ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ກັນຍານີ້, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ແລະທ່ານໂຈເຊ ໂບເຣວ ຜູ້ຕາງໜ້າຂັ້ນສູງດ້ານນະໂຍບາຍການຕ່າງປະເທດ ແລະ ຄວາມໝັ້ນຄົງຂອງສະຫະພາບເອີຣົບໄດ້ຮ່ວມກັນເປັນປະທານຈັດກອງປະຊຸມສົນທະນາທາງຍຸດທະສາດລະດັບສູງຮອບທີ 11 ໂດຍຜ່ານທາງວີດີໂອ.
ທ່ານຫວາງຢີ້ກ່າວວ່າ, ຈີນ ແລະ ເອີຣົບລ້ວນແຕ່ເຫັນວ່າ, ການໄປມາຫາສູ່ກັນລະຫວ່າງສອງຝ່າຍຄວນຍຶດໝັ້ນການຄົບລົບເຊິ່ງກັນແລະກັນ, ສະແຫວງຫາຄວາມເຫັນທີ່ເປັນເອກະພາບກັນ ແລະ ສະຫງວນຄວາມເຫັນທີ່ແຕກຕ່າງກັນ, ເປີດກວ້າງຂົງເຂດການຮ່ວມມື, ຮ່ວມມືກັນຮັບມືກັບສິ່ງທ້າທາຍຕ່າງໆ, ເຊັ່ນ: ການແຜ່ລະບາດຂອງພະຍາດໂຄວິດ-19, ການປ່ຽນແປງຂອງດິນຟ້າອາກາດແລະອື່ນໆ. ຝ່າຍເອີຣົບເຄີຍກ່າວມາຫຼາຍເທື່ອວ່າ, ສະຫະພາບເອີຣົບຊົມເຊີຍການພັດທະນາຂອງຈີນ, ບໍ່ມີເຈດຕະນາເປັນປໍລະປັກກັນດ້ານລະບອບ, ຈະບໍ່ເຂົ້າຮ່ວມ “ສົງຄາມເຢັນແບບໃໝ່”ໃນທຸກຮູບແບບ, ຈີນສະແດງຄວາມຊົມເຊີຍຕໍ່ເລື່ອງນີ້.
ທ່ານຫວາງຢີ້ກ່າວຕື່ມວ່າ, ສອງຝ່າຍຄວນກະກຽມການໄປມາຫາສູ່ກັນລະຫວ່າງການນຳຂັ້ນສູງຂອງຈີນ ແລະເອີຣົບໃນໄລຍະຕໍ່ໜ້າ, ເພີ່ມແຮງຂັບເຄື່ອນອັນໃໝ່ໃຫ້ແກ່ການຂະຫຍາຍການພົວພັນສອງຝ່າຍ, ເພີ່ມທະວີການປະສານງານກ່ຽວກັບການສົນທະນາລະດັບສູງດ້ານເສດຖະກິດການຄ້າ ແລະ ເສດຖະກິດດີຈີຕອນຮອບໃໝ່, ຊຸກຍູ້ການພົວພັນຄູ່ຮ່ວມສີຂຽວ ແລະ ດີຈີຕອນລະຫວ່າງຈີນ-ເອີຣົບໃຫ້ກ້າວເຂົ້າສູ່ລວງເລິກ. ເຮັດໃຫ້ຂໍ້ລິເລີ່ມທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຊື່ອມຈອດກັບຂໍ້ລິເລີ່ມເຊື່ອມໂຍງເຊື່ອມຈອດຂອງສະຫະພາບເອີຣົບ, ເສີມຂະຫຍາຍທ່າແຮງຂອງກັນແລະກັນ, ກາຍເປັນກຳລັງສັງລວມ. ລົງເລິກການຮ່ວມມືດ້ານວັກຊີນ, ຊຸກຍູ້ການຮ່ວມມືໃນການປະດິດສ້າງໃໝ່ດ້ານວິທະຍາສາດເຕັກໂນໂລຊີ, ການເງິນ, ພະລັງງານ, ກະສິກຳ ແລະ ອື່ນໆຢ່າງຕໍ່ເນື່ອງ. ຍິນດີຕ້ອນຮັບເອີຣົບຕັ້ງໜ້າເຂົ້າຮ່ວມ “ຂໍ້ລິເລີ່ມການພັດທະນາໂລກ”ທີ່ທ່ານສີຈິ້ນຜິງ ປະທານປະເທດຈີນສະເໜີອອກໃນການອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດຄັ້ງທີ 76.
ທ່ານໂຈເຊ ໂບເຣວກ່າວວ່າ, ເອີຣົບຖືຈີນເປັນຄູ່ຮ່ວມຍຸດທະສາດທີ່ສຳຄັນ, ເອີຣົບສະແດງຄວາມຊົມເຊີຍຕໍ່ “ຂໍ້ລິເລີ່ມການພັດທະນາໂລກ” ທີ່ສະເໜີໂດຍທ່ານສີຈິ້ນຜິງ, ນີ້ຈະເສີມຂະຫຍາຍບົດບາດອັນສຳຄັນໃນການຟື້ນຟູເສດຖະກິດ ແລະ ລຶບລ້າງຄວາມທຸກຍາກຂອງໂລກ. ເອີຣົບສະແດງຄວາມຊົມເຊີຍຢ່າງສູງຕໍ່ຈີນທີ່ໄດ້ປະກາດວ່າຈະບໍ່ສ້າງໂຄງການຜະລິດໄຟຟ້າດ້ວຍຖ່ານຫີນແຫ່ງໃໝ່ຢູ່ຕ່າງປະເທດ, ນີ້ຈະຊ່ວຍໃຫ້ປະເທດພວມພັດທະນາບັນລຸການພັດທະນາແບບສີຂຽວ ແລະ ກາກບອນຕ່ຳ. ເອີຣົບຍິນດີສືບຕໍ່ເພີ່ມທະວີການຮ່ວມມືກັບຈີນໃນການຕ້ານກັບພະຍາດ, ຮັບມືກັບການປ່ຽນແປງຂອງດິນຟ້າອາກາດ ແລະອະນຸລັກຄວາມຫຼາກຫຼາຍທາງຊີວະນານາພັນ ແລະອື່ນໆ.
ຄຳເຫັນ
0