ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕອນເຊົ້າວັນທີ 14 ມັງກອນນີ້, ຢູ່ນະຄອນຫຼວງຈາກາຕາຂອງອິນໂດເນເຊຍ, ຮອງລັດຖະມົນຕີກະຊວງສາທາລະນະສຸກ ແລະ ພະນັກງານການແພດຫຼາຍສິບຄົນໄດ້ສັກວັກຊີນຕ້ານເຊື້ອພະຍາດໂຄວິດ-19 ຫຼື Corona Vac ທີ່ຜະລິດໂດຍບໍລິສັດເຕັກໂນໂລຊີຊີວະພາບເຄີ່ຊີ່ນຂອງຈີນ. ນັບແຕ່ນີ້ເປັນຕົ້ນໄປ, ອິນໂດເນເຊຍໄດ້ເລີ່ມສັກວັກຊີນຕ້ານເຊື້ອພະຍາດໂຄວິດ-19ໂດຍບໍ່ເກັບຄ່າໃຫ້ແກ່ປະຊາຊົນຢ່າງຂະໜາດໃຫຍ່ໂດຍແບ່ງເປັນແຕ່ລະໄລຍະ.
ອິນໂດເນເຊຍແມ່ນປະເທດທີ່ມີການແຜ່ລະບາດຂອງພະຍາດໂຄວິດ-19ຢ່າງຮ້າຍແຮງຢູ່ພາກພື້ນອາຊີຕາເວັນອອກສຽງໃຕ້, ເຖິງວ່າລັດຖະບານ ແລະ ທາງສັງຄົມໄດ້ໃຊ້ມາດຕະການຕ່າງໆແລ້ວກໍຕາມ, ແຕ່ຈຳນວນຜູ້ເປັນພະຍາດໂຄວິດ-19 ທີ່ເພີ່ມໃໝ່ໃນທຸກມື້ຍັງຢູ່ໃນລະດັບສູງ. ລັດຖະບານອິນໂດເນເຊຍໄດ້ຖືເອົາວັກຊີນເປັນຄວາມຫວັງສຳຄັນໃນການເອົາຊະນະພະຍາດໂຄວິດ-19, ແລະໄດ້ເລືອກເອົາຈີນເປັນຄູ່ຮ່ວມມືດ້ານການຄົ້ນຄວ້າຜະລິດວັກຊີນ. ໃນຫຼາຍເດືອນຜ່ານມານີ້, ການຮ່ວມມືຄົ້ນຄວ້າວັກຊີນລະຫວ່າງສອງປະເທດໄດ້ຮັບຄວາມຄືບໜ້າ ແລະ ໄດ້ຮັບໝາກຜົນຫຼາຍກວ່າລະດັບຄາດໝາຍ, ເຊິ່ງກາຍເປັນຈຸດເດັ່ນໃນການຮ່ວມມືຕ້ານກັບພະຍາດໂຄວິດ-19 ລະຫວ່າງສອງປະເທດ.
ຕອນເຊົ້າວັນທີ 13 ມັງກອນນີ້, ທ່ານໂຈໂກ ວິໂດໂດ ປະທານາທິບໍດີອິນໂດເນເຊຍໄດ້ສັກວັກຊີນ Corona Vacຂອງບໍລິສັດເຄີ່ຊິ່ນຈີນຢູ່ທີ່ທຳນຽບປະທານາທິບໍດີທີ່ນະຄອນຫຼວງຈາກາຕາ, ເຊິ່ງທ່ານເປັນຜູ້ທຳອິດທີ່ສັກວັກຊີນຕ້ານເຊື້ອພະຍາດໂຄວິດ -19 ພາຍໃນປະເທດອິນໂດເນເຊຍ. ໃນກອງປະຊຸມຖະແຫຼງຂ່າວຫຼັງຈາກການສັກວັກຊີນ, ທ່ານໂຈໂກກ່າວວ່າ, ການສັກວັກຊີນຕ້ານເຊື້ອພະຍາດໂຄວິດ-19 ມີຄວາມສຳຄັນຫຼາຍ, ຈະມີຜົນດີຫຼາຍຕໍ່ການຕັດຊ່ອງທາງການແຜ່ລະບາດຂອງເຊື້ອພະຍາດ, ທັງເປັນການຮັບປະກັນຄວາມປອດໄພດ້ານສຸຂະພາບໃຫ້ແກ່ປະຊາຊົນອິນໂດເນເຊຍ, ທັງມີຜົນດີຕໍ່ການເລັ່ງລັດຂະບວນການຟື້ນຟູເສດຖະກິດ.
ຄຳເຫັນ
0