ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ເລື່ອງທີ່ຂ້າພະເຈົ້າເປັນຫ່ວງເປັນໃຍທີ່ສຸດກໍແມ່ນປະຊາຊົນຜູ້ທຸກຍາກ, ກນກິນການຢູ່ຂອງເຂົາເຈົ້າເປັນແນວໃດ, ສາມາດສະເຫຼີມສະຫຼອງບຸນປີໃໝ່ ແລະບຸນກຸດຈີນຢ່າງມ່ວນຊື່ນໄດ້ຫຼືບໍ່?” ຄຳອວຍພອນປີໃໝ່ປີ 2017 ຂອງທ່ານສີຈິ້ນຜິງ ປະທານປະເທດຈີນກ່ຽວກັບຄວາມເປັນຫ່ວງເປັນໃຍຜູ້ທຸກຍາກໄດ້ສ້າງຄວາມປະທັບໃຈໃຫ້ປະຊາຊົນທົ່ວປະເທດຈີນຢ່າງເລິກເຊິ່ງ.
ວັນທີ 23 ພະຈິກນີ້, ອົງການປົກຄອງແຂວງກຸ້ຍໂຈ່ວໄດ້ປະກາດວ່າ: 9 ເມືອງທຸກຍາກທີ່ຍັງເຫຼືອສຸດທ້າຍໄດ້ຖອນອອກຈາກບັນຊີເມືອງທຸກຍາກໝົດແລ້ວ. ສະນັ້ນ, ເມືອງທຸກຍາກທັງໝົດ 832 ເມືອງຂອງຈີນກໍໄດ້ຫຼຸດພົ້ນອອກຈາກຄວາມທຸກຍາກໝົດແລ້ວ.
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ສູນກາງພັກທີ່ມີສະຫາຍສີຈິ້ນຜິງເປັນແກນກາງນັ້ນໄດ້ຖືເອົາການຫຼຸດພົ້ນອອກຈາກຄວາມທຸກຍາກຂອງປະຊາກອນຜູ້ທຸກຍາກເປັນໜ້າທີ່ພື້ນຖານ ແລະເປັນຕົວຊີ້ວັດທີ່ມີລັກສະນະເປັນສັນຍາລັກຂອງການສ້າງສັງຄົມທີ່ອິ່ມໜຳສຳລານໃຫ້ສຳເລັດຢ່າງຮອບດ້ານ ເຊິ່ງໄດ້ພາກັນເລີ່ມສູ້ຊົນໃນບັ້ນລຶບລ້າງຄວາມທຸກຍາກໃນທົ່ວປະເທດ ແລະໄດ້ສ້າງສິ່ງອັດສະຈັນເປັນຄັ້ງປະຫວັດສາດໃນການຫຼຸດຜ່ອນຄວາມທຸກຍາກຂອງມວນມະນຸດ.
ວັນທີ 26 ກຸມພາປີ 2017, ເມືອງຈິງກັ່ງຊ່ານແຂວງຈ່ຽງຊີ່ໄດ້ປະກາດວ່າ: ໄດ້ຫຼຸດພົ້ນອອກຈາກຄວາມທຸກຍາກກ່ອນໝູ່ໃນຈີນ. ເມື່ອຮອດທ້າຍປີ 2016, ອັດຕາການເກີດຄວາມທຸກຍາກຂອງເມືອງຈິງກັ່ງຊ່ານໄດ້ຫຼຸດລົງຍັງເຫຼືອ 1,6%, ເຊິ່ງແມ່ນເມືອງທຸກຍາກທຳອິດທີ່ໄດ້ຫຼຸດພົ້ນອອກຈາກຄວາມທຸກຍາກພາຍຫຼັງໄດ້ສ້າງກົນໄກການອອກຈາກຄວາມທຸກຍາກຂອງຈີນ.
ການພັດທະນາອຸດສາຫະກຳ, ການຍົກຍ້າຍຖິ່ນຖານ, ຄ່າຊົດເຊີຍດ້ານສິ່ງແວດລ້ອມນິເວດ…ໃນເບື້ອງຫຼັງການຫຼຸດພົ້ນອອກຈາກຄວາມທຸກຍາກຂອງແຕ່ລະຄອບຄົວທຸກຍາກ, ກໍແມ່ນໂຄງການທີ່ເປັນລະບົບ ແລະບັ້ນຮົບທີ່ຕ້ອງບຸກບືນສູ້ຊົນ. ນັບແຕ່ປີ 2013 ເປັນຕົ້ນມາ, ສາມາດຫຼຸດຈຳນວນຜູ້ທຸກຍາກໄດ້ຫຼາຍກວ່າ 93 ລ້ານຄົນ, ສາມາດຫຼຸດຈຳນວນຜູ້ທຸກຍາກໄດ້ໂດຍສະເລ່ຍຕໍ່ປີແມ່ນ 10 ລ້ານຄົນຂຶ້ນໄປ, ພາຍໃຕ້ຄວາມພະຍາຍາມໃນປີ 2020, ປະຊາຊົນຜູ້ທຸກຍາກສ່ວນທີ່ຍັງເຫຼືອນັ້ນກໍຈະຫຼຸດພົ້ນອອກຈາກຄວາມທຸກຍາກທັງໝົດຕາມເວລາກຳນົດ.
ຕົກທຸກໄດ້ຍາກມາແຕ່ດົນນານແລ້ວ, ກໍມີຄວາມປາຖະໜາຢາກມີຊີວິດທີ່ອິ່ມໜຳສຳລານ. ຄວາມໃຝ່ຝັນພັນປີທີ່ຈະຫຼຸດພົ້ນອອກຈາກຄວາມທຸກຍາກຢ່າງສິ້ນເຊິງ ແລະບັນລຸເປົ້າໝາຍໃນການສ້າງສັງຄົມທີ່ອິ່ມໜຳສຳລານຢ່າງຮອບດ້ານຂອງຊົນຊາດຈີນນັ້ນຈະກາຍເປັນຈິງໃນລຸ້ນພວກເຮົານີ້.
ຄຳເຫັນ
0