ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ບຸນໄຫວ້ພະຈັນແມ່ນບຸນປະເພນີທີ່ສຳຄັນຂອງປະຊາຊົນຈີນ, ແມ່ນຄວາມມຸ່ງຫວັງອັນດີງາມຂອງປະຊາຊົນຈີນໃນການເຕົ້າໂຮມຄວາມສາມັກຄີແລະຄວາມປອງດອງຂອງຄອບຄົວ, ຍັງໄດ້ສະແດງໃຫ້ເຫັນເຖິງຄວາມຮັກແພງ ແລະ ຄວາມຄິດຮອດຄິດເຖິງບ້ານເກີດເມືອງນອນແລະປະເທດຊາດ. ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ເປັນຕົ້ນມາ, ທ່ານສີຈິ້ນຜິງ ປະທານປະເທດຈີນເຄີຍກ່າວເຖິງຄອບຄົວ ແລະ ສາຍສຳພັນໃນຄອບຄົວຫຼາຍເທື່ອໃນໂອກາດຕ່າງໆ. ທ່ານສີຈິ້ນຜິງເວົ້າວ່າ: “ເມື່ອຄອບຄົວເປັນພັນເປັນໝື່ນດີແລ້ວ, ປະເທດຊາດຈຶ່ງຈະດີ, ຊົນຊາດຈຶ່ງຈະດີ.”
ບຸນໄຫວ້ພະຈັນແມ່ນວັນບຸນທີ່ຄອບຄົວຊາວຈີນມາເຕົ້າໂຮມສາມັກຄີກັນ ແລະສະເຫຼີມສະຫຼອງວັນບຸນຮ່ວມກັນ. ບໍ່ວ່າຢູ່ແຫ່ງຫົນໃດກໍຕາມ, ໃນສາຍເລືອດຂອງຊາວຈີນກໍຈະມີຄວາມມຸ່ງຫວັງທີ່ຢາກສ້າງຄວາມສາມັກຄີພາຍໃນຄອບຄົວໃນວັນບຸນດັ່ງກ່າວ.
ປີ 2015, ໃນໄລຍະກ່ອນບຸນໄຫວ້ພະຈັນ, ທ່ານປະທານສີຈິ້ນຜິງໄດ້ເຂົ້າຮ່ວມງານລ້ຽງຮັບຮອງທີ່ຈັດໂດຍຊາວຈີນຕ່າງດ້າວຢູ່ຊີອາໂຕປະເທດອາເມຣິກາ, ທ່ານໄດ້ນຳເອົາຄວາມຄິດຮອດຄິດເຖິງຂອງພີ່ນ້ອງປະຊາຊົນພາຍໃນປະເທດຈີນມາສູ່ຊາວຈີນແລະເຊື້ອສາຍຈີນທີ່ອາໄສຢູ່ອາເມຣິກາ, ທ່ານສີຈິ້ນຜິງຍັງໄດ້ນຳເອົາເຂົ້າໜົມໄຫວ້ພະຈັນຈາກປະເທດຈີນມາມອບໃຫ້ກັບເຂົາເຈົ້າ ແລະກ່າວວ່າ: ຂ້າພະເຈົ້າ “ຮູ້ສຶກປິຕິຊົມຊື່ນຢ່າງຍິ່ງທີ່ໄດ້ມາເຕົ້າໂຮມກັບພີ່ນ້ອງຮ່ວມຊາດທຸກທ່ານເພື່ອສ້າງຄວາມສາມັກຄີຮັກແພງກັນ. ເມື່ອຮອດວັນບຸນໄຫວ້ພະຈັນແລ້ວກໍຍິ່ງຄິດຮອດຄິດເຖິງຄອບຄົວ ແລະ ຍາດຕິພີ່ນ້ອງຫຼາຍຂຶ້ນກວ່າເກົ່າ. ຂ້າພະເຈົ້າຮູ້ວ່າ: ທຸກທ່ານຄິດຮອດຄິດເຖິງປະເທດຊາດແລະຄອບຄົວກໍຄືຍາດຕິພີ່ນ້ອງທີ່ຢູ່ໄກແສນໄກ, ປະເທດຊາດ ແລະ ຍາດຕິພີ່ນ້ອງກໍຄິດຮອດຄິດເຖິງລູກຫຼານຊົນຊາດຈີນທີ່ຢູ່ຕ່າງປະເທດທຸກຄົນເຊັ່ນກັນ.”
ນັບແຕ່ກອງປະຊຸມໃຫຍ່ຂອງພັກກອມມູນິດຈີນຄັ້ງທີ 18 ທີ່ຈັດຂຶ້ນໃນປີ 2012 ເປັນຕົ້ນມາ, ສູນກາງພັກກອມມູນິດຈີນທີ່ມີທ່ານສີຈິ້ນຜິງເປັນແກນນຳໄດ້ໃຫ້ຄວາມສຳຄັນຢ່າງສູງຕໍ່ “ຄອບຄົວ” ປະຊາຊົນຈີນ. ໃນເດືອນທັນວາປີ 2016, ໃນເວລາຕ້ອນຮັບຜູ້ແທນທີ່ເຂົ້າຮ່ວມພິທີຍ້ອງຍໍຄອບຄົວສິວິໄລທົ່ວປະເທດຈີນຄັ້ງທຳອິດ, ທ່ານສີຈິ້ນຜິງກ່າວວ່າ:
“ບໍ່ວ່າໃນອະດີດ ປະຈຸບັນ ຫຼື ອະນາຄົດ, ຄົນເຮົາສ່ວນຫຼາຍໄດ້ດຳລົງຊີວິດຮ່ວມກັບຄອບຄົວ, ພວກເຮົາຕ້ອງໃຫ້ຄວາມສຳຄັນຕໍ່ການສ້າງຄວາມສິວິໄລຂອງຄອບຄົວ, ພະຍາຍາມເຮັດໃຫ້ຄອບຄົວເປັນພັນເປັນໝື່ນກາຍເປັນຈຸດພື້ນຖານຂອງການພັດທະນາຂອງປະເທດຊາດ,ຄວາມກ້າວໜ້າຂອງຊົນຊາດ ແລະຄວາມກົມກຽວປອງດອງຂອງສັງຄົມ, ກາຍເປັນຈຸດອອກເດີນທາງເພື່ອຄວາມໃຝ່ຝັນ.”
ການຖືຄອບຄົວ ແລະສາຍສຳພັນພາຍໃນຄອບຄົວເປັນສິ່ງສຳຄັນແມ່ນມູນເຊື້ອອັນດີງາມຂອງປະຊາຊາດຈີນ, ເຊິ່ງໄດ້ຈາລຶກໄວ້ໃນຈິດໃຈຂອງປະຊາຊົນຈີນຕະຫຼອດມາ. ຕາມທັດສະນະຂອງທ່ານສີຈິ້ນຜິງແລ້ວ, ອະນາຄົດແລະຊາຕາກຳຂອງຄອບຄົວໄດ້ເຊື່ອມສານເຂົ້າກັບອະນາຄົດແລະຊາຕາກຳຂອງປະເທດຊາດແລະຊົນຊາດຢ່າງແໜ້ນແຟ້ນ,ຄວນເຊື່ອມໂຍງຄວາມໃຝ່ຝັນຂອງບຸກຄົນແລະຄອບຄົວເຂົ້າກັບຄວາມໃຝ່ຝັນຂອງປະເທດຊາດ ແລະ ຊົນຊາດ.
ຄຳເຫັນ
0