຕີບໂຕ”. ຖະແຫຼງການຊີ້ໃຫ້ເຫັນວ່າ: ບັນດາຝ່າຍຈະເດັດດ່ຽວສຸມໃສ່ການຫຼຸດຜ່ອນຜົນກະທົບທີ່ເກີດຈາກການແຜ່ລະບາດຂອງພະຍາດໂຄວິດ-19 ທີ່ມີຕໍ່ຊີວິດການເປັນຢູ່ຂອງປະຊາຊົນ,ສັງຄົມແລະເສດຖະກິດ, ປະຕິບັດແຜນການຟື້ນຟູຄືນໃໝ່ຢ່າງຮອບດ້ານໂດຍມີຈຸດປະສົງເພື່ອປັບປຸງຄວາມໝັ້ນທ່ຽງແລະຄວາມສາມາດຕ້ານທານດ້ານເສດຖະກິດໃນພາກພື້ນໃຫ້ດີຂຶ້ນ ແລະຮັກສາຕ່ອງໂສ້ການສະໜອງໃຫ້ມີຄວາມສະດວກສະບາຍ,ພ້ອມທັງເຝົ້າລະວັງບໍ່ໃຫ້ເກີດມີການແຜ່ລະບາດຂອງພະຍາດໂຄວິດ-19 ຄັ້ງທີສອງ.
ຄຳເຫັນ
0