ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ສະພາຕ່ຳອາເມຣິກາໄດ້ຄົ້ນຄວ້າພິຈາລະນາແລະຮັບຮອງ “ຍັດຕິວ່າດ້ວຍການແຂ່ງຂັນຂອງອາເມຣິກາປີ 2022” ໃນວັນທີ 5 ກຸມພານີ້. ກ່ຽວກັບເລື່ອງນີ້, ທ່ານ ຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 7 ກຸມພານີ້ວ່າ: ຍັດຕິດັ່ງກ່າວມີເນື້ອໃນດ້ານລົບທີ່ກ່ຽວຂ້ອງກັບຈີນທີ່ເຕັມໄປດ້ວຍແນວຄິດສົງຄາມເຢັນແລະແນວຄິດເກມຜົນລວມເປັນສູນ,ໄດ້ໃສ່ຮ້າຍປ້າຍສີເສັ້ນທາງການພັດທະນາຂອງຈີນແລະນະໂຍບາຍພາຍໃນແລະຕ່າງປະເທດຂອງຈີນ,ປຸກປັ່ນການແຂ່ງຂັນຍຸດທະສາດກັບຈີນ,ຊີ້ນີ້ຊີ້ນັ້ນກ່ຽວກັບບັນຫາໄຕ້ຫວັນ,ບັນຫາເຂດຊິ່ນຈ່ຽງ,ບັນຫາຮົງກົງແລະບັນຫາເຂດຕິເບດແລະບັນຫາອື່ນໆ. ຈີນເດັດດ່ຽວຄັດຄ້ານຕໍ່ເລື່ອງນີ້.
ທ່ານ ຈ້າວລີ້ຈ່ຽນ ກ່າວເນັ້ນໜັກວ່າ: “ພວກຂ້າພະເຈົ້າໄດ້ກ່າວມາເປັນຫຼາຍຄັ້ງແລ້ວວ່າ:ອາເມຣິກາຈະພັດທະນາແນວໃດ,ຍົກສູງກຳລັງແຂ່ງຂັນຂອງຕົນແນວໃດ,ແມ່ນເລື່ອງຂອງອາເມຣິກາເອງ,ແຕ່ອາເມຣິກາຢ່າສວຍໃຊ້ຈີນມາສ້າງເລື່ອງ,ຍິ່ງບໍ່ຄວນຖືເອົາເລື່ອງນີ້ມາເປັນຂໍ້ອ້າງເພື່ອແຊກແຊງວຽກງານພາຍໃນຂອງຈີນແລະທຳລາຍຜົນປະໂຫຍດຂອງຈີນ. ຍັດຕິດັ່ງກ່າວໄດ້ເຜີຍແບພຶດຕິກຳທີ່ເປັນເຈົ້າອຳນາດແລະມັກຂົ່ມເຫັງຂອງຝ່າຍອາເມຣິກາອີກເທື່ອໜຶ່ງ,ເຊິ່ງແມ່ນແນວຄິດພື້ນຖານທີ່ຝືນກັບກະແສຂອງຍຸກສະໄໝແລະກໍ່ບໍ່ສອດຄ່ອງກັບຄວາມມຸ່ງມາດປາຖະໜາຂອງຊາວໂລກທີ່ຢາກສະແຫວງຫາສັນຕິພາບແລະການພັດທະນາແລະຊຸກຍູ້ການຮ່ວມມືໃນປັດຈຸບັນ,ໃນທີ່ສຸດກໍ່ຈະທຳລາຍຜົນປະໂຫຍດຂອງອາເມຣິກາເອງເທົ່ານັ້ນ.”
ທ່ານ ຈ້າວລີ້ຈ່ຽນ ຊີ້ໃຫ້ເຫັນວ່າ: ອາເມຣິກາຄວນປະລະແນວຄິດສົງຄາມເຢັນແລະແນວຄິດເກມຜົນລວມເປັນສູນ,ປະຕິບັດນະໂຍບາຍການພັດທະນາຂອງຈີນແລະການພົວພັນລະຫວ່າງຈີນ-ອາເມຣິກາຢ່າງຖືກຕ້ອງແລະສົມເຫດສົມຜົນ,ລຶບເນື້ອໃນດ້ານລົບທີ່ກ່ຽວຂ້ອງກັບຈີນ,ຢຸດຕິການຄົ້ນຄວ້າພິຈາລະນາແລະຊຸກຍູ້ຍັດຕິດັ່ງກ່າວ,ຢຸດຕິທຳລາຍສາຍພົວພັນລະຫວ່າງຈີນ-ອາເມຣິກາແລະການຮ່ວມມືລະຫວ່າງສອງຝ່າຍໃນຂົງເຂດທີ່ສຳຄັນ.
ຄຳເຫັນ
0