ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງກ່ອນນີ້ບໍ່ດົນ, ທ່ານໂທເມຕັນຣູກ ນາຍົກລັດຖະມົນຕີຕີມໍເລັສເຕໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຊ່ຽວຈ້ຽນໂກວ ເອກອັກຄະລັດຖະທູດຈີນປະຈຳຕີມໍເລັສເຕ, ທ່ານຣູກໄດ້ສະແດງຄວາມຂອບໃຈຢ່າງຈິງໃຈຕໍ່ລັດຖະບານແລະປະຊາຊົນຈີນ, ວິສາຫະກິດຈີນ, ຊາວຈີນທີ່ຢູ່ຕີມໍເລັສເຕແລະຄົນຕີມໍເລັສເຕເຊື້ອສາຍຈີນທີ່ໄດ້ຮ່ວມກັນກັບປະຊາຊົນຕີມໍເລັສເຕຜ່ານຜ່າຄວາມຫຍຸ້ງຍາກໃນເວລາປະສົບໄພນ້ຳຖ້ວມ, ທັງໄດ້ໃຫ້ການສະໜັບສະໜູນແລະ ຊ່ວຍເຫຼືອອັນລ້ຳຄ່າແກ່ຕີມໍເລັສເຕໃນການຕ້ານໄພແລະກູ້ໄພ. ທ່ານຫວັງວ່າ: ຈີນຈະຕັ້ງໜ້າເຂົ້າຮ່ວມແຜນການສ້າງສາພັດທະນາຕີມໍເລັສເຕຄືນໃໝ່ ເພື່ອຊ່ວຍຕີມໍເລັສເຕຜ່ານຜ່າຄວາມຫຍຸ້ງຍາກໃນປັດຈຸບັນ.
ຕົ້ນເດືອນເມສານີ້, ເຂດແຄວ້ນສ່ວນໃຫຍ່ໃນທົ່ວປະເທດຕີມໍເລັສເຕໄດ້ປະສົບໄພພິບັດຈາກຝົນຕົກໜັກ, ກອງທຶນເພື່ອເດັກນ້ອຍຂອງອົງການສະຫະປະຊາຊາດຫຼື ຢູນີເຊັຟ ໄດ້ເຜີຍແຜ່ບົດລາຍງານການປະເມີນຜົນໄພພິບັດໂດຍຊີ້ໃຫ້ເຫັນວ່າ ໄພນ້ຳຖ້ວມແລະ ພູເຈື່ອນໄດ້ເຮັດໃຫ້ທົ່ວປະເທດຕີມໍເລັສເຕມີຜູ້ເສຍຊີວິດ 45 ຄົນ, ປັດຈຸບັນຍັງມີຫຼາຍກວ່າ 8000 ຄົນໄດ້ຖືກຍົກຍ້າຍໄປສະຖານທີ່ປອດໄພ. ຕີມໍເລັສເຕໄດ້ປະກາດວ່າ ປະເທດຕົນເຂົ້າສູ່ພາວະໄພພິບັດນັບແຕ່ວັນທີ 8 ເມສານີ້ເປັນຕົ້ນໄປ.
ພາຍຫຼັງໄພພິບັດເກີດຂຶ້ນແລ້ວ, ສະມາຄົມວິສາຫະກິດຈີນຢູ່ຕີມໍເລັສເຕໄດ້ອອກແຈ້ງການກ່ຽວກັບການບໍລິຈາກເພື່ອຊ່ວຍເຫຼືອຕີມໍເລັສເຕຕ້ານໄພນ້ຳຖ້ວມໄປເຖິງສະມາຊິກໃນສະມາຄົມຂອງຕົນຢ່າງທັນເວລາ, ສ່ວນວິສາຫະກິດຈີນຢູ່ຕີມໍເລັສເຕກໍໄດ້ຕອບຮັບແຈ້ງການດັ່ງກ່າວຢ່າງຕັ້ງໜ້າ, ໂດຍໄດ້ດຳເນີນການເຄື່ອນໄຫວຢ່າງຮີບດ່ວນເຂົ້າໃນການປະຕິບັດວຽກງານກູ້ໄພ. ວິສາຫະກິດຈີນຍັງໄດ້ສົ່ງພະນັກງານໄປເຂົ້າຮ່ວມວຽກງານກູ້ໄພຢູ່ນະຄອນຫຼວງດີລີ ເພື່ອຊ່ວຍອົງການປົກຄອງທ້ອງຖິ່ນຍົກຍ້າຍປະຊາຊົນໄປສະຖານທີ່ປອດໄພ.
ຄຳເຫັນ
0