ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
“ງານວາງສະແດງຜົນສຳເລັດດ້ານສິດທິມະນຸດຂອງ ສປ ຈີນໃນຮອບ 70 ປີພາຍໃຕ້ຫົວຂໍ້: ສ້າງຄວາມສຸກໃຫ້ແກ່ປະຊາຊົນ” ໄດ້ຈັດຂຶ້ນຢູ່ສຳນັກງານໃຫຍ່ອົງການສະຫະປະຊາຊາດທີ່ນະຄອນເຊີແນວໃນວັນທີ 9 ກັນຍານີ້ ໂດຍມີທ່ານເອກອັກຄະລັດຖະທູດຫຼາຍກວ່າ 40 ທ່ານຈາກຣັດເຊຍ, ສະຫະພາບເອີຣົບ, ແຟງລັງ, ແມັກຊິກ, ຟິລິບປິນ ແລະຊຳບີເປັນຕົ້ນ ພ້ອມດ້ວຍເຈົ້າໜ້າທີ່ການທູດເກືອບ 100 ປະເທດແລະເຈົ້າໜ້າທີ່ຂອງອົງການຈັດຕັ້ງສາກົນ, ນັກຂ່າວ ແລະນັກວິຊາການ ລວມທັງໝົດ 300 ກວ່າຄົນໄດ້ເຂົ້າຮ່ວມພິທີເປີດງານ.
ທ່ານ ເຊີນຊວີ້ ຜູ້ຕາງໜ້າຖາວອນຂອງຈີນປະຈຳສຳນັກງານອົງການສະຫະປະຊາຊາດທີ່ເຊີແນວ ແລະ ປະຈຳອົງການຈັດຕັ້ງສາກົນອື່ນໆທີ່ສະວິສ ໄດ້ກ່າວຄຳປາໄສໃນພິທີເປີດງານດັ່ງກ່າວວ່າ: ວຽກງານສິດທິມະນຸດຂອງຈີນໄດ້ຮັບຜົນງານທີ່ປະຈັກຕາຕໍ່ຊາວໂລກ, ສາເຫດສຳຄັນແມ່ນຍ້ອນການຍຶດໝັ້ນເດີນຕາມເສັ້ນທາງການພັດທະນາສິດທິມະນຸດທີ່ມີສີສັນພິເສດຂອງຈີນຢ່າງເດັດດ່ຽວໜຽວແໜ້ນ. ຈີນຍຶດໝັ້ນຖືສະພາບແຫ່ງຊາດຕົນເປັນເດີມພັນ, ຖືເອົາປະຊາຊົນເປັນໃຈກາງຢ່າງສະເໝີຕົ້ນສະເໝີປາຍ, ຍຶດໝັ້ນການຊຸກຍູ້ສິດທິມະນຸດດ້ວຍການພັດທະນາ, ຊຸກຍູ້ສິດທິມະນຸດດ້ວຍກົດໝາຍ ແລະຊຸກຍູ້ສິດທິມະນຸດດ້ວຍການເປີດປະຕູສູ່ໂລກພາຍນອກ.
ທູຕານຸທູດຫຼາຍທ່ານທີ່ເຂົ້າຮ່ວມຊົມງານດັ່ງກ່າວກ່າວວ່າ: ການພັດທະນາວຽກງານສິດທິມະນຸດຂອງຈີນ ເປັນແບບຢ່າງທີ່ສຳເລັດຜົນໃຫ້ແກ່ບັນດາປະເທດພວມພັດທະນາຈຳນວນຫຼວງຫຼາຍ, ຫວັງວ່າບັນດາປະເທດຈະຖອດຖອນເອົາບົດຮຽນຂອງຈີນໃນດ້ານດັ່ງກ່າວ, ທັງຫວັງວ່າ ຈີນຈະສະເໜີຂໍ້ລິເລີ່ມແລະຈຸດຢືນທີ່ສອດຄ່ອງກັບຜົນປະໂຫຍດຂອງປະເທດພວມພັດທະນາໃນຂົງເຂດສິດທິມະນຸດສາກົນໃຫ້ຫຼາຍກວ່າເກົ່າ ເພື່ອຊຸກຍູ້ການບໍລິຫານສິດທິມະນຸດສາກົນໃຫ້ພັດທະນາໄປຕາມທິດທາງທີ່ທ່ຽງທຳແລະສົມເຫດສົມຜົນກວ່າເກົ່າ.
ຄຳເຫັນ
0