ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 11 ສິງຫາ 2021, ທີ່ກະຊວງສາທາລະນະສຸກ, ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ໄດ້ຕາງໜ້າໃຫ້ພັກ, ລັດ ແລະປະຊາຊົນລາວຮັບວັກຊີນຊີໂນຟາມທີ່ລັດຖະບານແຫ່ງ ສປ ຈີນມອບໃຫ້ 1,000,000 ໂດສ. ໃນໂອກາດນີ້ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດແຫ່ງ ສປ ຈີນປະຈໍາສປປລາວ ພ້ອມດ້ວຍລັດຖະມົນຕີກະຊວງສາທາລະນະສຸກ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພັນຄໍາ ວິພາວັນ ໄດ້ສະແດງຄວາມຂອບໃຈຢ່າງຈິງໃຈແລະຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະປະຊາຊົນຈີນ ອ້າຍນອ້ງ ພ້ອມທັງກ່າວວ່າ: ການຊ່ວຍເຫຼືອວັກຊີນຂອງລັດຖະບານຈີນຄັ້ງນີ້ ເປັນການຕອບສະໜອງຢ່າງທັນການ ຕໍ່ການສະເໜີຂອງລັດຖະບານລາວ, ທັງເປັນການສະແດງເຖິງຄວາມຫວ່ງໃຍ, ຄວາມຮັກແພງສາມັກຄີ ແລະນ້ໍາໃຈອັນດູດດື່ມ ຂອງພັກ, ລັດ ແລະປະຊາຊົນ ຈີນອ້າຍນ້ອງ ທີ່ມີຕໍ່ພັກ, ລັດ ແລະປະຊາຊົນລາວ. ວັກຊີນ 1 ລ້ານ ໂດສ ນີ້ເປັນຂອງຂວັນ ອັນລໍ້າຄ່າ ແລະມີຄຸນປະໂຫຍດສູງຕໍ່ການສະກັດກັ້ນ, ປ້ອງກັນ ແລະຕ້ານ ການລະບາດຂອງໂຄວິດ-19 ຢູ່ ສປປ ລາວ ເພື່ອໃຫ້ລັດຖະບານລາວບັນລຸເປົ້າຫມາຍສັກວັກຊີນໃຫ້ພົນລະເມືອງລາວໃຫ້ໄດ້ 50% ຂອງປະຊາກອນພາຍໃນປີ 2021 ໃຫ້ສໍາເລັດ. ການຊ່ວຍເຫຼືອໃນຄັ້ງນີ້, ຍັງເປັນສິ່ງຢືນຢັນໃຫ້ເຫັນເຖິງການເປັນເພື່ອນມິດຖານສະຫາຍອ້າຍນ້ອງທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານຫມັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍເຂົ້າສູ່ລວງເລິກຢ່າງບໍ່ຢຸດຢັ້ງ. ທ່ານນາຍົກຍັງໄດ້ສະແດງຍ້ອງຍໍຊົມເຊີຍ ແລະຄວາມປີຕິຍິນດີຕໍ່ການນໍາພັກ, ລັດ ແລະປະຊາຊົນຈີນອ້າຍນ້ອງ ຕໍ່ການສະເຫຼີມສະຫຼອງຄົບຮອບ 100 ປີ ແຫ່ງການສ້າງຕັ້ງພັກກອມມູນິດຈີນຢ່າງຍິ່ງໃຫ່ຍ. ນອກນັ້ນ, ສອງປະເທດພວກເຮົາຍັງຈະໄດ້ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະສປ ຈີນ ຄົບຮອບ 60 ປີ ແລະປີມິດຕະພາບລະຫວ່າງລາວ-ຈີນ, ຈີນ-ລາວນໍາອີກ.
ທ່ານ ຈ່ຽງຈ້າຍຕົ່ງ ກ່າວວ່າ: ພາຍໃຕ້ສະຖານະການທີ່ພະຍາດໂຄວິດ-19 ພວມລະບາດຢູ່ທົ່ວໂລກ, ການສັກວັກແຊງໃຫ້ປະຊາຊົນໃຫ້ທົ່ວເຖິງຢູ່ບັນດາປະເທດກຳລັງພັດທະນານັ້ນເປັນສິ່ງທ້າທາຍອັນໜຶ່ງ. ຈີນໄດ້ປະຕິບັດຕາມຄຳໝັ້ນສັນຍາທີ່ເອົາວັກແຊງເປັນຜະລິດຕະພັນສາທາລະນະຢ່າງສະເໝີຕົ້ນສະເໝີປາຍ ໂດຍໄດ້ມອບວັກແຊງໃຫ້ແກ່ບັນດາປະເທດຫຼາຍກວ່າ 770 ລ້ານໂດສ ເຊິ່ງເປັນອັນດັບ 1 ຂອງໂລກ. ໃນຖານະທີ່ເປັນຄູ່ຮ່ວມຊາຕາກຳ, ຝ່າຍຈີນໄດ້ໃຫ້ຄວາມສຳຄັນສູງຕໍ່ການຮ່ວມມືການຕ້ານພະຍາດໂຄວິດ-19 ກັບຝ່າຍລາວ ໂດຍໄດ້ມອບວັກແຊງເກືອບ 3 ລ້ານໂດສໃຫ້ແກ່ລາວ ແລະຈະສືບຕໍ່ມອບວັກແຊງພ້ອມອຸປະກອນການແພດທີ່ຈຳເປັນອີກຊຸດໃຫ້ແກ່ລາວນໍາອີກ.
ຂໍ້ມູນໃຫ້ຮູວ່າ: ໄລຍະຜ່າມາເຖິງປັດຈຸບັນ ສປ ຈີນໄດ້ມອບວັກຊີນໃຫ້ ສປປ ລາວມາແລ້ວທັງໝົດ 5 ຄັ້ງ ລວມທັງໝົດ 2,900,000 ໂດສ ແລະພາຍໃນເດືອນສິງຫານີ້, ສປ ຈີນຍັງຈະສະໜອງວັກຊີນໃຫ້ ສປປ ລາວໃນໄວໆນີ້.
ຄຳເຫັນ
0