ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດ
ໂດຍ ສະຫາຍ ສີຈິ້ນຜິງ
ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດ ສປ ຈີນ
ວັນທີ 13 ພະຈິກນີ້ ໃນໂອກາດຢ້ຽມຢາມ ສປປ ລາວທາງລັດຖະກິດ, ສະຫາຍສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດ ສປ ຈີນໄດ້ລົງພິມບົດຄວາມທີ່ພາດຫົວເລື່ອງວ່າ: ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດ ໃສ່ໜັງສືພິມ ປະຊາຊົນ, ໜັງສືພິມ ປະເທດລາວ ແລະໜັງສືພິມວຽງຈັນທາມສ ເຊິ່ງບົດຄວາມມີເນື້ອໃນດັ່ງນີ້:
ໂດຍຕອບສະໜອງຕາມຄຳເຊີນຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ສປປ ລາວ, ຂ້າພະເຈົ້າຈະເດີນທາງມາຢ້ຽມຢາມ ສປປ ລາວທາງລັດຖະກິດ. ຂ້າພະເຈົ້າເຄີຍມາຢ້ຽມຢາມລາວສອງເທື່ອແລ້ວ ເຊິ່ງ ປະຊາຊົນລາວຜູ້ທີ່ມັກແຂກມັກຄົນ, ທາດຫຼວງທີ່ນະຄອນຫຼວງວຽງຈັນທີ່ເຫຼືອງເຫຼື້ອມງາມຕາ ແລະແຄມຂອງທີ່ມີພາບວິວທິວທັດທີ່ສວຍສົດງົດງາມ ໄດ້ເຮັດໃຫ້ຂ້າພະເຈົ້າມີຄວາມປະທັບໃຈຢ່າງເລິກເຊິ່ງ. ຂ້າພະເຈົ້າຄອງຄອຍຈະໄດ້ພ້ອມກັບເພື່ອນເກົ່າແລະໃໝ່ຂອງລາວ ຫວນຄືນມິດຕະພາບ, ສະແຫວງຫາການພັດທະນາ ເພື່ອຮ່ວມກັນສ້າງອະນາຄົດອັນດີງາມແຫ່ງການພົວພັນລະຫວ່າງສອງປະເທດ.
ປະເທດຈີນ ແລະປະເທດລາວ ແມ່ນປະເທດສັງຄົມນິຍົມທີ່ເປັນບ້ານໃກ້ເຮືອນຄຽງທີ່ມີມິດຕະພາບຕໍ່ກັນ, ມີອຸດົມການເຊັ່ນດຽວກັນ, ລະບອບສັງຄົມຄືກັນ ແລະເດີນຕາມເສັ້ນທາງການພັດທະນາທີ່ຄ້າຍຄືກັນ. ນັບແຕ່ສ້າງຕັ້ງສາຍພົວພັນທາງການທູດໃນເຄິ່ງສະຕະວັດມານີ້, ການພົວພັນລະຫວ່າສອງພັກ ສອງລັດ ໄດ້ຜ່ານການທົດສອບຂອງການປ່ຽນແປງແຫ່ງຍຸກສະໄໝ ແລະການປ່ຽນແປງຂອງສະພາບການທົ່ວໂລກ, ອັນໄດ້ສ້າງປະຫວັດສາດທີ່ໜ້າຈາລຶກໄວ້. ການນຳລຸ່ນອາວຸໂສເຊັ່ນ: ສະຫາຍ ເໝົາເຈີຕົງ ສະຫາຍ ໂຈ່ວເອີ່ນລາຍ ກັບສະຫາຍ ໄກສອນ ພົມວິຫານ ແລະສະຫາຍອື່ນໆ ໄດ້ຈົກຈິດຈົກໃຈໃສ່ກັນ, ໄດ້ຜູກພັນມິດຕະພາບອັນເລິກເຊິ່ງໃນການຕໍ່ສູ້ກັບສັດຕູ, ໄດ້ສ້າງພື້ນຖານອັນໝັ້ນແກ່ນໃຫ້ສອງປະເທດຈີນ-ລາວມີມິດຕະພາບຕໍ່ກັນທຸກເຊັ່ນຄົນ. ລູກຫຼານຂອງທ່ານ ກິນິມ ພົນເສນາ ຜູ້ນຳທີ່ສຳຄັນຂອງລາວເຄີຍໄປຮຽນຢູ່ຈີນເປັນເວລາ 10 ປີ, ພວກເພິ່ນໄດ້ຜ່ານຜ່າໄລຍະໄວໜຸ່ມຂອງຕົນຢູ່ຈີນ ແລະກໍ່ກາຍເປັນສັກຂີພິຍານ, ຜູ້ສືບທອດ ແລະຜູ້ທີ່ຊຸກຍູ້ມິດຕະພາບອັນເປັນມູນເຊື້ອລະຫວ່າງຈີນ-ລາວ. ໃນຊຸມປີ 1960-1970 ທະຫານແລະປະຊາຊົນຈີນ ໄດ້ຕັ້ງໜ້າສະໜັບສະໜູນພາລະກິດປົດປ່ອຍແລະຄວາມເປັນເອກະລາດຂອງຊາດລາວ, ທະຫານຈີນຈຳນວນ 200 ກວ່າຄົນ ໄດ້ເສຍສະຫຼະຊີວິດຢູ່ຜືນແຜ່ນດິນແຫ່ງນີ້ທີ່ພວກເພິ່ນເຄີຍສູ້ຮົບກັນ, ອັນໄດ້ສ້າງອະນຸສາວະລີຊົ່ວນິລັນດອນໃຫ້ແກ່ມິດຕະພາບຈີນ-ລາວດ້ວຍເລືອດເນື້ອ ແລະຊີວິດຂອງຕົນ.
ເມື່ອເຂົ້າສູ່ຍຸກໃໝ່, ມິດຕະພາບຈີນ-ລາວໄດ້ຮັບການປັບປຸງຂຶ້ນຕື່ມ ແລະເຕັມໄປດ້ວຍຄວາມມີຊີວິດຊີວາອັນໃໝ່. ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໄດ້ຮັບການເປີດກວ້າງອອກເລື້ອຍໆ. ການໄປມາຫາສູ່ກັນລະຫວ່າງການນຳຂັ້ນສູງນັບມື້ນັບເນື່ອງນິດຂຶ້ນ, ການແລກປ່ຽນລະຫວ່າງສອງພັກກ້າວສູ່ລວງເລິກ, ຄວາມໄວ້ເນື້ອເຊື່ອໃຈກັນທາງການເມືອງມີຄວາມໝັ້ນທ່ຽງຂຶ້ນເລື້ອຍໆ. ຄຳບູຮານຂອງຈີນກ່າວວ່າ "ຜູ່ທີ່ມີອາຈານດຽວກັນ ເອີ້ນວ່າໝູ່, ຜູ້ທີ່ມີອຸດົມການຮ່ວມກັນ ເອີ້ນວ່າເພື່ອນ", ນີ້ຄືການພັນລະນາການພົວພັນລະຫວ່າງຈີນ-ລາວຢ່າງແທດເໝາະທີ່ສຸດ. ໃນຖານເປັນເພື່ອນບ້ານທີ່ດີ, ໝູ່ເພື່ອນທີ່ດີ, ສະຫາຍທີ່ດີ, ຄູ່ຮ່ວມທີ່ດີ ທີ່ມີອຸດົມການແລະເສັ້ນທາງກ້າວເດີນຄືກັນນັ້ນ, ຈີນ ແລະລາວ ໄດ້ປະຕິບັດຕໍ່ກັນຢ່າງສະເໝີພາບ ແລະຕ່າງຊ່ວຍຊູຍູ້ໜູນກັນຕະຫຼອດຂະບວນການທີ່ຊອກຄົ້ນການປະດິດສ້າງທິດສະດີ ແລະພຶດຕິກຳຂອງສັງຄົມນິຍົມ, ຊຸກຍູ້ການສ້າງສາເສດຖະກິດ ການເມືອງ ວັດທະນະທຳ ແລະສັງຄົມຢ່າງຮອບດ້ານ ແລະ ເລັ່ງລັດຂະບວນການຫັນເປັນທັນສະໄໝ. ການພົວພັນລະຫວ່າງຈີນ-ລາວຖືເປັນແບບຢ່າງຂອງການພົວພັນ ແລະຮ່ວມມືຮອບດ້ານລະຫວ່າງຈີນກັບບັນດາປະເທດອ້ອມຂ້າງທີ່ເປັນບ້ານໃກ້ເຮືອນຄຽງທີ່ດີຕໍ່ກັນ.
ເລັ່ງລັດການເຊື່ອມຈອດກັນດ້ານຍຸດທະສາດການພັດທະນາລະຫວ່າງຈີນ-ລາວ. ຂໍ້ລິເລີ່ມ "ໜຶ່ງແລວທາງ ໜຶ່ງເສັ້ນທາງ" ຂອງຈີນ ແລະ ຍຸດທະສາດ "ຫັນຈາກປະເທດທີ່ບໍ່ມີທາງອອກສູ່ທະເລກາຍເປັນປະເທດເຊື່ອມຕໍ່ໃນອະນຸພາກພື້ນ" ຂອງລາວ, ແຜນການ "5 ປີຄັ້ງທີ 13" ຂອງຈີນ ແລະແຜນການພັດທະນາສັງຄົມ "5 ປີຄັ້ງທີ 8 " ຂອງລາວສາມາດເຊື່ອມຈອດກັນໃນລະດັບສູງ, ສອງປະເທດມີທັດສະນະການພັດທະນາຄ້າຍຄືກັນ. ປີກາຍນີ້ ໂຄງການທາງລົດໄຟຈີນ-ລາວ ທີ່ຖືເປັນໂຄງການສັນຍະລັກແຫ່ງການຮ່ວມມືຢ່າງຕິດແທດຕົວຈິງລະຫວ່າງສອງປະເທດນັ້ນ ໄດ້ເລີ່ມກໍ່ສ້າງຢ່າງຮອບດ້ານ, ອັນເຮັດໃຫ້ເສັ້ນທາງຄົມມະນາຄົມທີ່ບັນຈຸຄວາມຝັນການພັດທະນາຂອງປະຊາຊົນລາວນັ້ນພວມຄ່ອຍໆກາຍເປັນຈິງ. ການກໍ່ສ້າງເຂດຮ່ວມມືເສດຖະກິດບໍ່ຫານ-ບໍ່ເຕັນ ແລະເຂດພັດທະນາເສດຖະກິດກວມລວມໄຊເສດຖາຂອງວຽງຈັນ ໄດ້ມີຄວາມຄືບໜ້າເປັນຢ່າງດີ, ວິສາຫະກິດ ແລະອົງການຈັດຕັ້ງຕ່າງໆພາກັນຕັ້ງສຳນັກງານຢູ່ເຂດນີ້ ເຊິ່ງຈະຊ່ວຍປະເທດລາວບັນລຸການໃຫ້ອຸດສາຫະກຳຍົກລະດັບໃຫ້ສູງຂຶ້ນ, ດຶງດູດທຶນຕ່າງປະເທດ, ຊຸກຍູ້ການປະກອບອາຊີບ, ພັດທະນາວິສາຫະກິດຂະໜາດກາງແລະຂະໜາດນ້ອຍ.
