ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຄຳປາໄສຂອງທ່ານສີຈິ້ນຜິງທີ່ກ່າວໃນພິທີສະເຫຼີມສະຫຼອງການພັດທະນາແລະເປີດປະຕູສູ່ພາຍນອກຂອງຜູຕົ່ງນະຄອນຊຽງໄຮຈີນຄົບຮອບ 30 ປີ
(ວັນທີ 12 ພະຈິກ ປີ 2020)
ບັນດາທ່ານຍິງ, ທ່ານຊາຍ, ບັນດາສະຫາຍ:
ເມື່ອ 30 ປີກ່ອນ, ສະພາບການສາກົນໄດ້ມີການປ່ຽນແປງຢ່າງໃຫຍ່ຫຼວງ,ໃນໄລຍະນັ້ນ, ຈີນໄດ້ດຳເນີນການປະຕິຮູບຢ່າງຄຶກຄື້ນ, ສູນກາງພັກໄດ້ຄົ້ນຄວ້າແລະວິເຄາະສະ ພາບການພາຍໃນແລະສາກົນ, ໄດ້ກຳແໜ້ນສະພາບລວມແຫ່ງ ການປະຕິຮູບແລະການພັດທະນາ ໂດຍໄດ້ວາງມາດຕະການສຳຄັນໃນການພັດທະນາ ແລະເປີດປະຕູສູ່ພາຍນອກຂອງຜູຕົ່ງນະຄອນຊຽງໄຮ.
ມື້ນີ້, ພວກເຮົາໄດ້ມາເຕົ້າໂຮມກັນຢູ່ທີ່ນີ້ ເພື່ອສະເຫຼີມສະຫຼອງການພັດທະນາແລະ ເປີດປະຕູສູ່ພາຍນອກຂອງຜູຕົ່ງຄົບຮອບ 30 ປິ.
ກ່ອນອື່ນ, ຂ້າພະເຈົ້າຂໍຕາງໜ້າສູນກາງພັກ, ລັດຖະບານ ແລະຄະນະກຳມະການ ການທະຫານສູນກາງຈີນ ສະແດງຄວາມຊົມເຊີຍຢ່າງສຸດໃຈແລະສົ່ງຄວາມຢື້ຢາມ ຖາມຂ່າວທີ່ຈິງໃຈເຖິງພະນັກງານ ແລະປະຊາຊົນທັງຫຼາຍຢູ່ຊຽງໄຮ! ຂໍສະແດງຄວາມຂອບໃຈຢ່າງຈິງໃຈຕໍ່ພີ່ນ້ອງຮ່ວມຊາດຮົງກົງ, ມາກາວແລະໄຕ້ ຫວັນ, ຊາວຈີນຕ່າງດ້າວທີ່ອາໄສຢູ່ຕ່າງປະເທດແລະເພື່ອນມິດປະເທດຕ່າງໆທີ່ໄດ້ມີສ່ວນຮ່ວມໃນການພັດທະນາແລະເປີດປະຕູສູ່ພາຍນອກຂອງຜູຕົ່ງ.
ບັນດາທ່ານຍິງ, ທ່ານຊາຍ, ບັນດາສະຫາຍ!
30 ປີຜ່ານມານີ້, ເຂດຜູຕົ່ງໄດ້ຈັດຕັ້ງປະຕິບັດນະໂຍບາຍຂອງສູນກາງພັກຢ່າງມີຫົວຄິດປະດິດສ້າງ ເຊິ່ງໄດ້ຮັບຜົນສຳເລັດທີ່ປະຈັກຕາຕໍ່ຊາວໂລກ. ເສດຖະກິດໄດ້ມີ ການພັດທະນາແບບກ້າວກະໂດດ, ຍອດມູນຄ່າການຜະລິດໄດ້ເພີ່ມຂຶ້ນຈາກ 6 ຕື້ຢວນໃນປີ 1990 ເປັນ 1270 ຕື້ຢວນໃນປີ 2019, ລາຍຮັບດ້ານການເງິນໄດ້ເພີ່ມຂຶ້ນຈາກ 1,1 ຕື້ ຢວນໃນໄລຍະເປື້ອງຕົ້ນຂອງການພັດທະນາແລະການເປີດປະຕູສູ່ພາຍນອກເປັນ 400ກວ່າ ຕື້ຢວນໃນປີ 2019, ເນື້ອທີ່ຂອງເຂດຜູຕົ່ງເທົ່າກັບ 1/8000 ຂອງເນື້ອທີ່ທັງໝົດຂອງ ປະເທດ, ແຕ່ GDP ຂອງເຂດຜູຕົ່ງ ເທົ່າກັບ 1/80 ຂອງ GDP ທົ່ວປະເທດ ຈີນ ແລະ ຍອດມູນຄ່າສິນຄ້າຂາເຂົ້າຂາອອກຂອງເຂດຜູຕົ່ງເທົ່າກັບ1/15 ຂອງທົ່ວປະເທດ.ການປະຕິຮູບແລະເປີດປະຕູສູ່ພາຍນອກແມ່ນຢູ່ໃນແຖວໜ້າຂອງທົ່ວປະເທດ,ໃນນັ້ນ ໄດ້ ສ້າງເຂດການເງິນແລະການຄ້າແຫ່ງທຳອິດ, ເຂດປອດພາສີແຫ່ງທຳອິດ, ເຂດທົດລອງການຄ້າເສລີແຫ່ງທຳອິດ ແລະເຂດພັດທະນາໃໝ່ລິນກາງ, ບໍລິສັດການຄ້າທີ່ຕ່າງປະເທດລົງທຶນຝ່າຍດຽວແຫ່ງທຳອິດ ແລະອື່ນໆ.
ກຳລັງແຂ່ງຂັນຕົ້ນຕໍໄດ້ເພີ່ມຂຶ້ນຢ່າງຫຼວງຫຼາຍ, ໄດ້ສ້າງລະບົບອຸດສາຫະກຳທັນສະໄໝທີ່ຖືເອົາຂະແໜງການບໍລິການທັນສະໄໝເປັນຫຼັກ, ຂະແໜງການຈະເລີນໃໝ່ທີ່ມີລັກສະນະຍຸດທະສາດເປັນສິ່ງນຳໜ້າ, ອຸດສາຫະກຳການຜະລິດແບບທັນສະໄໝເປັນສິ່ງຄ້ຳຊູໂດຍພື້ນຖານ, ໄດ້ມີບົດບາດສຳຄັນໃນການສ້າງຊຽງໄຮໃຫ້ເປັນສູນກາງທາງດ້ານເສດຖະກິດສາກົນ, ສູນກາງທາງດ້ານການເງິນ, ສູນການຄ້າ, ສູນການຂົນສົ່ງທາງທະເລ, ແລະສູນປະດິດສ້າງໃໝ່ດ້ານວິທະຍາສາດເຕັກນິກ. ຊີວິດການເປັນຢູ່ຂອງປະຊາຊົນໄດ້ຖືກຍົກສູງຂຶ້ນໂດຍລວມ, ປີ 2019 ລາຍຮັບທີ່ຈັບຈ່າຍໄດ້ສະເລ່ຍຕໍ່ຫົວຄົນຂອງປະຊາຊົນໃນຕົວເມືອງ ແລະ ຊົນນະບົດມີເຖິງ 71647 ຢວນ, ອາຍຸຍືນສະເລ່ຍຕໍ່ຫົວຄົນໄດ້ເພີ່ມຂຶ້ນຈາກ 76,10ປີ ເມື່ອປີ 1993 ເປັນ 84,46ປີໃນປີ 2019, ເນື້ອທີ່ເຮືອນຢູ່ສະເລ່ຍຕໍ່ຫົວຄົນໃນຕົວເມືອງຈາກ 15 ຕາແມັດເມື່ອປີ 1993 ໄດ້ເພີ່ມຂຶ້ນເປັນ 42 ຕາແມັດ.
ພຶດຕິກຳຕົວຈິງໄດ້ພິສູດໃຫ້ເຫັນຢ່າງເຕັມສ່ວນວ່າ, ທິດສະດີພື້ນຖານ ແນວທາງພື້ນຖານ ແລະ ແຜນນະໂຍບາຍພື້ນຖານຂອງພັກທີ່ໄດ້ກຳນົດຂຶ້ນນັບແຕ່ກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນສະໄໝທີ 11ເປັນຕົ້ນມາແມ່ນຖືກຕ້ອງທີ່ສຸດ; ການປະຕິຮູບ ແລະ ເປີດປະຕູສູ່ພາຍນອກແມ່ນເສັ້ນທາງທີ່ຕ້ອງຜ່ານໃນການຍຶດໝັ້ນແລະ ພັດທະນາສັງຄົມນິຍົມທີ່ມີສີສັນພິເສດຂອງຈີນ ແລະ ເພື່ອບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ; ການປະຕິຮູບ ແລະການພັດທະນາຕ້ອງຍຶດໝັ້ນການຖືເອົາປະຊາຊົນເປັນໃຈກາງ, ຖືເອົາຄວາມປາຖະໜາຂອງປະຊາຊົນທີ່ຢາກມີຊີວິດການເປັນຢູ່ອັນດີງາມເປັນເປົ້າໝາຍສູ້ຊົນຂອງພວກເຮົາ, ອາໄສປະຊາຊົນ ສ້າງພາລະກິດອັນຍິ່ງໃຫຍ່ໃນປະຫວັດສາດ!
ບັນດາທ່ານຍິງ ທ່ານຊາຍ ແລະ ບັນດາສະຫາຍ!
ນັບແຕ່ປະຈຸບັນໄປຈົນຮອດກາງສະຕະວັດນີ້, ແມ່ນ 30 ປີທີ່ປະເທດຈີນຈະສ້າງປະເທດໃຫ້ເປັນປະເທດສັງຄົມນິຍົມທີ່ທັນສະໄໝ ເຂັ້ມແຂງໃຫ້ສຳເລັດຢ່າງຮອບດ້ານ. ປະຈຸບັນ, ໂລກພວມຜະເຊີນກັບການປ່ຽນແປງອັນໃຫຍ່ຫຼວງທີ່ບໍ່ເຄີຍມີມາໃນຮອບຮ້ອຍປີ, ການແຜ່ລະບາດຂອງພະຍາດໂຄວິດ-19ໄດ້ເຮັດໃຫ້ການປ່ຽນແປງນີ້ ຜັນແປໄວຂຶ້ນ, ລັດທິຝ່າຍດຽວ ແລະ ລັດທິປົກປ້ອງໄດ້ເພີ່ມຂຶ້ນ, ໂຄງປະກອບສາກົນໄດ້ມີການປັບປຸງຢ່າງເລິກເຊິ່ງ, ປັດໄຈທີ່ບໍ່ໝັ້ນທ່ຽງ ແລະ ບໍ່ແນ່ນອນໄດ້ເພີ່ມຂຶ້ນຢ່າງພົ້ນເດັ່ນ,ໃນໄລຍະຕໍ່ໜ້ານີ້, ພວກເຮົາຈະຜະເຊີນໜ້າກັບສະພາບແວດລ້ອມພາຍນອກທີ່ສັບສົນ ແລະມີການປ່ຽນແປງຫຼາຍກວ່າເກົ່າ. ຍິ່ງຜະເຊີນໜ້າກັບສິ່ງທ້າທາຍ, ພວກເຮົາຍິ່ງຕ້ອງປະຕິບັດຕາມກົດເກນປະຫວັດສາດທີ່ກ້າວເດີນໄປໜ້າ, ໄປຕາມທ່າອ່ຽງການພັດທະນາຂອງຍຸກສະໄໝ, ຕອບສະໜອງກັບຄວາມປາຖະໜາຂອງປະຊາຊົນ, ບັນລຸການພັດທະນາທີ່ມີຄຸນນະພາບສູງກວ່າເກົ່າພາຍໃຕ້ເງື່ອນໄຂທີ່ເປີດປະຕູສູ່ພາຍນອກຢ່າງກວ້າງຂວາງກວ່າເກົ່າ.
ສູນກາງພັກກຳລັງຄົ້ນຄວ້າເພື່ອຮ່າງ “ຂໍ້ສະເໜີວ່າດ້ວຍການສະໜັບສະໜູນເຂດໃໝ່ຜູຕົ່ງໃນການປະຕິຮູບແລະເປີດປະຕູສູ່ພາຍນອກໃນລະດັບສູງ, ສ້າງເຂດນຳໜ້າການສ້າງສັງຄົມນິຍົມທີ່ທັນສະໄໝ” ໂດຍຈະມອບໜ້າທີ່ສຳຄັນໃຫ້ເຂດໃໝ່ຜູຕົ່ງໃນການປະຕິຮູບແລະເປີດປະຕູສູ່ພາຍນອກ. ຜູຕົ່ງຕ້ອງກຳແໜ້ນກາລະໂອກາດແລະນຳໃຊ້ເງື່ອນໄຂທີ່ເອື້ອອຳນວຍຕາມສະພາບການ, ເພື່ອສະແດງໃຫ້ໂລກເຫັນເຖິງແນວຄວາມຄິດຂອງຈີນ, ນ້ຳໃຈຂອງຈີນແລະເສັ້ນທາງຂອງຈີນ. ດັ່ງນັ້ນ ຂ້າພະເຈົ້າຈຶ່ງສະເໜີວ່າ:
ໜຶ່ງ, ອອກແຮງສ້າງແຮງຂັບເຄື່ອນດ້ວຍການປະດິດສ້າງໃໝ່ໃຫ້ເຂັ້ມແຂງ, ສ້າງຈຸດຍຸດທະສາດໃໝ່ແຫ່ງການປະດິດສ້າງຢ່າງເປັນເຈົ້າຕົນເອງ. ຜູຕົ່ງຕ້ອງສ້າງຜົນງານໃຫຍ່ໃນດ້ານການປະດິດສ້າງໃໝ່ໃນຂົງເຂດວິທະຍາສາດເຕັກນິກຂັ້ນພື້ນຖານ, ຍາດເອົາຄວາມຄືບໜ້າທີ່ມີລັກສະນະບຸກທະລຸອັນໃຫຍ່ຫຼວງໃນຂົງເຂດເຕັກນິກແກນກາງສຳຄັນ, ເສີມຂະຫຍາຍບົດບາດໃນການເປັນແຫຼ່ງກຳເນີດຂອງການປະດິດສ້າງໃໝ່ດ້ານວິທະຍາສາດເຕັກນິກໃຫ້ມີປະສິດທິຜົນຫຼາຍກວ່າເກົ່າ.
ສອງ, ເພີ່ມທະວີການສ້າງລະບົບການປະຕິຮູບແບບສັງລວມໃຫ້ເຂັ້ມແຂງ, ກະຕຸ້ນຄວາມມີຊີວິດຊີວາແຫ່ງການພັດທະນາດ້ວຍຄຸນນະພາບສູງ. ຜູຕົ່ງຕ້ອງນຳໜ້າທົດລອງແລະຖອດຖອນບົດຮຽນໄປກ່ອນໃນການສ້າງລະບົບການປະຕິຮູບແບບສັງລວມແລະການປະສານງານຢ່າງມີປະສິດທິພາບສູງ. ສ້າງສະພາບແວດລ້ອມການດຳເນີນທຸລະກິດທີ່ສຸດຍອດຕາມຫຼັກການຕະຫຼາດ,ຄຸ້ມຄອງຕາມກົດໝາຍແລະເຊື່ອມໂຍງເຂົ້າກັບສາກົນ.
ສາມ, ລົງເລິກການຊຸກຍູ້ການເປີດປະຕູສູ່ພາຍນອກຈາກດ້ານລະບຽບການໃນລະດັບສູງ, ເພີ່ມທະວີການສ້າງທ່າແຮງໃໝ່ໃນດ້ານການຮ່ວມມືແລະການແຂ່ງຂັນສາກົນ. ການເປີດປະຕູສູ່ພາຍນອກເປັນນະໂຍບາຍພື້ນຖານແຫ່ງຊາດຈີນ, ເວລາໃດກໍບໍ່ຕ້ອງຫວັ່ນໄຫວຄອນແຄນ. ຂໍແຕ່ແມ່ນປະເທດ, ເຂດແຄວ້ນແລະວິສາຫະກິດທີ່ຍິນດີຮ່ວມມືກັບຈີນ, ພວກເຮົາກໍຈະຕັ້ງໜ້າຮ່ວມມືກັບເຂົາເຈົ້າ.
ສີ່: ເສີມສ້າງຄວາມສາມາດການຈັດສັນຊັບພະຍາກອນໃນທົ່ວໂລກ, ເພື່ອນຳໃຊ້ເຂົ້າໃນການສ້າງສະພາບການພັດທະນາອັນໃໝ່. ຕ້ອງນຳໃຊ້ຕະຫຼາດທັງພາຍໃນແລະສາກົນ, ນຳໃຊ້ຊັບພະຍາກອນທັງພາຍໃນແລະສາກົນໃຫ້ເປັນເອກະພາບກັນໃຫ້ດີກວ່າເກົ່າ, ເສີມສ້າງຄວາມສາມາດການຈັດສັນຊັບພະຍາກອນ, ຍົກສູງອິດທິພົນທີ່ມີຕໍ່ໂລກໃນການຈັດສັນປັດໄຈຕ່າງໆເຊັ່ນ ເງິນທຶນ, ຂໍ້ມູນຂ່າວສານ, ເຕັກໂນໂລຊີ, ຊັບພະຍາກອນມະນຸດ, ສິນຄ້າແລະອື່ນໆ.
ຫ້າ, ຍົກສູງລະດັບຄວາມທັນສະໄໝໃນການຄຸ້ມຄອງຕົວເມືອງ, ສ້າງສະພາບການໃໝ່ທີ່ເອື້ອອຳນວຍໃຫ້ແກ່ການສ້າງຕົວເມືອງປະຊາຊົນ. ການສ້າງຕົວເມືອງຕ້ອງຖືເອົາການສ້າງຕົວເມືອງທີ່ໜ້າຢູ່, ສະຫງົບສຸກໃຫ້ກັບປະຊາຊົນເປັນວຽກບູລິມະສິດ, ນຳເອົາຊັບພະຍາກອນທີ່ດີທີ່ສຸດມາໃຫ້ແກ່ປະຊາຊົນ. ຕ້ອງສຸມໃສ່ແກ້ໄຂບັນຫາຜົນປະໂຫຍດໂດຍກົງ ແລະຕົວຈິງທີ່ປະຊາຊົນໃຫ້ຄວາມສົນໃຈທີ່ສຸດ, ຍົກລະດັບຄວາມດຸນດ່ຽງ ແລະຄຸນນະພາບຂອງການບໍລິການສາທາລະນະໃຫ້ສູງຂຶ້ນຢ່າງບໍ່ຢຸດຢັ້ງ.
ອົງການທີ່ກ່ຽວຂ້ອງຂອງສູນກາງພັກ ແລະລັດຕ້ອງພິຈາລະນາຈາກສະພາບລວມ ແລະສຸມໃສ່ຍຸດທະສາດຂອງຊາດ, ຮ່ວມກັບນະຄອນຊຽງໄຮປະຕິບັດວຽກງານການອອກແບບໃນລະດັບສູງສຸດໃຫ້ດີ, ຕັ້ງໜ້າຄົ້ນຄວ້າ ແລະກຳນົດມາດຕະການລະອຽດເພື່ອສະໜັບສະໜູນການປະຕິຮູບ ແລະເປີດປະຕູສູ່ພາຍນອກໃນລະດັບສູງສຳລັບເຂດຜູຕົ່ງ, ຮ່ວມກັນຊຸກຍູ້ການຈັດຕັ້ງປະຕິບັດນະໂຍບາຍຕ່າງໆໃຫ້ມີປະສິດທິຜົນ.
ທ່ານຍິງ, ທ່ານຊາຍ ແລະບັນດາສະຫາຍ!
ຊຽງໄຮແມ່ນຕົວເມືອງທີ່ມີກຽດສະຫງ່າ, ເປັນສັກຂີພິຍານໃນການສ້າງສິ່ງມະຫັດສະຈັນຢ່າງບໍ່ຢຸດຢັ້ງ. ໃນຂະບວນການພັດທະນາ ແລະການເປີດປະຕູສູ່ພາຍນອກ 30 ປີຢູ່ເຂດຜູຕົ່ງ, ດິນແດນແຫ່ງນີ້ໄດ້ເດີນຕາມເສັ້ນທາງແຫ່ງການປົດປ່ອຍແນວຄິດ ແລະລົງເລິກການປະຕິຮູບ, ເສັ້ນທາງແຫ່ງການມຸ້ງໜ້າສູ່ໂລກ ແລະເປີດກວ້າງການເປີດປະຕູສູ່ພາຍນອກ, ເສັ້ນທາງແຫ່ງການທັບມ້າງລະບຽບການເກົ່າ ແລະປະດິດສ້າງໃໝ່. ການຫມຸ້ງໜ້າສູ່ອະນາຄົດ, ພວກເຮົາມີຄວາມໝັ້ນໃຈຢ່າງເຕັມສ່ວນວ່າ: ບົນເສັ້ນທາງແຫ່ງການພັດທະນາຂອງຈີນໃນຍຸກໃໝ່ ນະຄອນຊຽງໄຮຍ່ອມຈະສາມາດສ້າງສິ່ງມະຫັດສະຈັນທີ່ປະຈັກຕາຕໍ່ຊາວໂລກໄດ້ຢ່າງແນ່ນອນ, ຕ້ອງສາມາດສ່ອງແສງໃຫ້ເຫັນສະພາບການໃໝ່ໃນການສ້າງປະເທດສັງຄົມນິຍົມທີ່ທັນສະໄໝ.
ຄຳເຫັນ
0