ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 28 ມັງກອນນີ້, ຫ້ອງການຖະແຫຼງຂ່າວຂອງຄະນະລັດຖະບານຈີນໄດ້ເຜີຍແຜ່ “ປື້ມປົກຂາວ“ການບິນອະວະກາດຂອງຈີນໃນປີ 2021”, ໂດຍໄດ້ແນະນຳຜົນສຳເລັດທີ່ສຳຄັນ, ໄດ້ແນະນຳຄວາມຄືບໜ້າທີ່ສຳຄັນໃນວຽກງານການບິນອະວະກາດຂອງຈີນແຕ່ປີ 2016 ເປັນຕົ້ນມາ, ວຽກງານຕົ້ນຕໍໃນ 5 ປີຂ້າງໜ້າ, ເພື່ອໃຫ້ປະຊາຄົມໂລກເຂົ້າໃຈພາລະກິດການບິນອະວະກາດຂອງຈີນຕື່ມອີກ.
ໃນປື້ມປົກຂາວລະບຸວ່າ: ຈີນໄດ້ຖືເອົາການພັດທະນາພາລະກິດການບິນອະວະກາດເປັນພາກສ່ວນສຳຄັນໃນຍຸດທະສາດການພັດທະນາຊາດຢ່າງສະເໝີຕົ້ນສະເໝີປາຍ, ໄດ້ຍຶດໝັ້ນການສຳຫຼວດ ແລະ ນຳໃຊ້ອະວະກາດຊັ້ນນອກໃນທາງສັນຕິຢ່າງ ສະເໝີຕົ້ນສະເໝີປາຍ. ນັບແຕ່ປີ 2016 ເປັນຕົ້ນມາ, ການບິນອະວະກາດຂອງຈີນໄດ້ກ້າວເຂົ້າສູ່ໄລຍະທີ່ມີການປະດິດສ້າງໃໝ່ ແລະ ການພັດທະນາຢ່າງວ່ອງໄວ, ການສ້າງພື້ນຖານໂຄງລ່າງດ້ານການບິນອະວະກາດໄດ້ມີຄວາມກ້າວໜ້າຢ່າງໝັ້ນທ່ຽງ, ລະບົບນຳທາງດ້ວຍດາວທຽມເປີຍໂຕໃນຂອບເຂດທົ່ວໂລກໄດ້ສ້າງສຳເລັດ ແລະ ໃຫ້ບໍລິການ, ລະບົບສຳຫຼວດວັດແທກໜ້າດິນທີ່ມີຄວາມລະອຽດສູງໄດ້ສ້າງສຳເລັດໂດຍພື້ນຖານ, ຄວາມສາມາດການບໍລິການດ້ານການສື່ສານ ແລະ ວິທະຍຸຜ່ານດາວທຽມໄດ້ເຂັ້ມແຂງຂຶ້ນຢ່າງໝັ້ນທ່ຽງ, ໂຄງການສຳຫຼວດດວງຈັນທີ່ແບ່ງເປັນ “3 ໄລຍະ” ໄດ້ສຳເລັດຜົນຢ່າງຈົບງາມ, ການສ້າງສະຖານີອະວະກາດຂອງຈີນໄດ້ເລີ່ມຂຶ້ນຢ່າງຮອບດ້ານ, ຍານອະວະກາດ “ທ່ຽນເວີ້ນ 1” ໄດ້ມີບາດກ້າວກະໂດດ ຈາກການສຳຫຼວດດວງຈັນສູ້ການສຳຫຼວດດາວອັງຄານ, ເຊິ່ງໄດ້ຮັບຜົນສຳເລັດຢ່າງຈະແຈ້ງທີ່ປະຈັກຕາຊາວໂລກ.
ໃນປື້ມປົກຂາວຍັງລະບຸວ່າ, ໃນໂລກປັດຈຸບັນ, ບັນດາປະເທດໃນໂລກນັບມື້ນັບຫຼາຍໄດ້ໃຫ້ຄວາມສຳຄັນຢ່າງສູງ ແລະ ອອກແຮງພັດທະນາພາລະກິດການບິນອະວະກາດ, ການບິນອະວະກາດຂອງໂລກໄດ້ກ້າວເຂົ້າສູ່ໄລຍະໃໝ່ທີ່ມີການພັດທະນາອັນໃຫຍ່ຫຼວງ ແລະ ມີການປະຕິຮູບອັນໃຫຍ່ຫຼວງ, ຈະມີຜົນສະທ້ອນທີ່ສຳຄັນ ແລະ ຍາວໄກຕໍ່ການພັດທະນາຂອງສັງຄົມມະນຸດ.
ເມື່ອຢືນຢູ່ຈຸດເລີ່ມຕົ້ນຂອງປະຫວັດສາດໃນຂະບວນການໃໝ່ເພື່ອສ້າງປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ຈີນຈະເລັ່ງຊຸກຍູ້ການສ້າງປະເທດທີ່ເຂັ້ມແຂງດ້ານການບິນອະວະກາດ, ປະຕິບັດຕາມທັດສະນະປະຊາຄົມຮ່ວມຊາຕາກຳຂອງມວນມະນຸດ, ສືບຕໍ່ຮ່ວມກັບບັນດາປະເທດ, ຕັ້ງໜ້າເຂົ້າຮ່ວມການຄຸ້ມຄອງອະວະກາດຊັ້ນນອກຂອງໂລກ ກໍຄືການແລກປ່ຽນ ແລະ ການຮ່ວມມືທີ່ກ່ຽວຂ້ອງ, ປົກປັກຮັກສາຄວາມປອດໄພໃນອະວະກາດຊັ້ນນອກ, ຊຸກຍູ້ການເຄື່ອນໄຫວຢູ່ອະວະກາດຊັ້ນນອກສາມາດພັດທະນາຢ່າງຍືນຍົງ, ປະກອບສ່ວນອັນໃຫຍ່ຫຼວງກວ່າເກົ່າເພື່ອປົກປ້ອງບ້ານເມືອງຂອງໜ່ວຍໂລກ, ເພີ່ມຄວາມສຸກໃຫ້ກັບປະຊາຊົນ, ແລະຊຸກຍູ້ຄວາມກ້າວໜ້າດ້ານອະລິຍະທຳຂອງມວນມະນຸດ.
ຄຳເຫັນ
0