ເມືອງເປຊ່ວນເປັນເມືອງປົກຄອງຕົນເອງເຜົ່າຊ່ຽງພຽງແຫ່ງດຽວຂອງຈີນ,ສະນັ້ນ,ເມືອງເປຊ່ວນທີ່ສ້າງໃໝ່ນັ້ນໄດ້ສ່ອງແສງໃຫ້ເຫັນເຖິງໂສມໜ້າເຜົ່າຊ່ຽງ,ສືບທອດວັດທະນະທຳດັ້ງເດີມ,ການກໍ່ສ້າງຕົວເມືອງໄດ້ວາງເປົ້າໝາຍພັດທະນາຄື"ປອດໄພ,ໜ້າຢູ່,ຈະເລີນຮຸ່ງເຮືອງ,ມີເອກະລັກພິເສດ,ສີວິໄລແລະກົມກຽວກັນ",ສ້າງສະພາບແວດລ້ອມຕົວເມືອງທີ່ມີພູຜາແມ່ນ້ຳກັບຕົວເມືອງເຊື່ອມໂຍງເຂົ້າກັນຢ່າງຈົບງາມ,ກ້າວໄປສູ່ເມືອງທ່ອງທ່ຽວລະດັບສາກົນ.ທ່ານເຮີຈີ້ຢູ ຫົວໜ້າພະແນກທ່ອງທ່ຽວນະຄອນມຽນຢາງກ່າວວ່າ:
"ຜັງວາດເມືອງ ໃໝ່ເປຊ່ວນໄດ້ເຕົ້າໂຮມຊ່າງອອກແບບຜັງເມືອງລະດັບໜຶ່ງຂອງຈີນ,ສ່ອງແສງໃຫ້ເຫັນແນວຄິດທີ່ມີວິທະຍາສາດແລະທັນສະໄໝ.ໂດຍສະເພາະແມ່ນການອອກແບບໃຫ້ໜ້າຢູ່,ແລະເປັນຕາໄປທ່ຽວນັ້ນເຮັດໄດ້ດີຫຼາຍ.ເວົ້າຈາກດ້ານອອກແບບແລ້ວ,ການກໍ່ສ້າງທັງໝົດແມ່ນມີເອກະລັກແບບດຽວກັນໂດຍພື້ນຖານ,ເຊິ່ງໂຮມສູນສະແດງໃຫ້ເຫັນເຖິງເອກະລັກພິເສດຂອງສະຖາປັດຕະຍະກຳເຜົ່າຊ່ຽງ.ເວົ້າໃນດ້ານບົດບາດຂອງຕົວເມືອງແລ້ວ,ພວມໄດ້ຮັບການເສີມຂະຫຍາຍໃຫ້ສົມບູນຂຶ້ນເປັນກ້າວໆເພື່ອຕອບສະໜອງຄວາມຮຽກຮ້ອງຕ້ອງການຂອງຄົນຍຸກປະຈຸບັນ.ທັງໝົດເຫຼົ່ານີ້ລ້ວນແຕ່ໄດ້ພິຈາລະນາຢ່າງລະອຽດຮອບຄອບເລີ່ມແຕ່ຫົວທີໃນການກໍ່ສ້າງເປຊ່ວນໃຫ້ເປັນເມືອງນ້ອຍທ່ອງທ່ຽວສາກົນ."
ການອອກແບບເມືອງທີ່ເປີດເຜີຍລຽບງ່າຍ,ຖະໜົນຫົນທາງທັງກວ້າງທັງສະອາດ,ໂຮງຮຽນທີ່ປະກອບສິ່ງກໍ່ສ້າງຄົບຖ້ວນສົມບູນ,ສວນດອກໄມ້ໃຈກາງເມືອງທີ່ສວຍສົດງົດງາມ,ຖະໜົນການຄ້າທີ່ມີເອກະລັກສະເພາະຕົວ,ຕຶກອາຄານຊຸມຊົນລຽນກັນຢ່າງເປັນລະບຽບຮຽບຮ້ອຍ,ທັງໝົດເຫຼົ່ານີ້ໄດ້ປະກອບເປັນພາບງາມຂອງເມືອງໃໝ່ເປຊ່ວນ.
ໃນຖານະເປັນເມືອງປົກຄອງຕົນເອງເຜົ່າຊ່ຽງພຽງແຫ່ງດຽວຂອງຈີນ, ຜັງວາດແລະການກໍ່ສ້າງຂອງເມືອງເປຊ່ວນໃໝ່ໄດ້ສ່ອງແສງໃຫ້ເຫັນວັດທະນະທຳດັ້ງເດີມຂອງເຜົ່າຊ່ຽງຢ່າງເຕັມທີ່,ມີເອກະລັກສີສັນເຜົ່າຊ່ຽງອັນເຂັ້ມຂຸ້ນ.ບໍ່ວ່າສິ່ງກໍ່ສ້າງສາທາລະນະ,ເຮືອນປະຊາຊົນຫຼືສິ່ງກໍ່ສ້າງດ້ານການບັນເທີງລ້ວນແຕ່ ມີເອກກະລັກພິເສດຂອງເຜົ່າຊ່ຽງ.ຍ້ອນວ່າແກະແມ່ນສັດບູຊາຂອງເຜົ່າຊ່ຽງບູຮານ,ສະນັ້ນ,ຮູບສັນຍະລັກເຜົ່າຊ່ຽງຕ່າງໆເຊັ່ນວ່າເຂົາແກະ,ຫົວແກະຢູ່ໃນເມືອງໃໝ່ ເປຊ່ວນມີໃຫ້ເຫັນຢູ່ທົ່ວທຸກແຫ່ງຫົນ.ໃນນັ້ນ,ຖະໜົນການຄ້າ"ບານາຊາ"ແມ່ນພົ້ນເດັ່ນທີ່ສຸດ.
ຖະໜົນການຄ້າ"ບານາຊາ"
1 2 3 4 
