ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 29 ທັນວານີ້, ທ່ານຮານເຈີ້ງ ກຳມະການປະຈຳກົມການເມືອງສູນກາງພັກກອມມູນິດຈີນ ຮອງນາຍົກລັດຖະມົນຕີຈີນໄດ້ພົບປະກັບທ່ານເຮັງສະວີກີດ ຮອງນາຍົກລັດຖະມົນຕີສິງກະໂປຜ່ານທາງວີດີໂອ. ທ່ານຮອງນາຍົກລັດຖະມົນຕີຈີນກ່າວວ່າ: ຈີນຍິນດີຕ້ອນຮັບສິງກະໂປມີສ່ວນຮ່ວມໃນຂະບວນການສ້າງສະພາບການພັດທະນາໃໝ່ຂອງຈີນຢ່າງເລິກເຊິ່ງ.
ທ່ານຮານເຈີ້ງກ່າວເນັ້ນວ່າ: ຈີນຍິນດີຮ່ວມກັບສິງກະໂປ, ລົງເລິກການຮ່ວມມືຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ, ຮ່ວມກັນປົກປັກຮັກສາລັດທິຫຼາຍຝ່າຍແລະການຄ້າເສລີ, ເພີ່ມທະວີການຮ່ວມມືດ້ານການຕ້ານກັບພະຍາດໂຄວິດ-19 ເປັນຕົ້ນແມ່ນການຄົ້ນຄວ້າພັດທະນາແລະການລິດວັກຊິນໂຄວິດ-19 ແລະຢາປົວພະຍາດ, ຕັ້ງໜ້າຂະຫຍາຍການຮ່ວມມືໃນຂົງເຂດເສດຖະກິດດີຈີຕອນ, ການພັດທະນາຕາມທິດສີຂຽວ ແລະອື່ນໆ ເພື່ອຊຸກຍູ້ໃຫ້ການຮ່ວມມືລະຫວ່າງສອງປະເທດມີລະດັບແລະຄຸນນະພາບສູງຂຶ້ນຢ່າງບໍ່ຢຸດຢັ້ງ.
ທ່ານເຮັງສະວີກັດກ່າວວ່າ: ການທີ່ຈີນກ້າວເຂົ້າສູ່ໄລຍະການພັດທະນາໃໝ່ ໄດ້ສ້າງໂອກາດອັນໃຫຍ່ຫຼວງໃຫ້ກັບການຮ່ວມມືລະຫວ່າງສິງກະໂປກັບຈີນ. ສິງກະໂປຍິນດີເພີ່ມທະວີການໄປມາຫາສູກັນຢ່າງໃກ້ຊິດກັບຈີນລະຫວ່າງການນຳຂັ້ນສູງ, ເສີມຂະຫຍາຍບົດບາດຂອງກົນໄກການຮ່ວມມືສອງຝ່າຍໃຫ້ດີ, ລົງເລິກການຮ່ວມມືໃນຂົງເຂດຕ່າງໆ, ຊຸກຍູ້ການຄ້າເສລີ, ເພີ່ມທະວີການໄປມາຫາສູ່ກັນລະຫວ່າງບຸກຄະລາກອນ, ຮ່ວມກັນສ້າງອະນາຄົດທີ່ດີງາມກວ່າເກົ່າໃຫ້ແກ່ປະຊາຊົນສອງຊາດກໍຄືພາກພື້ນ. ຂໍອວຍພອນໃຫ້ງານກິລາໂອລິມປິກລະດູໜາວປັກກິ່ງຈົ່ງໄດ້ຮັບຜົນສຳເລັດອັນຈົບງາມ.
ສອງຝ່າຍເຫັນດີເປັນເອກະພາບກັນວ່າ: ຄວນຖືເອົາການສ້າງສະພາບການພັດທະນາໃໝ່ເປັນທິດຊີ້ນຳ, ຊຸກຍູ້ໃຫ້ໂຄງການຮ່ວມມືທີ່ສຳຄັນໄດ້ພັດທະນາດ້ວຍຄຸນນະພາບສູງ, ຖືເອົາການຍົກລະດັບການພົວພັນລະຫວ່າງຈີນ-ອາຊຽນເປັນການພົວພັນຄູ່ຮ່ວມຍຸດທະສາດຮອບດ້ານເປັນໂອກາດ, ສ້າງແບບຢ່າງອັນໃໝ່ໃນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ຖືເອົາການເປີດກວ້າງການຮ່ວມມືລະຫວ່າງສອງຝ່າຍໃນການຕ້ານພະຍາດແລະການພັດທະນາເປັນເສົາຄ້ຳ, ປະກອບສ່ວນຄັ້ງໃໝ່ເຂົ້າໃນການຕ້ານພະຍາດແລະການພັດທະນາແບບຍືນຍົງຂອງໂລກ.
ຄຳເຫັນ
0