ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 8 ຕຸລານີ້, ຫ້ອງການຖະແຫຼງຂ່າວຂອງລັດຖະບານຈີນໄດ້ເຜີຍແຜ່ປຶ້ມປົກຂາວກ່ຽວກັບ “ການອະນຸລັກຊີວະນານາພັນຂອງຈີນ”.
ປຶ້ມປົກຂາວໄດ້ລະບຸວ່າ: ຈີນມີດິນແດນອັນກວ້າງໃຫຍ່ໄພສານ, ມີທັງແຜ່ນດິນໃຫຍ່ແລະທະເລ, ພູມສັນຖານແລະດິນຟ້າອາກາດມີຄວາມຫຼາກຫຼາຍແລະສະຫຼັບສັບຊ້ອນ ອັນໄດ້ກຳເນີດໃຫ້ມີລະບົບນິເວດທີ່ອຸດົມສົມບູນແລະມີເອກະລັກສະເພາະ, ມີຊີວະນານາພັນ ແລະມີຄວາມຫຼາກຫຼາຍດ້ານພັນທຸກຳ, ເປັນໜຶ່ງໃນບັນດາປະເທດທີ່ມີຄວາມຫຼາກຫຼາຍຊີວະນານາພັນທີ່ອຸດົມສົມບູນທີ່ສຸດໃນໂລກ. ໃນຖານະເປັນໜຶ່ງໃນບັນດາປະເທດພາຄີທີ່ໄດ້ລົງນາມແລະໃຫ້ສັດຕະຍາບັນໃນສັນຍາວ່າດ້ວຍຊີວະນານາພັນກ່ອນໝູ່, ຈີນໄດ້ໃຫ້ຄວາມສຳຄັນຢ່າງສູງຕໍ່ການອະນຸລັກຊີວະນານາພັນຕະຫຼອດມາ, ໄດ້ຊຸກຍູ້ການອະນຸລັກຊີວະນານາພັນໃຫ້ກ້າວໄປໜ້າພ້ອມກັບຍຸກສະໄໝແລະພັດທະນາດ້ວຍການປະດິດສ້າງຢ່າງບໍ່ຢຸດຢັ້ງ ເຊິ່ງໄດ້ຮັບຜົນງານອັນພົ້ນເດັ່ນ, ແລະສາມາດບຸກເບີກເສັ້ນທາງການອະນຸລັກຊີວະນານາພັນທີ່ມີສີສັນພິເສດຂອງຈີນ.
ປຶ້ມປົກຂາວຍັງລະບຸວ່າ: ຈີນໄດ້ກຳນົດເອົາການອະນຸລັກຊີວະນານາພັນເປັນຍຸດທະສາດແຫ່ງຊາດ, ຈັດເອົາການອະນຸລັກຊີວະນານາພັນເຂົ້າໃນແຜນການພັດທະນາໄລຍະກາງແລະໄລຍະຍາວຂອງເຂດແຄວ້ນຕ່າງໆແລະຂົງເຂດຕ່າງໆ, ປັບປຸງນະໂຍບາຍແລະລະບຽບກົດໝາຍໃຫ້ສົມບູນຂຶ້ນ, ເພີ່ມທະວີການຮັບປະກັນດ້ານວິຊາການແລະການກໍ່ສ້າງຖັນແຖວພະນັກງານວິຊາການ, ເພີ່ມຄວາມເຂັ້ມງວດໃນການຕິດຕາມກວດກາການປະຕິບັດກົດໝາຍ, ເຮັດໃຫ້ປວງຊົນມີສ່ວນຮ່ວມໃນການອະນຸລັກຊີວະນານາພັນດ້ວຍຄວາມຕື່ນຕົວ, ເສີມສ້າງຄວາມສາມາດໃນການຄຸ້ມຄອງຊີວະນານາພັນໃຫ້ສູງຂຶ້ນຢ່າງບໍ່ຢຸດຢັ້ງ.
ປຶ້ມປົກຂາວຍັງໄດ້ລະບຸຕື່ມວ່າ: ເມື່ອປະເຊີນໜ້າກັບສິ່ງທ້າທາຍທີ່ຊີວະນານາພັນໃນທົ່ວໂລກພວມສູນເສຍໄປ, ບັນດາປະເທດເປັນປະຊາຄົມຮ່ວມຊາຕາກຳທີ່ຮ່ວມກັນຜ່ານຜ່າຄວາມຫຍຸ້ງຍາກນຳກັນ. ຈີນເດັດດ່ຽວປະຕິບັດຕາມລັດທິຫຼາຍຝ່າຍ, ຕັ້ງໜ້າດຳເນີນການຮ່ວມມືສາກົນເພື່ອອະນຸລັກຊີວະນານາພັນ, ເຂົ້າຮ່ວມການປຶກສາຫາລືກັນຢ່າງກວ້າງຂວາງເພື່ອທ້ອນໂຮມຄວາມຮັບຮູ້ທີ່ເປັນເອກະພາບກັນ, ປະກອບສ່ວນໃນດ້ານສະຕິປັນຍາຂອງຈີນເພື່ອຊຸກຍູ້ການອະນຸລັກຊີວະນານາພັນຂອງໂລກ, ຮ່ວມກັນກັບປະຊາຄົມໂລກສ້າງປະຊາຄົມຮ່ວມຊີວິດລະຫວ່າງຄົນກັບທຳມະຊາດ.
ຄຳເຫັນ
0