ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 20 ພະຈິກນີ້, ກອງປະຊຸມບໍ່ເປັນທາງການຂອງຜູ້ນຳອົງການການຮ່ວມມືເສດຖະກິດອາຊີ-ປາຊີຟິກ ຫຼື APEC ຄັ້ງທີ 27 ໄດ້ຈັດຂຶ້ນ ເຊິ່ງທີ່ປະຊຸມໄດ້ປະກາດວ່າ ໄດ້ບັນລຸ “ເປົ້າໝາຍໂບໂກຄືການຄ້າ ແລະການລົງທຶນຫັນເປັນແບບເສລີ ແລະສະດວກ”, ທ່ານຢາງເຈິ້ງເວີຍ ຮອງຫົວໜ້າກົມສາກົນຂອງກະຊວງການຄ້າຈີນກ່າວວ່າ: ໃນໄລຍະ 26 ປີຜ່ານມາ, ການຫັນການຄ້າ ແລະການລົງທຶນໃຫ້ມີຄວາມສະດວກ ແລະເສລີຂອງອາຊີ-ປາຊີຟິກໄດ້ຮັບໝາກຜົນທີ່ປະຈັກຕາຕໍ່ຊາວໂລກ. ການຄ້າ ແລະການລົງທຶນມີຈັງຫວະການເຕີບໂຕຢ່າງສູງ, ມູນຄ່າການຄ້າເພີ່ມຂຶ້ນ 5 ເທົ່າ. ລະດັບຄວາມສະດວກ ແລະເສລີໄດ້ຍົກສູງຂຶ້ນຢ່າງຫຼວງຫຼາຍ, ລະດັບພາສີສະເລ່ຍໄດ້ຫຼຸດລົງຈາກ 13,9% ເປັນ 5,2%.
ທ່ານກ່າວຕື່ມວ່າ: ຈີນໄດ້ປະກອບສ່ວນຢ່າງໃຫຍ່ຫຼວງເຂົ້າໃນການບັນລຸ “ເປົ້າໝາຍໂບໂກ”, ລະດັບພາສີສະເລ່ຍໄດ້ຫຼຸດລົງຈາກ 23,6% ເຫຼືອພຽງ 7,5%, ການຄ້າການບໍລິການໄດ້ເປີດປະຕູສູ່ພາຍນອກຫຼາຍຂຶ້ນຢ່າງພົ້ນເດັ່ນ ແລະໄດ້ຫຼຸດຜ່ອນເງື່ອນໄຂໃນການອະນຸມັດເຂົ້າເຖິງຕະຫຼາດສັງລັບວິສາຫະກິດຕ່າງປະເທດໃຫ້ໜ້ອຍລົງຢ່າງບໍ່ຢຸດຢັ້ງ, ນອກຈາກນີ້, ຈີນຍັງໄດ້ສະໜອງຜະລິດຕະພັນສາທາລະນະສາກົນເພື່ອຊຸກຍູ້ການຄ້າ ເຊັ່ນ: ງານວາງສະແດງສິນຄ້ານຳເຂົ້າສາກົນຈີນ ແລະອື່ນໆ.
ກອງປະຊຸມດັ່ງກ່າວຍັງໄດ້ຮັບຮອງ “ວິໄສທັດປູຕຣາຈາຢາຂອງອົງການການຮ່ວມມືເສດຖະກິດອາຊີ-ປາຊີຟິກຮອດປີ 2040”. ທ່ານຢາງເຈິ້ງເວີຍກ່າວວ່າ: ວິໄສທັດໃໝ່ໄດ້ໃຫ້ຄຳໝັ້ນສັນຍາຈະສະໜັບສະໜູນລະບົບການຄ້າຫຼາຍຝ່າຍເປັນເວລາຍາວນານ ເຊິ່ງໄດ້ສະແດງຄວາມຕັດສິນໃຈໃນການຊຸກຍູ້ການເຊື່ອມໂຍງເຂົ້າເປັນອັນໜຶ່ງອັນດຽວກັນຂອງພາກພື້ນຢ່າງເດັດດ່ຽວໜຽວແໜ້ນ, ໄດ້ກຳແໜ້ນລັກສະນະຍຸກເສດຖະກິດດີຈີຕອນພັດທະນາຢ່າງແຂງແຮງ ເຊິ່ງຈະສ້າງກຳລັງຊຸກດັນໃມ່ໃຫ້ແກ່ການຂະຫຍາຍຕົວຂອງເສດຖະກິດອາຊີ-ປາຊີຟິກ.
ຄຳເຫັນ
0