ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 27 ພຶດສະພານີ້, ພະແນກປະສານງານວຽກງານມະນຸດສະທຳຂອງອົງການສະຫະປະຊາຊາດໄດ້ເປີດເຜີຍບົດລາຍງານຫລ້າສຸດກ່ຽວກັບສະພາບການມະນຸດສະທຳຢູ່ມຽນມາ, ໂດຍສະແດງໃຫ້ເຫັນວ່າ: ຍ້ອນສະຖານະການຄວາມໝັ້ນຄົງຢູ່ມຽນມາມີຄວາມຮ້າຍແຮງຕໍ່ເນື່ອງ, ນັບແຕ່ເດືອນມັງກອນປີນີ້ເປັນຕົ້ນມາ, ຜູ້ບໍ່ມີທີ່ຢູ່ອາໄສໃນມຽນມາໄດ້ເພີ່ມຂຶ້ນອີກ 1 ແສນ 2 ໝື່ນ 9 ຮ້ອຍຄົນ.
ອີງຕາມບົດລາຍງານສະບັບນີ້, ປັດຈຸບັນ, ຢູ່ມຽນມາມີຄວາມຕ້ອງການດ້ານມະນຸດສະທຳລວມທັງອາຫານ, ນ້ຳດື່ມ, ຢາປົວພະຍາດ, ເຄື່ອງໃຊ້ທີ່ຈຳເປັນໃນຊີວິດປະຈຳວັນ ແລະອື່ນໆ. ຍ້ອນວ່າໄດ້ຮັບຜົນກະທົບຈາກຄວາມບໍ່ສະດວກໃນດ້ານຄົມມະນາຄົມ, ສະຖານະການຄວາມໝັ້ນຄົງມີຄວາມຮ້າຍແຮງກວ່າເກົ່າ, ການແຜ່ລະບາດຂອງພະຍາດໂຄວິດ-19, ລະເບີດມິນ, ສະພາບອາກາດຮ້າຍແຮງ, ການກວດກາຕາມທາງຫລວງຂອງເຈົ້າໜ້າທີ່ຈຳນວນຫລວງຫລາຍ, ທະນາຄານໂຈະການບໍລິການ ແລະອື່ນໆ, ເຮັດໃຫ້ການຊ່ວຍເຫລືອດ້ານມະນຸດສະທຳຕ້ອງພົບກັບຄວາມຫຍຸ້ງຍາກລຳບາກຫລາຍ. ບົດລາຍງານສະບັບນີ້ໄດ້ກ່າວເຕືອນຕື່ມວ່າ: ມຽນມາຈະເຂົ້າສູ່ລະດູຝົນໃນເດືອນມິຖຸນານີ້, ເນື່ອງຈາກວ່າເຂດອົບພະຍົບສ່ວນໃຫຍ່ຂາດເຂີນອຸປະກອນການແພດມາແຕ່ດົນແລ້ວ, ຜູ້ບໍ່ມີທີ່ຢູ່ອາໄສແຮ່ງຈະຜະເຊີນກັບການແຜ່ລະບາດຂອງພະຍາດຕິດແປດຢ່າງໜັກໜ່ວງກວ່າເກົ່າ.
ຄຳເຫັນ
0