ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ບົດປາໄສໃນກອງປະຊຸມລະດັບສູງຂອງອົງການສະຫະປະຊາຊາດເພື່ອລະນຶກກອງປະຊຸມໃຫຍ່ແມ່ຍິງໂລກທີ່ປັກກິ່ງຄົບຮອບ 25 ປີ
ໂດຍທ່ານສີຈິ້ນຜິງ ປະທານປະເທດຈີນ
(ວັນທີ 1 ຕຸລາປີ 2020)
ຮຽນທ່ານປະທານ
ບັນດາເພື່ອນມິດ:
ເນື່ອງໃນໂອກາດທີ່ສ້າງຕັ້ງອົງການສະຫະປະຊາຊາດຄົບຮອບ 75 ປີ, ພວກເຮົາລະນຶກການຈັດກອງປະຊຸມໃຫຍ່ແມ່ຍິງໂລກທີ່ປັກກິ່ງຄົບຮອບ 25 ປີ, ສົ່ງເສີມສະເໝີພາບລະຫວ່າງຍິງ-ຊາຍ, ຊຸກຍູ້ການພັດທະນາຂອງພາລະກິດແມ່ຍິງທົ່ວໂລກ. ຂ້າພະເຈົ້າຮູ້ສຶກຳປິຕິຊົມຊື່ນຕໍ່ເລື່ອງນີ້, ຂໍອວຍພອນໃຫ້ກອງປະຊຸມລະດັບສູງຄັ້ງນີ້ຈົ່ງໄດ້ຮັບຜົນສຳເລັດຢ່າງຈົບງາມ.
ແມ່ຍິງແມ່ນຜູ້ປະດິດສ້າງອະລິຍະທຳມະນຸດ ຜູ້ຊຸກຍູ້ຄວາມກ້າວໜ້າຂອງສັງຄົມ, ໄດ້ຮັບຜົນງານທີ່ບໍ່ທຳມະດາໃນຂະແໜງການຕ່າງໆ. ພວກເຮົາພວມຕໍ່ຕ້ານກັບການແຜ່ລະບາດຂອງພະຍາດໂຄວິດ-19, ເພດຍິງທີ່ເຮັດວຽກໜ້າທີ່ເປັນພະນັກງານການແພດ ເຈົ້າໜ້າທີ່ຄວບຄຸມພະຍາດ ພະນັກງານວິທະຍາສາດເຕັກນິກ ຜູ້ເຮັດວຽກເຂດຊຸມຊົນ ແລະອາສາສະໝັກ ແລະຂະແໜງການອື່ນໆຈຳນວນຫຼວງຫຼາຍບໍ່ຢ້ານກົວຕໍ່ໄພອັນຕະລາຍ, ສູ້ຊົນທັງເວັນ ທັງ ຄືນ,ເຝົ້າຮັກສາປະຕິບັດໜ້າທີ່ຢູ່ແນວໜ້າຂອງການປົກປ້ອງ ແລະຄວບຄຸມພະຍາດ, ປະກອບສ່ວນອັນຍິ່ງໃຫຍ່ໃນການປ້ອງກັນ ແລະ ກອບກູ້ຊີວິດດ້ວຍຄວາມດຸໝັ່ນ ແລະ ສະຕິປັນຍາຂອງຕົນ. ພວກເຮົາຕ້ອງຍ້ອງຍໍຊົມເຊີຍພວກເຂົາເຈົ້າ.
ໃນຂະນະສຳຄັນທີ່ຈີນຕ້ານກັບພະຍາດໂຄວິດ-19 ຢ່າງຂ້ຽວຊາດທີ່ສຸດ, ໃນພະນັກງານການແພດ 4 ໝື່ນກວ່າຄົນທີ່ມາຈາກແຫ່ງຕ່າງໆໃນທົ່ວປະເທດຈີນເພື່ອໄປຊ່ວຍເຫຼືອແຂວງຫູເປີຍນັ້ນ, ມີ 2 ສ່ວນ 3 ແມ່ນເພດຍິງ. ມີນາງພະຍາບານຜູ້ໜຶ່ງທີ່ມາຈາກແຂວງກວາງຕຸ້ງມີອາຍຸບໍ່ຮອດ 20 ປີ. ນັກຂ່າວຖາມລາວວ່າ, ເຈົ້າເອງຍັງເປັນເດັກນ້ອຍ ຍັງຕ້ອງການຜູ້ອື່ນມາຊ່ວຍເຫຼືອ. ແຕ່ລາວຕອບວ່າ, ເມື່ອໃສ່ຊຸດປ້ອງກັນເຊື້ອພະຍາດ, ກໍບໍ່ແມ່ນເດັກນ້ອຍອີກແລ້ວ. ຄຳສົນທະນາຕອນນີ້ໄດ້ເຮັດໃຫ້ປະຊາຊົນທົ່ວປະເທດຈີນຕື້ນຕັນໃຈທີ່ສຸດ. ກໍແມ່ນຍ້ອນວ່າມີເພດຍິງຈີນເປັນພັນເປັນໝື່ນຄົນຄືແບບນີ້, ນັກຮົບຊຸດຂາວໄດ້ ບຸກບືນສ່ຽງໄພຕໍ່ຄວາມອັນຕະລາຍ, ສະແດງໃຫ້ເຫັນເຖິງຄວາມກ້າຫານ ແລະ ການເຮັດວຽກຢ່າງລຳບາກຂອງພະນັກງານການແພດຜູ້ທີ່ມີຄວາມເມດຕາກະລຸນາຕໍ່ມວນມະນຸດ, ໃຊ້ສະຕິຮັບຜິດຊອບ ແລະ ການອຸທິດຕົນເພື່ອເຮັດໃຫ້ປະເທດຊາດປາສະຈາກຜົນກະທົບຂອງພະຍາດ.
ທ່ານປະທານ!
ໃນ 25 ປີຜ່ານມາ, ຈິດໃຈຂອງກອງປະຊຸມໃຫຍ່ແມ່ຍິງໂລກປັກກິ່ງໄດ້ຊຸກຍູ້ໃຫ້ເກີດການປ່ຽນແປງທີ່ຕັ້ງໜ້າ. ແມ່ຍິງມີຖານະສູງຂຶ້ນຢ່າງພົ້ນເດັ່ນໃນສັງຄົມ, ແລະມີຖານະບົດບາດນັບມື້ນັບພົ້ນເດັ່ນຂຶ້ນ, ຄວາມສະເໝີພາບກັນລະຫວ່າງຍິງ-ຊາຍ ແລະ ມອບສິດທິໃຫ້ແມ່ຍິງໄດ້ກາຍເປັນເປົ້າໝາຍສຳຄັນໃນ “ວາລະການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດ”.
ພະຍາດໂຄວິດ-19 ຍັງແຜ່ລະບາດໃນທົ່ວໂລກ, ໄດ້ສ້າງຜົນກະທົບຢ່າງໜັກໜ່ວງຕໍ່ການຜະລິດ ການດຳລົງຊີວິດ ແລະການປະກອບອາຊີບຂອງປະເທດຕ່າງໆ, ແມ່ຍິງໄດ້ຜະເຊີນກັບສິ່ງທ້າທາຍທີ່ໃຫຍ່ກວ່າເກົ່າ. ຄືດັ່ງທີ່ທ່ານເລຂາທິການໃຫຍ່ກູເຕີເຣັສກ່າວວ່າ, ຜົນສຳເລັດໃນຂົງເຂດຄວາມສະເໝີພາບກັນລະຫວ່າງຍິງ-ຊາຍທີ່ຍາດມາໄດ້ໃນຫຼາຍສິບປີຜ່ານມາພວມຜະເຊີນກັບຄວາມສ່ຽງທີ່ຫຼຸດໜ້ອຍຖອຍຫຼັງ. ໃນຂະບວນການທີ່ພວກເຮົາຕ້ານກັບພະຍາດ ແລະ ຊຸກຍູ້ການຟື້ນຟູເສດຖະກິດສັງຄົມ, ໂດຍສະເພາະຕ້ອງເອົາໃຈໃສ່ຄວາມຕ້ອງການພິເສດຂອງແມ່ຍິງ, ຈັດຕັ້ງປະຕິບັດ “ຖະແຫຼງການປັກກິ່ງ” ແລະ “ໂຄງການດຳເນີນງານ”. ຈີນມີຈຸດຢືນວ່າ:
ໜຶ່ງ, ຊ່ວຍເຫຼືອແມ່ຍິງພົ້ນອອກຈາກຜົນກະທົບຂອງພະຍາດ. ຕ້ອງເອົາໃຈໃສ່ສຸຂະພາບທາງຮ່າງກາຍ ຄວາມຕ້ອງການດ້ານຈິດໃຈສັງຄົມ ແລະ ສະພາບແວດລ້ອມການເຮັດວຽກຂອງພະນັກງານການແພດເພດຍິງ. ພວກເຮົາຕ້ອງຖືເອົາການຮັບປະກັນສິດຜົນປະໂຫຍດຂອງແມ່ຍິງ ແລະ ເດັກຍິງໄວ້ຢູ່ຖານະສຳຄັນໃນດ້ານສາທາລະສະສຸກ ແລະ ແຜນການຟື້ນຟູການເຮັດວຽກ ແລະ ການຜະລິດ, ໂດຍສະເພາະແມ່ນການເປີດກວ້າງຊ່ອງທາງປະກອບອາຊີບ ແລະ ປາບປາມການກະທຳທີ່ລ່ວງລະເມີດສິດຜົນປະໂຫຍດຂອງແມ່ຍິງ. ພວກເຮົາຕ້ອງເພີ່ມທະວີການບໍລິການຂອງສັງຄົມ, ໃຫ້ບູລິມະສິດແກ່ການຮັບປະກັນກຸ່ມຄົນພິເສດ ເຊັ່ນ: ແມ່ມານ ແມ່ ລູກອ່ອນ ແລະ ເດັກນ້ອຍ, ໃຫ້ຄວາມເອົາໃຈໃສ່ເປັນພິເສດຕໍ່ກຸ່ມຄົນຫຍຸ້ງຍາກ, ເຊັ່ນ: ແມ່ຍິງຜູ້ທຸກຍາກ, ແມ່ຍິງອາຍຸສູງ, ແມ່ຍິງຜູ້ພິການ ແລະ ອື່ນໆ, ສ້າງຜົນປະໂຫຍດ ແກ້ໄຂຄວາມຫຍຸ້ງຍາກໃຫ້ແກ່ເຂົາເຈົ້າຢ່າງແທ້ຈິງ.
ສອງ, ຈັດຕັ້ງປະຕິບັດຄວາມສະເໝີພາບລະຫວ່າງຍິງ-ຊາຍໃຫ້ເປັນຮູບປະທຳ. ການແຜ່ລະບາດຂອງພະຍາດຄັ້ງນີ້ໄດ້ນຳມາເຊິ່ງສິ່ງທ້າທາຍແບບບໍ່ເຄີຍມີມາກ່ອນ, ທັງໄດ້ສ້າງກາລະໂອກາດໃຫ້ແກ່ພວກເຮົາເພື່ອສຳຫຼວດຕົນເອງຄືນຢ່າງເລິກເຊິ່ງ ແລະສ້າງອະນາຄົດຄືນໃໝ່. ການພັດທະນາຂອງໂລກຕ້ອງກ້າວເຂົ້າສູ່ທິດທາງທີ່ສະເໝີພາບ, ກວມລວມແລະຍືນຍົງກວ່າເກົ່າ, ໃນນີ້, ວຽກງານແມ່ຍິງເປັນມາດຖານສຳຄັນ. ຕ້ອງຍົກສູງຖານະວຽກງານການປົກປ້ອງສິດແລະຜົນປະໂຫຍດຂອງແມ່ຍິງຕ້ອງໃຫ້ເປັນຍຸດທະສາດແຫ່ງຊາດ. ຄວນຖືການຟື້ນຟູຈາກສະພາບການລະບາດຂອງພະຍາດໂຄວິດ-19 ເປັນໂອກາດທີ່ດີເພື່ອສ້າງກາລະໂອກາດໃໝ່ໃຫ້ແກ່ແມ່ຍິງເຂົ້າຮ່ວມວຽກບ້ານການເມືອງ, ຍົກສູງລະດັບການມີສ່ວນຮ່ວມຂອງແມ່ຍິງໃນການຄຸ້ມຄອງວຽກງານຂອງລັດແລະວຽກງານດ້ານເສດຖະກິດ,ວັດທະນະທຳແລະສັງຄົມ. ພວກເຮົາຕ້ອງຈຳກັດແນວຄິດອະຄະຕິ, ການຈຳແນກແລະການໃຊ້ຄວາມຮຸນແຮງຕໍ່ແມ່ຍິງ, ເຮັດໃຫ້ຄວາມສະເໝີພາບລະຫວ່າງຍິງ-ຊາຍກາຍເປັນຫຼັກການປະພຶດແລະມາດຖານຄຸນຄ່າທີ່ທົ່ວສັງຄົມຮ່ວມກັນເຄົາລົບປະຕິບັດນຳກັນ.
ສາມ, ຊຸກຍູ້ແມ່ຍິງໃຫ້ມີບົດບາດຢູ່ແຖວໜ້າຂອງຍຸກສະໄໝ. ທຸກມື້ນີ້ໃນສະຕະວັດທີ 21, ການສ້າງສາຊີວິດທີ່ດີງາມແມ່ນບໍ່ສາມາດປາສະຈາກຄວາມກ້າວໜ້າຮອບດ້ານຂອງວຽກງານແມ່ຍິງໄດ້ ທັງຕ້ອງການແມ່ຍິງທັງຫຼາຍປະກອບສະຕິປັນຍາແລະກຳລັງແຮງຫຼາຍ ກວ່າເກົ່າເຂົ້າໃນວຽກງານດ້ານນີ້. ຄວນຍຶດໝັ້ນໃນການປົກປ້ອງສິດແລະຜົນປະໂຫຍດຂອງແມ່ຍິງໃນການພັດທະນາ, ອາໄສການພັດທະນາເພື່ອປັບປຸງຊີວິດການເປັນຢູ່ຂອງແມ່ຍິງ, ບັນລຸເປົ້າໝາຍໃຫ້ວຽກງານແມ່ຍິງແລະເສດຖະກິດສັງຄົມພັດທະນາໄປພ້ອມກັນ. ພວກເຮົາຄວນກຳຈັດອຸປະສັກຕ່າງໆ, ສ້າງສະພາບແວດລ້ອມທີ່ດີ, ປຸກລະດົມຄວາມຫ້າວຫັນ, ຄວາມເປັນເຈົ້າການແລະຫົວຄິດປະດິດສ້າງຂອງແມ່ຍິງອັນໄພສານໃຫ້ຫຼາຍເທົ່າທີ່ຈະຫຼາຍໄດ້, ເຮັດໃຫ້ເຂົາເຈົ້າມີຄວາມຮູ້ສຶກໄດ້ຮັບຜົນປະໂຫຍດ, ມີຄວາມສຸກແລະຄວາມປອດໄພເພີ່ມຂຶ້ນ. ພວກເຮົາຄວນເສີມຂະຫຍາຍບົດບາດຂອງລັດຖະບານ, ປຸກລະດົມກຳລັງຕ່າງໆໃນສັງຄົມຢ່າງກວ້າງຂວາງ ເພື່ອສະໜັບສະໜູນແລະຊ່ວຍແມ່ຍິງໃຫ້ໄດ້ມີຊີວິດທີ່ດີງາມ.
ສີ່, ເພີ່ມທະວີການຮ່ວມມືໃນດ້ານວຽກງານແມ່ຍິງທົ່ວໂລກ. ການພັດທະນາວຽກງານແມ່ຍິງແມ່ນບໍ່ສາມາດປາສະຈາກສະພາບແວດລ້ອມສາກົນທີ່ມີສັນຕິພາບແລະສະຫງົບປອດໄພ, ບໍ່ສາມາດປາສະຈາກການພັດທະນາແບບຍືນຍົງ ແລະບົດບາດປະສານງານອັນສຳຄັນຂອງອົງການສະຫະປະຊາຊາດໄດ້.ພວກເຮົາສະໜັບສະໜູນອົງການສະຫະປະຊາຊາດໃຫ້ບຸລິມະສິດແກ່ວຽກງານແມ່ຍິງ, ເພີ່ມການລົງທຶນເຂົ້າໃນບັນຫາຕ່າງໆທີ່ມີມາແຕ່ດົນແລ້ວເຊັ່ນ ການກຳຈັດການໃຊ້ຄວາມຮຸນແຮງ, ການຈຳແນກແລະລຶບລ້າງຄວາມທຸກຍາກເປັນຕົ້ນ, ແລະສ້າງຜົນງານໃນການຮັບມືກັບສິ່ງທ້າທາຍໃໝ່ເຊັ່ນ ແກ້ໄຂຄວາມແຕກໂຕນທາງເພດດ້ານດິຈີຕອນແລະອື່ນໆ, ເພື່ອເຮັດໃຫ້ເປົ້າໝາຍວຽກງານແມ່ຍິງກາຍເປັນຜົນງານເບື້ອງຕົ້ນໃນການບັນລຸເປົ້າໝາຍການພັດທະນາແບບຍືນຍົງຮອດປີ2030. ພວກເຮົາຍັງສະໜັບສະໜູນການຍົກສູງລັກສະນະຕົວແທນຂອງແມ່ຍິງໃນລະບົບອົງການສະຫະປະຊາຊາດ. ອົງການແມ່ຍິງແຫ່ງສະຫະປະຊາຊາດຄວນສ້າງໃຫ້ມີວິທີຮັກສາຄວາມສະເໝີພາບລະຫວ່າງຍິງ-ຊາຍໃຫ້ຫຼາຍຂຶ້ນ, ປັບປຸງແຜນພັດທະນາແມ່ຍິງທົ່ວໂລກໃຫ້ສົມບູນຂຶ້ນ.
ບັນດາເພື່ອນມິດ!
ຄວາມສະເໝີພາບລະຫວ່າງຍິງ-ຊາຍແມ່ນນະໂຍບາຍພື້ນຖານແຫ່ງຊາດຂອງຈີນ. ຈີນໄດ້ສ້າງລະບົບກົດໝາຍເພື່ອປົກປ້ອງສິດຜົນປະໂຫຍດຂອງແມ່ຍິງຢ່າງຮອບດ້ານທີ່ປະກອບມີ ກົດໝາຍກົດລະບຽບ100ກວ່າສະບົບ ເຊິ່ງໄດ້ຖືກອົງການອະນາໄມໂລກຈັດອັນດັບໃຫ້ເປັນໜຶ່ງໃນ 10 ປະເທດທີ່ມີປະສິດທິພາບສູງໃນດ້ານວຽກງານຮັກສາສຸຂະພາບແມ່ຍິງແລະເດັກນ້ອຍ, ໂດຍສາມາດລຶບລ້າງຄວາມແຕກໂຕນທາງເພດໃນດ້ານການສຶກສາພາກບັງຄັບໂດຍພື້ນຖານ, ການປະກອບອາຊີບຂອງເພດຍິງໃນທົ່ວສັງຄົມໄດ້ກວມຫຼາຍກວ່າ 40%, ໃນຈຳນວນຜູ້ສ້າງທຸລະກິດໃນຂົງເຂດອິນເຕີເນັດ, ເພດຍິງໄດ້ກວມຫຼາຍກວ່າເຄິ່ງໜຶ່ງ.
ເມື່ອ5ປີກ່ອນ, ຂ້າພະເຈົ້າໄດ້ລິເລີ່ມຈັດກອງປະຊຸມສຸດຍອດແມ່ຍິງໂລກ ໂດຍໄດ້ສະເໜີຂໍ້ລິເລີ່ມຕ່າງໆກ່ຽວກັບການຮ່ວມມືຂອງໂລກ ເຊິ່ງໄດ້ຮັບການຈັດຕັ້ງປະຕິບັດຢ່າງຮອບດ້ານແລ້ວ. ຈີນຈະສືບຕໍ່ເພີ່ມທະວີການສະໜັບສະໜູນວຽກງານແມ່ຍິງທົ່ວໂລກ. ໃນໄລຍະ 5 ປີຕໍ່ໜ້າ, ຈີນຈະບໍລິຈາກເງິນເພີ່ມອີກ 10 ລ້ານໂດລາສະຫະລັດໃຫ້ແກ່ອົງການແມ່ຍິງແຫ່ງສະຫະປະຊາຊາດ. ຈີນຈະສືບຕໍ່ສ້າງຕັ້ງລາງວັນການສຶກສາເດັກຍິງແລະແມ່ຍິງຈີນ-ອົງການ UNESCO ເພື່ອສະໜັບສະໜູນວຽກງານການສຶກສາຂອງເດັກຍິງແລະແມ່ຍິງທົ່ວໂລກ. ຈີນຂໍລິເລີ່ມໃຫ້ຈັດກອງປະຊຸມສຸດຍອດແມ່ຍິງໂລກອີກຄັ້ງໃນປີ 2025.
ທ່ານປະທານ!
ການສ້າງໂລກທີ່ບໍ່ຈຳແນກເພດຍິງ, ສ້າງສັງຄົມທີ່ພັດທະນາແບບກວມລວມ, ຍັງຕ້ອງເດີນຕາມເສັ້ນທາງທີ່ຍາວໄກ, ຍັງຕ້ອງສຸມຄວາມພະຍາຍາມຫຼາຍກວ່າເກົ່າ. ຂໍໃຫ້ພວກເຮົາຈົ່ງສືບຕໍ່ຮ່ວມມືກັນສຸມຄວາມພະຍາຍາມເພື່ອເລັ່ງລັດໃຫ້ບັນລຸເປົ້າໝາຍກ່ຽວກັບຄວາມສະເໝີພາບລະຫວ່າງຍິງ-ຊາຍແລະສົ່ງເສີມການພັດທະນາວຽກງານແມ່ຍິງທົ່ວໂລກ.
ຂອບໃຈ!
ຄຳເຫັນ
0