ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 17 ພະຈິກນີ້, ຢູ່ທີ່ປັກກິ່ງ, ທ່ານຮານເຈີ້ງ ຮອງນາຍົກລັດຖະມົນຕີຈີນ ທັງເປັນປະທານຝ່າຍຈີນຂອງຄະນະກຳມະການຮ່ວມມືດ້ານພະລັງງານຈີນ-ຣັດເຊຍໄດ້ຮ່ວມກັບທ່ານອມາເລັກຊານເດີ ໂນວັກ ຮອງນາຍົກລັດຖະມົນຕີຣັດເຊຍ ທັງເປັນປະທານຝ່າຍຣັດເຊຍຂອງຄະນະກຳມະການດັ່ງກ່າວຈັດກອງປະຊຸມຄະນະກຳມະການຮ່ວມມືດ້ານພະລັງງານຈີນ-ຣັດເຊຍຄັ້ງທີ 18 ດ້ວຍຮູບແບບທາງວິດີໂອ.
ທ່ານຮານເຈີ້ງກ່າວວ່າ, ການຮ່ວມມືດ້ານພະລັງງານເປັນຂົງເຂດສຳຄັນທີ່ສຸດ, ໄດ້ຮັບໝາກຜົນຫຼາຍທີ່ສຸດ ແລະ ມີຂອບເຂດກວ້າງຂວາງທີ່ສຸດໃນການຮ່ວມມືທີ່ຕິດແທດຕົວຈິງລະຫວ່າງຈີນ ກັບ ຣັດເຊຍ. ທ່ານຮານເຈີ້ງໄດ້ສະເໜີຂໍ້ສະເໜີ 3 ຂໍ້ກ່ຽວກັບການຮ່ວມມືດ້ານພະລັງງານຈີນ-ຣັດເຊຍ. ຄື: ໜຶ່ງ, ລົງເລິກການຮ່ວມມືໃນຂົງເຂດພະລັງງານນິວເຄຼຍຕື່ມອີກ, ທັງຊຸກຍູ້ການຮ່ວມມືໂຄງການກໍ່ສ້າງທໍ່ສົ່ງນ້ຳມັນ ແລະ ອາຍແກັສ. ສອງ, ເປີດກວ້າງຂົງເຂດ ແລະ ເນື້ອໃນໃໝ່ຂອງການຮ່ວມມືດ້ານພະລັງງານ, ຄ່ອຍໆຊຸກຍູ້ການຮ່ວມມືໃນດ້ານພະລັງງານແບບໝູນວຽນ, ພະລັງງານໄນໂຕຼແຊນ, ການສະສົມພະລັງງານ ພ້ອມດ້ວຍມາດຕະຖານພະລັງງານ,ການປະດິດສ້າງເຕັກນິກວິທະຍາສາດ ແລະ ການຊຳລະສະສາງດ້ວຍກະສຸນເງິນສອງຝ່າຍໃນດ້ານພະລັງງານ. ສາມ, ເພີ່ມທະວີການປະສານງານການຄຸ້ມຄອງພະລັງງານທົ່ວໂລກ ແລະ ການຮັບມືກັບການປ່ຽນແປງຂອງດິນຟ້າອາກາດ, ຊຸກຍູ້ລະບົບຄຸ້ມຄອງພະລັງງານທົ່ວໂລກໃຫ້ພັດທະນາໄປໃນທິດທາງທີ່ຍຸຕິທຳກວ່າເກົ່າ, ສ້າງຜົນປະໂຫຍດໃຫ້ທົ່ວເຖິງ ແລະ ກວມລວມ.
ທ່ານໂນວັກກ່າວວ່າ, ຣັດເຊຍຍິນດີຮ່ວມມືກັບຈີນ ເພື່ອເປີດກວ້າງການຮ່ວມມືດ້ານພະລັງງານໃນລະດັບທີ່ເລິກເຊິ່ງກວ່າເກົ່າ ແລະ ມີຂົງເຂດກວ້າງຂວາງກວ່າເກົ່າ, ຊຸກຍູ້ການຮ່ວມມືຮອບດ້ານ, ເຮັດໃຫ້ການພົວພັນລະຫວ່າງສອງປະເທດກ້າວຂຶ້ນສູ່ລະດັບໃໝ່.
ຄຳເຫັນ
0