ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ເວັບໄຊຫ້ອງການວຽກງານອະວະກາດຊັ້ນນອກຂອງອົງການສະຫະປະຊາຊາດ ຫຼື UNOOSA ໄດ້ອອກແຈ້ງການສະບັບໜຶ່ງ ໂດຍໄດ້ຮັບຄວາມສົນໃຈຢ່າງກວ້າງຂວາງຈາກຄົນທັງຫຼາຍ. ເອກະສານທີ່ເຜີຍແຜ່ໃນແຈ້ງການສະບັບນີ້ສະແດງໃຫ້ເຫັນວ່າ: ກຸ່ມຕາໜ່າງດາວທຽມ ຫຼື ສະຕາລິ້ງ ທີ່ບໍລິສັດ SpaceX ເຊິ່ງເປັນບໍລິສັດເອກະຊົນຂອງອາເມຣິກາ ທີ່ສົ່ງຂຶ້ນສູ່ອະວະກາດນັ້ນ ໄດ້ເຄື່ອນເຂົ້າໃກ້ສະຖານີອະວະກາດຂອງຈີນສອງເທື່ອໃນປີກາຍນີ້ ເຊິ່ງໄດ້ເປັນໄພຂົ່ມຂູ່ອັນຮ້າຍແຮງຕໍ່ຄວາມປອດໄພດ້ານຊີວິດຂອງນັກບິນອະວະກາດຂອງຈີນ.
ພາຍຫຼັງທ່ານໂຈນາທານ ແມັກໂດເວວ ນັກວິທະຍາສາດທີ່ຄົ້ນຄວ້າດາວດາລາຟິຊິກຂອງມະຫາວິທະຍາໄລຮາເວີດຂອງອາເມຣິກາໄດ້ເກັບກຳຂໍ້ມູນກ່ຽວກັບດາວທຽມສະຕາລິ້ງດັ່ງກ່າວແລ້ວໄດ້ເຫັນວ່າ: ດາວທຽມດັ່ງກ່າວໄດ້ເຄື່ອນເຂົ້າໃກ້ກັບສະຖານີອະວະກາດຈີນສອງເທື່ອ ແລະ ມີພຽງເທື່ອດຽວໄດ້ດຳເນີນການຄວບຄຸມໃຫ້ “ຫຼົບຫຼີກພຽງເລັກໜ້ອຍເທົ່ານັ້ນ”. ທ່ານອີລອນ ມັສກ ປະທານຄະນະບໍລິຫານຂອງບໍລິສັດ SpaceX ເຄີຍປະກາດຕໍ່ພາຍນອກວ່າ: ສະຕາລິ້ງມີເຕັກນິກຫຼົບຫຼີກແບບອັດຕະໂນມັດ, ແຕ່ວ່າ, ໃນສອງເຫດການນີ້, ເຕັກນິກດັ່ງກ່າວບໍ່ສາມາດປະຕິບັດງານໃຫ້ບັງເກີດຜົນໄດ້ຈັກເທື່ອ.
ໃນປີ 2019, ດາວທຽມສະຕາລິ້ງຈະຕຳກັບດາວທຽມສັງເກດໜ້າໂລກຂອງອົງການການບິນອະວະກາດເອີຣົບ. ມາຮອດປັດຈຸບັນ, ສະຕາລິ້ງໄດ້ມີສ່ວນກ່ຽວຂ້ອງກັບເຫດການເຄື່ອນເຂົ້າໃກ້ຍານອະວະກາດປະມານ 1.600 ເທື່ອ ເຊິ່ງກວມເອົາເຄິ່ງໜຶ່ງຂອງເຫດການລັກສະນະທີ່ເປັນອັນຕະລາຍແບບນີ້. ໃນຂະນະດຽວກັນ, ຄຽງຄູ່ກັບບໍລິສັດ SpaceX ໄດ້ສົ່ງດາວທຽມຂຶ້ນສູ່ອະວະກາດຊັ້ນນອກເປັນຈຳນວນຫຼວງຫຼາຍ, ຄວາມສ່ຽງທີ່ດາວທຽມຈະຕຳກັນຢູ່ຕາມວົງໂຄຈອນກໍນັບມື້ນັບສູງຂຶ້ນ. ພາຍຫຼັງດາວທຽມສະຕາລິ້ງຖືກສົ່ງຂຶ້ນສູ່ອະວະກາດເປັນຈຳນວນຫຼວງຫຼາຍແລ້ວ, ຍັງຈະເຮັດໃຫ້ເກີດມີຂີ້ເຫຍື້ອອະວະກາດທີ່ບໍ່ສາມາດຄວບຄຸມໄດ້, ຈົນເຖິງຂັ້ນມີສ່ວນໜຶ່ງຕົກເຂົ້າສູ່ຊັ້ນບັນຍາກາດຂອງໂລກ ເຊິ່ງຈະທຳລາຍໜ່ວຍໂລກຢ່າງໜັກໜ່ວງ.
ນອກຈາກນີ້, ດາວທຽມຈຳນວນຫຼວງຫຼາຍ ທີ່ໂຄຈອນຢູ່ອະວະກາດຢ່າງໜາແໜ້ນ ຈະເກີດມີຜົນກະທົບຢ່າງຮ້າຍແຮງຕໍ່ກັບການສັງເກດອະວະກາດທີ່ເປັນປົກກະຕິ. ທ່ານນາງຊາມານຊາ ລາວເລີ ຜູ້ຊ່ວຍສາສະດາຈານດ້ານດາລາສາດຂອງມະຫາວິທະຍາໄລເຣກີນາການາດາກ່າວວ່າ: ແຕ່ກ່ອນ, ເມືອງປົກຄອງຕົນເອງເອເດນເວີດທີ່ຕົນອາໄສຢູ່ ເປັນສະຖານທີ່ສັງເກດດາລາສາດທີ່ດີ. ແຕ່ຄຽງຄູ່ກັບກຸ່ມຕາໜ່າງດາວທຽມທາງທຸລະກິດນັບມື້ນັບຫຼາຍຂຶ້ນ, ທ້ອງຟ້າໃນຕອນຄ່ຳມືດໄດ້ເກີດມີ “ກຸ່ມດາວ” ໃໝ່ຫຼາຍກຸ່ມ. ຖ້າຂະແໜງການດັ່ງກ່າວບໍ່ໄດ້ຮັບການຕິດຕາມຄຸ້ມຄອງໄດ້ເປັນຢ່າງດີ, ແສງຈາກດາວປະຈຳກໍອາດຈະຖືກດາວທຽມເຫຼົ່ານີ້ປິດບັງໄປຈົນໝົດ.
ອີງຕາມ “ສົນທິສັນຍາອະວະກາດຊັ້ນນອກ” ຂອງສາກົນ, ອາເມຣິກາຄວນຮັບຜິດຊອບທຸກການເຄື່ອນໄຫວຢູ່ອະວະກາດຊັ້ນນອກຂອງບໍລິສັດພາຍໃນປະເທດຕົນ. ສະນັ້ນ, ການກະທຳທີ່ເປັນອັນຕະລາຍຂອງບໍລິສັດ SpaceX ກໍຄວນແມ່ນອາເມຣິກາເປັນຜູ້ຮັບຜິດຊອບ. ເຖິງວ່າອາເມຣິກາເຄີຍກ່າວຢູ່ຕາມເວທີສາກົນຫຼາຍເທື່ອແລ້ວວ່າ: ບັນດາປະເທດຄວນມີຄວາມຮັບຜິດຊອບຕໍ່ການເຄື່ອນໄຫວຢູ່ອະວະກາດຊັ້ນນອກຂອງຕົນ, ແຕ່ອາເມຣິກາເອງພັດບໍ່ເອົາຫົວຊາຕໍ່ພັນທະຂອງຕົນທີ່ມີຕໍ່ສົນທິສັນຍາສາກົນ ເຊິ່ງການກະທຳຂອງອາເມຣິກາໄດ້ເປັນໄພຂົ່ມຂູ່ອັນຮ້າຍແຮງຕໍ່ຄວາມປອດໄພດ້ານຊີວິດຂອງນັກບິນອະວະກາດຂອງຈີນ. ຄືດັ່ງຄຳເວົ້າຂອງຊາວເນັດເວົ້າວ່າ: ອາເມຣິກາໄດ້ປະຕິບັດສອງມາດຕະຖານເລື້ອຍໆ ເຊິ່ງແມ່ນແຕ່ຢູ່ອະວະກາດຊັ້ນນອກພຸ້ນກໍຍັງເຮັດແບບສອງມາດຕະຖານເຊັ່ນດຽວກັນ. ພວກເຮົາຂໍບອກອາເມຣິກາວ່າຈະເຮັດໜ້າທີ່ຂອງຕົນຢູ່ຕາມອະວະກາດຊັ້ນນອກໃຫ້ດີຢ່າງແທ້ຈິງ, ຢ່າທຳລາຍຜົນປະໂຫຍດຂອງປະເທດອື່ນຢູ່ຕາມອະວະກາດຊັ້ນນອກຕໍ່ໄປອີກດ້ວຍ ແລະ ປະກອບສ່ວນຢ່າງຕັ້ງໜ້າແລະແທ້ຈິງໃຫ້ແກ່ອະນາຄົດຂອງມວນມະນຸດ.
ຄຳເຫັນ
0