ວັນທີ 25 ພະຈິກນີ້, ທ່ານຫຼີເຄີ້ສ໋ຽງ, ນາຍົກລັດຖະມົນຕີຈີນໄດ້ຂຽນບົດຄວາມລົງໃນໜັງສືພິມຂອງປະເທດເອີລົບກາງແລະຕາເວັນອອກທີ່ມີຫົວຂໍ້ວ່າ "ການຖາມຂ່າວທີ່ຂ້າມພູພັນຊັ້ນນະທີຂັ້ນໝື່ນສາຍ—ຂຽນໃນເວລາທີ່ໃກ້ຈະຈັດການພົບປະຜູ້ນຳຈີນ-ປະເທດເອີລົບກາງແລະຕາເວັນອອກ"
ບົດຄວາມຂຽນວ່າ, ເຖິງວ່າຈີນແລະປະເທດເອີລົບກາງແລະຕາເວັນອອກຫ່າງກັນໄກແສນໄກ, ແຕ່ວ່າຫົວໃຈຂອງພວກເຮົາແມ່ນຕິດກັນ. ກ່ອນນີ້ 60 ປີເມື່ອປະເທດຈີນໃໝ່ສ້າງຕັ້ງຂຶ້ນ, ກໍ່ແມ່ນປະເທດເອີລົບກາງແລະຕາເວັນອອກໄດ້ໃຫ້ການຮັບຮອງກ່ອນໝູ່, ໄດ້ເປີດສາກໃໝ່ຂອງການຮ່ວມມືມິດຕະພາບລະຫວ່າງຈີນກັບປະເທດເອີລົບກາງແລະຕາເວັນອອກ. ບົດຄວາມຊີ້ອອກວ່າ, ປີ 2012, ຍອດມູນຄ່າການຄ້າລະຫວ່າງຈີນກັບປະເທດເອີລົບກາງແລະຕາເວັນອອກມີເຖິງ 50 ຕື້ກວ່າໂດລາ, ການຮ່ວມມືດ້ານເສດຖະກິດການຄ້າໄດ້ຮັບໝາກຜົນທີ່ດີ. ບົດຄວາມກ່າວເນັ້ນວ່າ, ການແລກປ່ຽນດ້ານວັດທະນະທຳລະຫວ່າງຈີນກັບປະເທດເອີລົບກາງແລະຕາເວັນອອກສາມາດເວົ້າໄດ້ວ່າດີເດັ່ນຫຼາຍ. ປະເທດເອີລົບກາງແລະຕາເວັນອອກແມ່ນສະມາຊິກສຳຄັນຂອງຄອບຄົວໃຫຍ່ເອີລົບ, ຈີນສະໜັບສະໜູນປະເທດເອີລົບກາງແລະຕາເວັນອອກເຂົ້າເປັນສະມາຊິກສະຫະພາບເອີລົບ, ເຊື່ອວ່າການຮ່ວມມືຮອບດ້ານລະຫວ່າງຈີນກັບປະເທດເອີລົບກາງແລະຕາເວັນອອກບໍ່ພຽງແຕ່ມີຜົນດີຕໍ່ປະຊາຊົນຂອງສອງຝ່າຍເທົ່ານັ້ນ, ແຕ່ເປັນການສ້າງກຳລັງແຮງໃໝ່ແຫ່ງການຊຸກຍູ້ການຂະຫຍາຍຕົວການພົວພັນລະຫວ່າງຈີນກັບເອີລົບຢ່າງແຂງແຮງ, ສະເໝີພາບແລະແບບຍືນຍົງ.
 |
