ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 27 ກັນຍານີ້, ທ່ານນາງຮວ້າຊຸ່ນຢີງ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຂ່າວວ່າ, ປະເທດຈີນທີ່ເຂັ້ມແຂງທີ່ນຳພາໂດຍພັກກອມມູນິດຈີນຢ່າງໝັ້ນແກ່ນ ເປັນເສົາຄ້ຳອັນໝັ້ນແກ່ນໃຫ້ກັບພົນລະເມືອງຈີນໝົດທຸກຄົນຕະຫຼອດເວລາ, ພັກ ແລະ ລັດຖະບານຈີນມີຈິດໃຈທີ່ໝັ້ນໜຽວ ແລະ ຄວາມສາມາດອັນໜັກແໜ້ນ, ເດັດດ່ຽວປົກປັກຮັກສາສິດ ແລະ ຜົນປະໂຫຍດທີ່ຊອບດ້ວຍກົດໝາຍຂອງພົນລະເມືອງຈີນ ແລະ ວິສາຫະກິດຈີນ, ເດັດດ່ຽວປົກປັກຮັກສາຜົນປະໂຫຍດ ແລະ ກຽດສັກສີຂອງພັກ ແລະ ລັດຖະບານຈີນ.
ໂດຍຜ່ານຄວາມພະຍາຍາມຢ່າງບໍ່ລົດລະຂອງລັດຖະບານຈີນ, ທ່ານນາງເມີ້ງຫວານໂຈ່ວໄດ້ກັບຄືນປະເທດຊາດຢ່າງສະດວກໃນຕອນຄ່ຳຂອງວັນທີ 25 ກັນຍານີ້.
ໃນເວລາຕອບຄຳຖາມທີ່ກ່ຽວຂ້ອງ, ທ່ານນາງຮວ້າຊຸ່ນຢີງກ່າວວ່າ, ເຫດການກ່ຽວກັບນາງເມີ້ງຫວານໂຈ່ວເປັນການໃສ່ຮ້າຍ ແລະ ທຳຮ້າຍທາງການເມືອງຕໍ່ພົນລະເມືອງຈີນ ໂດຍມີຈຸດປະສົງໂຈມຕີວິສາຫະກິດໄຮເຕັກຂອງຈີນ ເຊິ່ງມີບໍລິສັດ HUAWEI ເປັນຕົວແທນ. ຫຼັງຈາກນາງເມີ້ງຫວານໂຈ່ວຖືກກັກຕົວໂດຍບໍ່ມີຄວາມຜິດໃດໆໃນຕົ້ນເດືອນທັນວາປີ 2018, ພັກ ແລະ ລັດຖະບານຈີນໄດ້ເອົາໃຈໃສ່ຊ່ວຍເຫຼືອໃນລະດັບສູງ, ກະຊວງການຕ່າງປະເທດຈີນ, ສະຖານທູດຈີນປະຈຳອາເມຣິກາ ແລະ ການາດາ ພ້ອມທັງສະຖານກົງສຸນຈີນປະຈຳນະຄອນແວນໂກເວີປະເທດການາດາໄດ້ອອກແຮງສຸດຂີດ ເພື່ອປົກປ້ອງ ແລະ ໃຫ້ການຊ່ວຍເຫຼືອທາງການທູດຕໍ່ນາງເມີ້ງຫວານໂຈ່ວ, ເຈລະຈາກັບອາເມຣິກາ ແລະ ການາດາຢ່າງເຄັ່ງຂຶມ ຮຽກຮ້ອງໃຫ້ຍົກເລີກຂໍ້ກ່າວຫາອັນຜິດພາດທີ່ມີຕໍ່ນາງເມີ້ງຫວານໂຈ່ວ. ນາງເມີ້ງຫວານໂຈ່ວຈິ່ງສາມາດເດີນທາງກັບຄືນປະເທດຈີນໄດ້ຢ່າງປອດໄພ ຍ້ອນພັກ ແລະ ລັດຖະບານຈີນໄດ້ສຸມຄວາມພະຍາຍາມຢ່າງບໍ່ລົດລະ, ແລະກໍ່ຍ້ອນປະຊາຊົນທົ່ວປະເທດຈີນອອກແຮງໃຫ້ການສະໜັບສະໜູນກັນຢ່າງສະເໝີຕົ້ນສະເໝີປາຍ.
ຄຳເຫັນ
0