ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ30ເມສາແລ້ວນີ້ ກົມຕິດຕາມຄຸ້ມຄອງຢາແລະອາຫານຂອງອິນໂດເນເຊຍປະກາດວ່າ,ໄດ້ອະນຸມັດໃຫ້ນຳໃຊ້ວັກຊີນຕ້ານພະຍາດໂຄວິດ-19ທີ່ກຸ່ມບໍລິສັດຊີໂນຟາມຈີນຄົ້ນຄວ້າຜະລິດນັ້ນໂດຍດ່ວນ. ວັກຊີນດັ່ງກ່າວຈະຖືກນຳໃຊ້ໃນ“ແຜນການສັກວັກຊີນແບບຊ່ວຍເຫຼືອກັນ”ຂອງອິນໂດເນເຊຍ.
ທ່ານນາງເພນນີ ລຸເກໂຕ ຫົວໜ້າກົມຕິດຕາມຄຸ້ມຄອງຢາແລະອາຫານຂອງອິນໂດເນເຊຍໄດ້ກ່າວໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນວ່າ, ວັກຊີນຂອງຊີໂນຟາມຈີນ ມີລະດັບຄວາມປອດໄພສູງ.
“ແຜນການສັກວັກຊີນແບບຊ່ວຍເຫຼືອກັນ”ຂອງອິນໂດເນເຊຍຈະເລີ່ມປະຕິບັດແຕ່ເດືອນພຶດສະພານີ້ເປັນຕົ້ນໄປ, ເຊິ່ງຈະອະນຸມັດໃຫ້ອົງການເອກະຊົນຂອງອິນໂດເນເຊຍຈັດຊື້ວັກຊີນແລະໃຫ້ການບໍລິການສັກວັກຊີນ, ເພື່ອສະໜັບສະໜູນແຜນການສັກວັກຊີນຂອງລັດຖະບານ.
ວັກຊີນຂອງຊີໂນຟາມຈີນແມ່ນວັກຊີນຕ້ານພະຍາດໂຄວິດ-19ປະເພດທີສາມທີ່ໄດ້ຮັບການອະນຸມັດໃຫ້ນຳໃຊ້ໂດຍດ່ວນຢູ່ອິນໂດເນເຊຍ. ລັດຖະບານອິນໂດເນເຊຍໄດ້ປະກາດໃນເດືອນມັງກອນ ປີນີ້ວ່າ,ມີແຜນຈະສັກວັກຊີນໃຫ້ປະຊາຊົນ181ລ້ານຄົນພາຍໃນເວລາ15ເດືອນ.ແຕ່ຍ້ອນການຕອບສະໜອງວັກຊີນມີຄວາມຈຳກັດ,ນັບແຕ່ເດືອນເມສາປີນີ້ເປັນຕົ້ນມາ ວຽກງານສັກວັກຊີນຂອງອິນໂດເນເຊຍມີຄວາມຄືບໜ້າອ່າວຊ້າ,ນັບມາຮອດວັນທີ29ເມສາແລ້ວນີ້ ຢ່າງໜ້ອຍມີ12,386ລ້ານຄົນໄດ້ສັກວັກຊີນເຂັມທີໜຶ່ງແລ້ວ,ໃນນັ້ນມີ7,63ລ້ານຄົນໄດ້ສັກວັກຊີນເຂັມທີ2ແລ້ວ.
ຄຳເຫັນ
0