ຈີນ ແລະລາວ ເປັນສະມາຊິກທີ່ສຳຄັນໃນກົນໄກແມ່ນ້ຳລ້ານຊ້າງ-ແມ່ນ້ຳຂອງ. ກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ຮັບຜົນງານຢ່າງຫຼວງຫຼາຍນັບແຕ່ສ້າງຕັ້ງຂຶ້ນຢ່າງເປັນທາງການເມື່ອປີ 2016 ເປັນຕົ້ນມາ, ອັນໄດ້ສະແດງໃຫ້ເຫັນເຖິງ "ຄວາມໄວແຫ່ງແມ່ນ້ຳລ້ານຊ້າງ-ແມ່ນ້ຳຂອງ" ແລະ "ສະມັດຕະພາບແຫ່ງແມ່ນ້ຳລ້ານຊ້າງ-ແມ່ນ້ຳຂອງ", ອັນໄດ້ຈໍ່ຕົວເປັນວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງທີ່ປະຕິບັດຕໍ່ກັນຢ່າງສະເໝີພາບ, ຊ່ວຍເຫຼືອເຊິ່ງກັນແລະກັນຢ່າງຈິງໃຈ ແລະຖືກຕ້ອງປອງດອງຄືກັບຄອບຄົວດຽວ. ປີໜ້າ ລາວຈະເປັນປະເທດປະທານຮ່ວມຂອງການຮ່ວມມືແມ່ນ້ຳລ້ານຊ້າງແມ່ນ້ຳຂອງ. ຈີນຍິນດີຮ່ວມກັບລາວທຳຄວາມພະຍາຍາມນຳກັນ, ຊຸກຍູ້ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ໄດ້ຮັບໝາກຜົນຫຼາຍກວ່າເກົ່າ, ຜັນຂະຫຍາຍໂຄງການຜົນງານໄລຍະຕົ້ນທີ່ສະເໜີໂດຍລາວ, ເພື່ອນຳພາການພັດທະນາຂອງອະນຸພາກພື້ນ, ສ້າງຄວາມຜາສຸກໃຫ້ແກ່ປະຊາຊົນບັນດາປະເທດຢູ່ພາກພື້ນແຫ່ງນີ້ຫຼາຍກວ່າເກົ່າ.
ຄຳສຸພາສິດລາວກ່າວໄວ້ວ່າ "ໄມ້ລຳດຽວລ້ອມຮົ້ວບໍ່ໄຂວ່, ໄພ່ບໍ່ພ້ອມແປງບ້ານບໍ່ເຮືອງ", ຄົນຈີນມັກເວົ້າວ່າ "ທຸກຄົນຮ່ວມຈິດຮ່ວມໃຈກັນ ຈະກາຍເປັນກຳແພງທີ່ໝັ້ນແກ່ນ", "ຫຼາຍຄົນພາກັນພະຍາຍາມສຸມຟືນ ກໍສາມາດເຮັດໃຫ້ໄຟຮຸ່ງຂຶ້ນ". ຂ້າພະເຈົ້າເຊື່ອໝັ້ນວ່າ, ຂໍພຽງແຕ່ຈີນ-ລາວໄວ້ເນື້ອເຊື່ອໃຈເຊິ່ງກັນແລະກັນ ແລະ ຮ່ວມມືກັນ, ກໍຍ່ອມຈະສ້າງອະນາຄົດຂອງການພົວພັນສອງປະເທດທີ່ສົດໃສກວ່າເກົ່າຢ່າງແນ່ນອນ.
