ການຮ່ວມມືໃນການຫຼຸດຜ່ອນຄວາມທຸກຍາກລະຫວ່າງລາວ-ຈີນໄດ້ຮັບໝາກຜົນອັນຈົບງາມ
ຈີນໄດ້ນຳພາບັນລຸເປົ້າໝາຍພັດທະນາສະຫັດສະວັດຂອງສະຫະປະຊາຊາດໃນການຫຼຸດຜ່ອນຄວາມທຸກຍາກ.ຫຼັງພັດທະນາມາເປັນເວລາຫຼາຍປີ,ເຂດຊົນນະບົດຂອງຈີນໄດ້ຫຼຸດຜ່ອນສະພາບຄວາມທຸກຍາກໄດ້ໂດຍ ພື້ນຖານ, ໂຄງປະກອບການຜະລິດແລະປະກອບອາຊີບຢູ່ເຂດຊົນນະບົດກໍໄດ້ຮັບການປັບປຸງດີຂຶ້ນຢ່າງພົ້ນເດັ່ນ.
ສຳລັບລາວນັ້ນໃນກອງປະຊຸມໃຫຍ່ຄັ້ງທີ10ຂອງພັກປະຊາຊົນປະຕິບັດລາວໄດ້ຕັ້ງເປົ້າໝາຍພັດທະນາ ຄືໃຫ້ສາມາດຫຼຸດພົ້ນຈາກເປັນປະເທດດ້ອຍພັດທະນາໃນປີ2020, ແລະເປົ້າໝາຍນີ້ກໍໄດ້ກຳນົດໄວ້ໃນແຜນການພັດທະນາເສດຖະກິດສັງຄົມ5ປີຄັ້ງທີ8.ເຊິ່ງທັງຫຼາຍທັງປວງຂອງພົນສຳເລັດນັ້ນ,ການໄດ້ຮັບການຊ່ວຍເຫຼືອແລະຮ່ວມມືຈາກເພື່ອນມິດສາກົນກໍຄືເປັນສ່ວນສຳຄັນເປັນຕົ້ນ ສປຈີນ. ໃນຊຸມປີມໍ່ໆມານີ້,ສອງປະເທດລາວຈີນໄດ້ຮ່ວມມືໃນການພັດທະນາຊົນນະບົດແລະຫຼຸດຜ່ອນຄວາມທຸກຍາກ, ເຊິ່ງກໍໄດ້ຮັບໝາກຜົນຢ່າງຈົບງາມ.
ສໍາລັບກົນໄກການຮ່ວມມືສອງຝ່າຍນັ້ນ,ລັດຖະບານຈີນໄດ້ຊ່ວຍຍົກລະດັບວິຊາການລາວໂດຍການຈັດຊຸດອົບຮົມໃຫ້,ຊຸກຍູ້ການແລກປ່ຽນບົດຮຽນ,ວິເຄາະບັນຫາແລະສິ່ງທ້າທາຍໃນການພັດທະນາຊົນນະບົດແລະຫຼຸດຜ່ອນຄວາມທຸກຍາກຂອງສອງປະເທດ,ກຳແໜ້ນຄວາມຕ້ອງການໃນການຫຼຸດຜ່ອນຄວາມທຸກຍາກ,ເຊິ່ງເປັນການສ້າງພື້ນຖານອັນໜັກແໜ້ນໃຫ້ແກ່ການຮ່ວມມືສອງຝ່າຍ.
ນອກນີ້,ຈີນຍັງໄດ້ປະຕິບັດໂຄງການຫຼຸດຜ່ອນຄວາມທຸກຍາກພາຍໃຕ້ຂອບສອງຝ່າຍແລະຫຼາຍຝ່າຍ,ໂດຍສິ່ງ ທີ່ພົ້ນເດັ່ນຄື, ໃນເດືອນພະຈິກປີ2014, ໃນກອງປະຊຸມສຸດຍອດອາຊຽນກັບຈີນ,ຍີ່ປຸ່ນແລະສ.ເກົາຫຼີ,ທ່ານນາຍົກຫຼີເຄີ້ຊຽງຂອງຈີນໄດ້ວາງ "ຂໍ້ລິເລີ່ມຫຼຸດຜ່ອນຄວາມທຸກຍາກໃນອາຊີຕາເວັນອອກ".ເດືອນທັນວາປີ2016,ໂຄງການທົດລອງການຮ່ວມມືຫຼຸດຜ່ອນຄວາມທຸກຍາກອາຊີຕາເວັນອອກໄດ້ເລີ່ມຕົ້ນຢ່າງເປັນທາງການຢູ່ນະຄອນຫຼວງວຽງຈັນ.ໃນນັ້ນ, ໂຄງການທົດລອງຫຼຸດຜ່ອນຄວາມທຸກຍາກທີ່ຈີນຊ່ວຍເຫຼືອລາວນັ້ນຈະຖອດຖອນບົດຮຽນຈາກງຈີນ,ໂດຍອີງຕາມທ່າແຮງແລະຈຸດພິເສດຂອງທ້ອງຖິ່ນ,ວາງມາດຕະການຫຼຸດຜ່ອນຄວາມທຸກຍາກຢ່າງຕິດແທດຄວາມເປັນຈິງ,ເພື່ອສ້າງເງື່ອນໄຂໃຫ້ແກ່ການຜະລິດແລະການດຳລົງຊີວິດຂອງປະຊາຊົນ,ເພີ່ມທະວີຄວາມສາມາດໃນການພັດທະນາດ້ວຍຕົນເອງ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.ອີງຕາມໂຄງການດັ່ງກ່າວ,ໃນ3ປີຕໍ່ໜ້ານີ້,ຈີນຈະກໍ່ສ້າງພື້ນຖານໂຄງລ່າງ, ສະໜັບສະໜູນຂະແໜງການກະສິກຳ, ປັບປຸງສະພາບແວດລ້ອມຂອງເຂດຊຸມຊົນ, ຊ່ວຍເຫຼືອດ້ານວັດຖຸແລະຈັດຊຸດອົບຮົມຕ່າງໆ,ທັງນີ້ກໍ່ເພື່ອປັບປຸງເງື່ອນໄຂການຜະລິດແລະດຳລົງຊີວິດຂອງຊາວບ້ານໃຫ້ດີຂຶ້ນ, ແລະເພີ່ມຄວາມມີຊີວິດຊີວາຂອງເຂດທົດລອງ.
