ຈິນໃຫ້ຄວາມສຳຄັນຊ່ວຍເຫລືອຜູ້ທຸກຍາກ
*ມັນເປັນຄຳຖາມ ແລະ ເປັນຄວາມສົນໃຈຂອງທົ່ວໂລກເມື່ອສປ ຈີນ ທີ່ມີປະຊາກອນກວ່າ 1,3 ຕື້ຄົນນັ້ນ, ພັກ-ລັດຖະບານ ໄດ້ຄຸ້ມຄອງບັນຊາແນວໃດໂດຍສະເພາະການເຮັດໃຫ້ປະຊາຊົນສາມາດຫລຸດພົ້ນອອກຈາກຄວາມທຸກຍາກໄດ້ເປັນຈຳນວນຫລາຍໃນແຕ່ລະປີ ດັ່ງປີຜ່ານມາກໍສາມາດແກ້ໄຂຄວາມທຸກຍາກຂອງປະຊາ ຊົນໄດ້ເຖິງ 12,4 ລ້ານຄົນ
ເມື່ອຜູ້ຂຽນໄດ້ສຶກສາຄົ້ນຄວ້າເນື້ອໃນບົດລາຍງານວຽກງານຂອງລັດຖະບານຈີນປີ 2016 ທີ່ທ່ານ ຫລີເຄີສຽງ ນາຍົກລັດຖະມົນຕີ ລາຍງານຕໍ່ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 5 ຊຸດທີ 12 ໃນວັນທີ 5 ມີນານີ້ ຈຶ່ງໄດ້ເຫັນ ແລະ ຮັບຮູ້ຄວາມເປັນຈິງໃນການຕອບໂຈດທີ່ຕັ້ງໄວ້ຄືໜຶ່ງ:ລັດຖະບານ ໄດ້ເນັ້ນການພັດທະນາລະຫວ່າງເຂດແຄວ້ນ,ຕົວເມືອງ-ຊົນນະບົດ,ຈຸດເຕີບໃຫຍ່ໃໝ່ແລະເຂດເຕີບໃຫຍ່ໃໝ່ດ້ວຍຄວາມເປັນເອກະພາບ,ກົມກຽວ,ວ່ອງໄວທັງເປັນຮູບປະທຳ.ຂະນະທີ່ສອງກໍຄືການສ້າງວຽກເຮັດງານທຳໂດຍການ ຈັດສັນກໍຄືການປະກອບອາຊີບໃຫ້ແກ່ປະຊາຊົນກໍເປັນອີກໜຶ່ງຈຸດພົ້ນເດັ່ນທີ່ລັດຖະບານໃຫ້ຄວາມສຳຄັນຊີ້ນຳຢ່າງຕໍ່ເນື່ອງໄປພ້ອມກັນກັບການສົ່ງເສີມຕະຫລາດແຮງງານທີ່ສາມາດຮອງຮັບກຳລັງແຮງງານໃໝ່.ອີກດ້ານໜຶ່ງກໍຄືລັດຖະບານສາມາດກະຕຸ້ນ ການດຳເນີນທຸລະກິດຂອງປະຊາຊົນທີ່ເນັ້ນການປະດິດສ້າງໃໝ່ ໄດ້ເປັນບໍລິເວນກວ້າງລວມທັງການເລັ່ງຈັດສຳພູມລຳເນົາໃຫ້ແກ່ປະຊາຊົນເພື່ອຫລຸດຜ່ອນຄວາມທຸກຍາກແລະທັງຫລາຍ ທັງປວງເຫລົ່ານີ້ສາມາດຍົກລະດັບຊີວິດການເປັນຢູ່ຂອງປະຊາຊົນທັງຢູ່ຊົນນະບົດແລະຕົວເມືອງສູງຂຶ້ນ.
ຜົນງານການແກ້ໄຂບັນຫາດັ່ງກ່າວໄດ້ເປັນສ່ວນສຳຄັນເຮັດໃຫ້ປະຊາຊົນບັນດາເຜົ່າເຫັນ ແລະ ເຊື່ອໝັ້ນຢ່າງຕາຍໃຈຕໍ່ການນຳພາຂອງພັກ-ລັດ,ປະຊາຊົນເອງກໍສ້າງກຳລັງໃຈ,ສ້າງສະຕິປັນຍາ ແລະຄວາມສາມາດດ້ວຍຕົນເອງຜ່ານຜ່າຄວາມຫຍຸ້ງຍາກທຸກປະການກ້າວມາສູ່ການໄດ້ຮັບຜົນປະໂຫຍດຢ່າງມາກມາຍຈາກນະໂຍບາຍຂອງພັກ-ລັດຖະຖານທີ່ເວລາໃດກໍຫລິງເຫັນຮອຍຍິ້ມ,ຄວາມມັ່ງຄັ່ງຮັ່ງມີຂອງປະຊາຊົນ ແລະ ອ້າແຂນຫອບອູ້ມເອົາປະຊາຊົນມາຢູ່ໃນຫົວໃຈຂອງຕົນ.ຂະນະທີ່ພະນັກງານສະມາຊິກພັກ ກໍເຮັດແທ້ທຳຈິງໂດຍການປົດຮູບການມາສູ່ການປະຕິບັດໂຕຈິງທັງຢູ່ໃຕ້ການກວດກາກວດສອບຂອງຂັ້ນເທິງ ແລະ ປະຊາຊົນເອງ. ສຸດທ້າຍແລ້ວທັງການນຳພັກ-ລັດ,ພະນັກງານສະມາຊິກພັກ ແລະ ທຸກຊັ້ນຄົນ ໄດ້ເປັນຈິດໜຶ່ງໃຈດຽວປິ່ນອ້ອມ ແລະ ພ້ອມກັນໄຂກະແຈນະໂຍບາຍ ການສ້າງສັງຄົມອີ່ມໜຳສຳລານ ນັ້ນເອງ.