ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 22 ກັນຍານີ້, ທ່ານສີຈິ້ນຜິງ ປະທານປະເທດຈີນໄດ້ປະກອບຄຳເຫັນທີ່ສຳຄັນໃນການອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດຄັ້ງທີ 75, ໃນນັ້ນ ເນື້ອໃນກ່ຽວກັບການຮັບມືກັບການປ່ຽນແປງຂອງດິນຟ້າອາກາດໄດ້ດຶງດູດຄວາມສົນໃຈຂອງສື່ມວນຊົນສາກົນ. ໃນເວລາໃຫ້ສຳພາດຕໍ່ນັກຂ່າວ, ຜູ້ຊ່ຽວຊານປະເທດຕາເວັນຕົກເວົ້າໂດຍກົງວ່າ, ຄຳໝັ້ນສັນຍາຂອງຈີນເປັນການກະຕຸ້ນກຳລັງໃຈໃນການເຄື່ອນໄຫວເພື່ອຮັບມືກັບການປ່ຽນແປງຂອງດິນຟ້າອາກາດຂອງໂລກ.
ເມື່ອຜະເຊີນກັບສິ່ງທ້າທາຍກ່ຽວກັບການປ່ຽນແປງຂອງດິນຟ້າອາກາດທີ່ມີຕໍ່ມວນມະນຸດ, ບຸກຄົນໃນວົງການຕ່າງໆຂອງຫຼາຍປະເທດໄດ້ຕີລາຄາສູງຕໍ່ຄຳໝັ້ນສັນຍາຂອງຈີນ, ຄື ພະຍາຍາມເຮັດໃຫ້ການລະບາຍກາກບອນດີອອກສິດຂຶ້ນສູ່ລະດັບສູງສຸດກ່ອນປີ 2030, ແລະພະຍາຍາມບັນລຸເປົ້າໝາຍປອດກາກບອນກ່ອນປີ 2060.
ວັນທີ 23 ກັນຍານີ້, ທ່ານອູເຊີລາ ຈອນ ເດີ ເລເຢີ ປະທານຄະນະກຳມາທິການສະຫະພາບເອີຣົບໄດ້ສະແດງຄວາມຄິດເຫັນຜ່ານສື່ສັງຄົມອອນລາຍໂດຍໄດ້ສະແດງຄວາມຊົມເຊີຍຕໍ່ແຜນການຫຼຸດການລະບາຍກາກບອນ ແລະ ເປົ້າໝາຍປອດກາກບອນທີ່ຈີນສະເໜີອອກມາ. ທ່ານ ວອນເດີເລເຢີກ່າວວ່າ, ນີ້ແມ່ນບາດກ້າວສຳຄັນໃນການຮັບມືກັບການປ່ຽນແປງຂອງດິນຟ້າອາກາດຂອງໂລກພາຍໃຕ້ຂອບ “ສັນຍາປາຣີ”, ສະຫະພາບເອີຣົບຈະຮ່ວມມືກັບຈີນເພື່ອບັນລຸເປົ້າໝາຍດັ່ງກ່າວ.
ຂ່າວສານບລູມເບີກໄດ້ລາຍງາຍຂ່າວທີ່ພາດຫົວຂໍ້ວ່າ “ຈີນເອົາຊະນະອາເມຣິກາໃນຄຳໝັ້ນສັນຍາປອດກາກບອນ”, ໂດຍເຕືອນວ່າ, ອາເມຣິກາທີ່ມີຍອດປະລິມານການລະບາຍກາກບອນຫຼາຍກວ່າໝູ່ໃນປະຫວັດສາດ ເຊິ່ງຫຼາຍກວ່າຍອດປະລິມານການລະບາຍຂອງຈີນ ເຢຍລະມັນ ແລະ ອັງກິດໃນປະຫວັດສາດ, ແລະອາດຈະຖອນອອກຈາກ “ສັນຍາປາຣີ”ຢ່າງເປັນທາງການຫຼັງການເລືອກຕັ້ງທົ່ວໄປໃນເດືອນພະຈິກປີນີ້.
ຂ່າວສານAPລາຍງານວ່າ, ປະຈຸບັນ ມີປະມານ 30 ປະເທດ ເຊິ່ງລວມທັງຈີນໄດ້ໃຫ້ຄຳໝັ້ນສັນຍາທີ່ຈະປອດກາກບອນ, ເຊິ່ງກວມເອົາ 43%ຂອງຍອດປະລິມານປະເທດລະບາຍກາກບອນດີອອກສິດທົ່ວໂລກຈາກການເຜົາໄໝ້ວັດຖຸເຊື້ອໄຟຊາກຟອດຊີວ. ສຳລັບອາເມຣິກາ ອິນເດຍ ອົສຕຼາລີແລະປະເທດອື່ນໆທີ່ລະບາຍກາກບອນຢ່າງຫຼວງຫຼາຍນັ້ນຍັງບໍ່ທັນເຂົ້າເປັນປະເທດພາຄີເທື່ອ.
ຄຳເຫັນ
0